Айылҕаҕа чугас, үлэһит оҕолор ордук булугас, сытыы өйдөөх, олоххо-дьаһахха сыстаҕас, сатабыллаах буолаллара баар суол. Уон саастаах Сахамин Егоров итинник оҕолор ахсааннарыгар киириэн киирэр.
Уолчааны Уус-Алдан улууһун Кэптэни бөһүөлэгин олохтоохторо хайҕыахтарын хайҕыыллар. Тоҕо диэн ыйытыаххыт ааҕааччыларым.
Доруобуйатыгар хааччахтаах, сэдэх ыарыылаах кырачаан уолчаан айылҕаны кытта алтыһарын олус диэн сөбүлүүр. Ол курдук, түөрт сааһыттан алаастарынан сылдьан, мундулуурун саҕалаабыт. Ити таптыыр дьарыгын быйыл сайыҥҥыттан үп-харчы киллэрэр ханаалга кубулуппут. Сахамин үтэһэҕэ үөлүллүбүт соболорун атыылаан саҕалаабыт.
Кини үбү-харчыны сатаан туттарын, грамотнайын, урбаанньыт дьоҕурдааҕын үгүстэр билэллэр. Мундулары атыылыан иннинэ бэйэтэ таас, эмэр кэмпиэт оҥорон атыылыыра.
— Хоруона дьаҥа турбут кэмигэр биһиги ыал күнү быһа айылҕаҕа, алааска сылдьарбыт. Сахамин онно туунан мундулуурга үөрэммитэ. Атыылыыр мундуларын билэсэпиэтинэн сылдьан, дьиэлэринэн таһар. Дьон бырааһынньыктарга сакаастыыр буолан эрэллэр. Сорохтор Дьокуускайга кэһии гынан илдьэ бараллар. Онон сакаас элбэх. Киин куоракка «Синар» маҕаһыыннар социальнай ситимҥэ Сахамины көрөннөр, ыҥырбыттара. Үтэһэлээх мунду кэһиилээх киирбиппит. Уолбутугар оскуола форматын, сэлиэнчигэр тиийэ бэлэхтээннэр үөртүлэр.
Сахамин харчыны наһаа үчүгэйдик туттар, ол-бу бытархайдарга ыспат-тохпот, мунньан иһэр. Илиитигэр дьоҕурдаах. Оонньууругар хортуоҥка дьааһыктарынан ону-маны оҥорооччу. Пластилинынан тугу барытан оҥорор. Миигин кытта оҕуруону кытта тиһэр. Сахамин урут саҥарарын кыбыстара. Онтон куонкуруска кыттан баран, аһыллыбыта.
Биһиги ыал түөрт уоллаахпыт. Улахаммыт ыал. Үс кыра уолаттарбытын кытта олоробут. Кинилэртэн саамай үлэһиттэрэ Сахамиммыт.
Урут Уһун-Күөлгэ олорор этибит. Уолаттарбыт доруобуйалара мөлтөх буоланнар, эмкэ-томко чугаһаан, Кэптэнигэ көһөн кэлбиппит. Уолаттарбытын Москванан, Санкт-Петербурунан сылдьан, доруобуйаларын көрдөрөбүт, — диэн кэпсээбитэ күн күбэй ийэ Лилия Дмитриевна.
Соторутааҕыта Сахамин харчытын мунньан, бэйэтигэр электросамокат ылыммыт уонна сөбүлүүр физкультуратыгар кэтэр таҥаһынан, кроссовкатыгар тиийэ хааччыммыт. Маладьыас диэбэккит дуо? Кырачаан Сахамиҥҥа ылсыбыт дьыалалара табыллан, ситиһиилэнэн иһэллэригэр баҕарыаҕын.
Людмила НОГОВИЦЫНА
ПОДЕЛИТЬСЯ: