Бүгүн Улуу Кыайыы күнүгэр ыытыллыбыт Өлбөт үйэлээх полк хас да көлүөнэ дьону биир санааҕа, биир ньыгыл кэккэҕэ түмтэ.
Аммосова Маргарита Григорьевна, авиация бэтэрээнэ, үлэ бэтэрээнэ, норуот маастара, Усуйаанаттан төрүттээх. Норуот маастара бэйэтэ оҕуруонан оӈорбут значоктарын иилинэн кэлбит. Ураты оӈоһук буолан киһи хараҕар тута быраҕыллар.
-Үс уоллааҕым үһүөн Депутатскай орто оскуолатын бүтэрбиттэрэ. Байыаннай дьайыы кыттыылаахтара. Улахан уолум Луганскайга инженернэй-сапернай ротаҕа медбыраатынан сулууспалыы сылдьар. Оттон икки уолум, хомойуох иһин, суох буолбуттара. Андрей мотострелковай полкаҕа штурмовигынан сылдьыбыта, позывнойа “Кос” диэн этэ. Оттон Григорий ефрейтор, артиллерист этэ, позывнойа “Монгол”. Иккиэн быстах хомуурга ыҥырыллан барбыттара. Улахан убайдара кыайыыны чугаһатар санаалаах бэйэтэ барбыта, үһүс сыла буолла. Бүгүҥҥү өлбөт үйэлээх пуолкаҕа кыра сиэммин Софи Потапованы кытта кэллим.
Мин ийэлээх аҕам Аммосова Татьяна Ивановна уонна Голиков Григорий Никитич, тыыл бэтэрээннэрэ этилэр. Оҕо сылдьан сэрии сылларыгар үлэ бөҕөнү үлэлээбит дьон. Билигин аны мин уолаттарым дойдуларын көмүскэлигэр турдахтара. Григорий барарыгар этэн турар: “Ийээ, биһиги барбатахпытына ким барыай. Ийэ дойдубутун көмүскүөхтээх буоллахпыт. Үһүөн бары төннүөхпүт”, — диэбитэ, — диэн ийэ кэпсээтэ.
Виктор Эверстов
ПОДЕЛИТЬСЯ: