Улуу Кыайыы 80 сыллаах үбүлүөйүгэр «Забота-Арчы» хаһыат редакцията сурутуу акциятын биллэрдэ. Акция чэрчитинэн ытык дьоммутун – бэтэрээннэри, сэрии оҕолорун, итиэннэ элбэх оҕолоох дьиэ кэргэттэри социальнай боппуруостары сырдатар хаһыакка суруйтаран бэлэх оҥоруохха сөп. Сыл аҥардааҕы, 6 ыйга сурутуу – 455,28 солк.
Сурутуу акциятыгар Чурапчы улууһа көхтөөхтүк кыттыһар. СР социальнай сулууспатын уонна үөрэхтээһинин туйгуна, дьиэ кэргэҥҥэ элбэх өҥөнү оҥорор Чурапчытааҕы киин дириэктэрэ Мария Николаевна САВВИНА «Забота-Арчы» хаһыакка суруйтаран туран, биир дойдулаахтарын, республика олохтоохторун «Кыайыы эстафетата» сурутуу акциятыгар кыттыһалларыгар ыҥырда.
Биһиги хаһыаппыт 1993 сылга тэриллиэҕиттэн билиҥҥэ диэри Аҕа дойду сэриитин буойуннарын сырдык ааттарын үйэтитиигэ киэҥ хабааннаах үлэни ыытар, 1995 сылтан «Ветеран» сыһыарыы тиһигин быспакка тахсар. Ким да умнуллубат, туох да умнуллубат! История кырдьыга быстыбат ситим буолан, көлүөнэттэн көлүөнэҕэ бэриллэн иһиэхтээх!
ПОДЕЛИТЬСЯ: