Ааспыт нэдиэлэҕэ Уус-Алдан улууһуттан төрүттээх авиацияҕа сыһыаннаах бөлөх төрөөбүт-үөскээбит дойдуларыгар тахса сырыттылар. Кинилэр маннык сырыылара үтүө үгэскэ кубулуйбутун ааҕаччыларбытыгар санатабын.
Уус-Алдан улууһа хайдах эрэ авиацияны кытта ордук чугас ситимнээх курдук. Ол арааһа, Дүпсүҥҥэ авиацияҕа уонна космонавтикаҕа аналлаах түмэл баарын кытта ситимнээҕэ буолуо.
Ол курдук, Боинг-737 сөмөлүөт хамандыыра, Саха сирин авиациятын бэтэрээнэ Алексей Дегтярев, сухой суперджет хамандыыра, эмиэ Саха сирин авиациятын бэтэрээнэ Сергей Ефимов, инженер-механик, авиация бэтэрээнэ Николай Копырин, авиацияҕа английскай тылы үөрэтэр Наталья Пермякова, Саха сирин авиациятын чинчийээччи Василий Гоголев, «Юнармия» регионнааҕы ыстаабын чилиэнэ Анна Филиппова састааптаах бөлөх улуус оскуолаларыгар сылдьан, үөрэнээччилэри кытта көрүстүлэр.
— Маннык десант тэрийэммит төрөөбүт-үөскээбит улууспут оҕолоругар, кэлэр кэскиллэрбитигэр идэҕэ туһаайыы үлэтин ыыппыппыт ыраатта. Дэриэбинэлэри барыларын хаба сатаатыбыт. Таарыйбатах сирбит диэн, түөрт бөһүөлэк хаалла. Эһиил олорго сылдьыахпыт диэн эрэллээхпит, — диэн кэпсээтэ Алексей Дегтярев.
Алексей Дегтярев Дүпсүннээҕи авиация уонна космонавтика түмэлигэр космонавтары бэлэмниир киинтэн аҕалбыт футболкалары бэлэх ууммут.
Быйыл бөлөх Чэриктэй, Дүпсүн, Өнөр уонна Мүрүтээҕи «Уолан» гимназия үөрэнээччилэрин кытта көрсүбүттэр. Үгүс оҕо ыра санаа оҥостор авиатор идэтигэр үгүс сүбэни-аманы биэрбиттэр, үөрэнээччилэр интэриэһиргиир ыйытыыларыгар хоруйдаабыттар.
Десаҥҥа өрүү кыттар авиатордар ордук үөрэллэрэ диэн, кинилэр ыытар үлэлэрэ түмүктээх буоларыттан. Ол курдук, бөлөх түөрт сыл аннараа өттүгэр Түүлээх орто оскуолатыгар сылдьыбыт. Онно биир кыысчаан уонна икки уол летчик буолуохтарын баҕаралларын биллэрбиттэрэ.
Ол кыысчаан Арияна Богдакумова Дьокуускайдааҕы авиационнай-техническай училищеҕа иккис курска үөрэнэ сылдьар. Хайы-үйэ үөрэтэр көтөр аал штурвалын бэйэтэ тутан-хабан мэҥэ халлааҥҥа көппүт, учууталларын хайҕалларын ылбыт видеотун көрөн, киэн туттаҕын. Оттон биир авиатор буолуон баҕалаах уол, авиатехник идэтигэр үөрэнэ киирбит. Салгыы да Уус-Алдантан авиацияҕа сыһыаннаах үлэһиттэр үүнэн тахса туралларыгар эрэниэҕиҥ.
Людмила НОГОВИЦЫНА
ПОДЕЛИТЬСЯ: