Сэрии дуораана

Кыайыы 80 сылын көрсө биир дойдулаахпыт, фотокорреспондент Еремей Никитич Порядин 100 сааһын көрсө Р.А.Бурнашов аатынан Табаҕа орто оскуолатын историятын музейын салайааччытын Парасковья Тихоновна Макаровалыын билистим. Чуолаан эттэххэ, фотокорреспондент Саха АССР Мэҥэ Хаҥалас оройуонугар Байкалов сопхуоска 1925 сыллаахха ыам ыйын 10 күнүгэр төрөөбүт.  

Парасковья Тихоновна, бу Еремей Никитич Порядин аатынан  музей хаһааҥҥыттан тэриллэн үлэлии турарый?

-2004 сыл муус устар 4 күнүттэн оскуолабыт музейа саҥаттан тэриллэн үлэлии турар. Инники салайааччынан Порядина Феврония Александровна үлэлээбитэ. Ол кэннэ мин ылан үлэлэтэ сылдьабын.

Музей үлэтин билиһиннэр

— Музей маҥнайгы салаата биир дойдулаахпыт, оскуола  40-с сыллаах выпускнига ССРС уонна СР журналистарын Союһун чилиэнэ, республикатааҕы Е.Ярославскай аатынан бириэмийэ лауреата, «Правда», «Саха сирэ» хаһыаттар фотокорреспонденнара Порядин Еремей Никитич үлэлэринэн аһыллыбыта. Кини түһэрбит хаартыскалара, фотоальбомнара, докуменнара араас идэлээх дьону кытта алтыспытын кэпсииллэр. Еремей Никитич бэйэтин олоҕо, үлэтэ үөрэнээччигэ  үтүө холобур буолар. Кини кыра эрдэҕиттэн ураты  талааннааҕа, дьоҕурдааҕа биллибитэ. Сэрии ыар-аччык сылларын туһунан «Хаартыска хоруола», «Саха сирин летописеһын» аатын ылыан ылбыта. Бэйэтэ Аҕа дойду сэриитин кыттыылааҕа, кини үлэлэригэр олоххо баар ураты көрүүнү, санааны киллэрбит. Бу салааҕа туруоруллубут истиэндэлэр Саха сирин араас идэлээх дьоннорун олохторун кэпсииллэр. Итини сэргэ, Еремей Никитич сэдэх талааннааҕа: скрипкаҕа, гитараҕа, мандалинаҕа үчүгэйдик оонньуура, уруһуйдуура, хайыһар спордунан сөбүлээн дьарыктанарын барытын бу хаартыскаларынан көрөбүт.

Музейга кини үлэлэрин хайдах быһыылаах туруораҕыт?

Музей бу салаатын тэрийиигэ Еремей Никитич огдообото Порядина Валентина Тихоновна экспонаттары биэрэн, көмөлөспүтэ. Экспонаттар маннык разделларынан туруоруллубуттара:

1. Еремей Никитич Порядин оҕо сааһа
2. «Кыым» хаһыат фотокорреспондена
3. «Дьокуускай киэргэйэр»
4. Ийэ-айылҕа дьиктилэрэ
5. Дьиэ кэргэттэрэ, табаарыстара
6. Сэрии ветераннара
7. Литература, искусство маастардара
8. Фотограф күннээҕи түбүгэ
9. Уруһуй абылаҥа-портреттара (киистэ маастара)
10. Наҕараадалар, кинигэлэр, фотокорреспондент бэйэтэ туттубут «Зенит-3» фотоаппарата тураллар.

         Ньургуйаана Скрябина