Хас биирдии киһи үөрэнэн, идэ ылан тахсыбыт кыһатын күндүтүк ахтар-саныыр буолуохтаах. Кэм-кэрдии баран истэҕин аайы ол санаа өссө күүһүрэн, өссө улахан махталынан, эдэр саас дьоллоох кэмнэрин тырымнас уоттарын ахтылҕанынан туолан иһэр.
Намнааҕы педучилищены 1976 сыллаахха бүтэрбит выпускниктар быйыл үөрэммит кыһаларыгар анаан икки дьоһун бэлэҕи утары ууннулар. Бастатан туран, ити 242 страницалаах, 1040 хаартыскалаах улахан альбом-кинигэ. Бу 65 киһи, преподавателлэр, выпускниктар уонна кинилэр дьиэ кэргэттэрин ахтыыларын түмпүт хомуурунньук, выпуск энциклопедията диэххэ сөп. Маннык кинигэ тахсыбыта, биллэн турар, үөрэх кыһатын, Намнааҕы педучилище историятын үөрэтиигэ, үтүө үгэстэрин үйэтитиигэ дьоһун, суолталаах кылаатынан буолар.
Онтон көмүс үбүлүөйдээх выпуск иккис бэлэҕэ, ойуулуур-дьүһүннүүр эйгэ үлэһиттэрин быһыытынан, көччөх гынан көтүппүт кыһаларыгар быыстапка тэрийбиттэрэ буолар. Бу И.Е. Винокуров аатынан Намнааҕы педколледж устудьуоннарыгар туһуланан, кэнчээри ыччаты үтүөҕэ, кэрэҕэ, айар үлэ абылаҥнаах аартыгар угуйар, үөрэнэр кыһаларынан киэн туттуу тыыныгар иитэр, уһуйар аналлаах тэрээһин буолар.
Үйэлээх өйдөбүнньүк
Ахтыы кинигэни оҥоруу ылбычча судургу дьыала буолбатах, суруйуу-бичийии, ону көннөрүү, тупсарыы эрэ буолбакка, элбэх тэрийэр, көрдүүр-ирдиир да үлэни эрэйэр уустук дьыала. Маны барытын иилээн-саҕалаан, төрдүн-төбөтүн булларан олоххо киллэрбит киһинэн Россия орто профессиональнай үөрэхтээһинин бочуоттаах үлэһитэ, СӨ культуратын туйгуна, архитектор, П.П. Романов аатынан Дьокуускайдааҕы художественнай училищеҕа преподавателлээбит үлэ бэтэрээнэ София Иннокентьевна Васильева буолар. Киниттэн кинигэ оҥоһуллуутун туһунан кэпсииригэр көрдөстүбүт.
– Намнааҕы педучилищены бүтэрбиппит 50 сылынан учууталларбытыгар уонна бииргэ үөрэммиттэрбитигэр анаан, түмсэн, күүспүтүн холбоон, уопсай сүбэнэн улахан өйдөбүнньүк кинигэ оҥордубут. Бу өйдөбүнньүк кинигэбитин үөрэппит учууталларбытыгар уонна бииргэ үөрэммит үөлээннээхтэрбитигэр аныыбыт.
Училищебыт аанын сабан тахсаат, үгүстэри кытта сибээспит быстыбыта. Ким ханна тиийэн, туох үлэһит буолбута биллибэт этэ. Арай билигин интернет, социальнай ситимнэр баар буолан, онон түргэнник бииргэ үөрэммиттэрбитин булаттаан, ахтыыларын хомуйан, кэмигэр бэчээккэ биэрэн, бу үлэбитин ситэрдибит. Кинигэ Намнааҕы педучилищены аҥардас 1976 сыллаахха бүтэрбит выпускниктар эрэ диэн буолбакка, бииргэ үөрэммиттэр диэн толкуйунан оҥоһулунна. Араас кыһалҕаттан, биричиинэлэринэн биһиги курстан быстан хаалбыттары, биһигини кытта ситэ үөрэммэтэх да буоллаллар, бииргэ алтыһан, биир уопсайга олорон, биир хааһыны сиэн, биир учууталларга үөрэнэн, бары бэйэ-бэйэбитигэр тугунан эрэ дьайсыһан, ситэрсэн-хоторсон, сайыннарсыбыт эдэр сааспыт табаарыстарын, барыларын бу кинигэҕэ түмтүбүт. Биһиги «А» курстартан төгүрүк тулаайах уолбутун Сергеев Максимы эрэ булбатахпыт хомолтолоох.
Билигин биһиги кэккэбитигэр суох дьоммут оннуларыгар оҕолоро ахтыы суруйан ыыппыттара.
Миэхэ ахтыы хомуйуутугар однокурсницаларым Христофорова Антонина Степановна, Бурнашева Ольга Ивановна уонна кийииппит Корнилова Прасковья Николаевна, Коркина Лия Захаровна, Прибылых Надежда Михайловна, Семенова Маргарита Прокопьевна, Орто Халыматтан биһиги иннинэ бүтэрбит Лаптева Евдокия Ивановна көмөлөстүлэр.
Бииргэ үөрэммиттэрбит бэйэлэрин дьиэтээҕи архыыптарыттан хаартыска бөҕөтүн ыытаннар, хаһан да көрбөтөх хаартыскаларбытын көрдүбүт. Биһиги үөрэнэрбит саҕана син балайда оҕо хаартыска түһэриитинэн дьарыктанара, ол курдук Турантаев Григорий Григорьевич, Корнилов Борис Егорович, Еремеев Калистрат Дмитриевич, Дунаев Александр Григорьевич уонна да атыттар хаартыскалара бу кинигэбитигэр киирдилэр.
Биһиги Намнааҕы педучилище 1976 сыллааҕы выпустара ураты улахан дьоллоох дьоммут. Ол курдук 50 сыл анараа өттүгэр биһигини үөрэппит дириҥник убаастыыр учууталбыт, группабыт куратора, салайааччыта, РСФСР үөрэҕириитин туйгуна, Саха Республикатын культураҕа, искусствоҕа, духовноска туйгуна Екатерина Павловна Павлова бу өйдөбүнньүк-кинигэбитигэр ахтыытын, алгыс хоһоонун суруйда.
Биһиги выпустар дьылҕабытыгар улаханнык махтанабыт: киэҥ билиилээх, үрдүк культуралаах, кэрэҕэ-сырдыкка сирдээбит учууталларга үөрэммит чахчы дьоллоох дьоммут! Үлэлэригэр сүрдээх бэриниилээх, талааннаах эдэр художник-учууталлар Екатерина Павловна уонна Федор Федорович Павловтар, Людмила Александровна Киргизова, Реворий Степанович Гаврильев, Василий Петрович Иванов, Егор Федорович Новиков, Николай Николаевич Попов, Марина Федоровна Новикова, Василий Семенович Дудко уонна Татьяна Николаевна Кожеурова спецпредметтэргэ уһуйбуттара.
Сахалыы таҥастары тигиигэ аатырбыт маастар Валентина Прокопьевна Азарова уонна киэҥ холку, элэккэй майгыннаах Раиса Николаевна Гаврильева кыргыттары домоводство уруоктарыгар иистэнэргэ уонна ас астыырга үөрэппиттэрэ. Пленэрдэргэ Өлүөхүмэҕэ, Аммаҕа учууталбыт Реворий Степанович Гаврильев илдьэ сылдьыбыта.
Наҕыл, холку Николай Ильич Бережнов педагогикаҕа уонна психологияҕа, сытыы-хотуу Николай Федорович Гурьев начальнай военнай подготовкаҕа, Илья Гаврильевич Лукин физикаҕа, Владимир Петрович Шапошников историяҕа үөрэппиттэрэ. Валентина Павловна Шапошникова уонна Ада Федоровна Местникова студеннарга педпрактиканы салайаллара. Бастаан үөрэххэ киирэрбит саҕана директордарынан Иван Семенович Гаврильев, онтон Иннокентий Романович Москвитин үлэлээбиттэрэ. Биһиги курс икки группанан үөрэммиппит. Классоводтарбыт Екатерина Павловна Павлова уонна Валентина Павловна Шапошникова биһигини, араас саастаах, араас интэриэстээх, көрүүлээх дьону, түмсүүлээх группа оҥорорго элбэх сыраларын биэрбиттэрэ. Элбэх, араас көрүҥнээх мероприятие бөҕөтүн тэрийэн ыыталлара. Ол барыта кэлин биһиги учууталлыырбытыгар оҕолору кытта үлэлиирбитигэр улахан холобур, үөрэх, көмө-тирэх буолбута, – диэн ахтар С.И. Васильева.
СӨ норуотун маастара Христофорова Антонина Степановна-Хагдаанай выпуск 50 сыллаах кыһыл көмүс юбилейыгар анаан тахсыбыт кинигэни хомуйан, тэрийэн, таҥан оҥорбут однокурсницатыгар София Васильеваҕа анаабыт хоһоонугар маннык строкалар бааллар:
Бу дьоһун, лис курдук кинигэ
Лиистэрин арыйан көрөбүн.
Иннибэр, остуолбар олордон
Кэпсэтэн барабын кинилиин.
Санаабар, хас биирдии лиистэрэ
Саҥарар курдуктар ыраахтан –
Ол онтон, эдэркээн саастартан
Эҕэрдэ ыытарга дылылар.
Ол онтон сааһырбыт сүрэхпэр
Сып-сылаас сүүрээннэр тыллаллар,
Дорообо, эдэр саас, дорообо!
Биһиги бу баарбыт, барыбыт,
Барбыттар кытары биир тэҥҥэ
Бу манна кэккэлээн турабыт,
Күлэбит-үөрэбит, оонньуубут…
Санаабар, кинигэ иһигэр
Күөҕүнэн чэлгийэр эдэр саас
Олохпут күһүнүн киэргэтэ
Ол кэмҥэ эргитэр курдук дии.
Кинигэ хас да экземплярын автор, хомуйан, тэрийэн таһаарааччы С.И. Васильева үөрүүлээх быһыыга-майгыга И.Е. Винокуров аатынан педколледж библиотекатыгар бэлэхтээтэ.
Таһаарыылаах үлэм – уһуйааччыларбар махталым
Бу кинигэни киһи, кырдьык, астынан, сэргээн туран көрөр, ааҕар. 1972-1976 сс. Намнааҕы педучилище художественнай-графическай салаатыгар үөрэммит хас биирдии киһи олоҕо, үлэтэ, дьиэ кэргэнэ, дьылҕатын суола-ииһэ эрэ буолбакка, олус истиҥ түгэннэр – суруктар, анабыл хоһооннор, устудьуон күннүгүттэн быһа тардыылар, доҕордуу шаржтар – орун-оннугар тутуллан, таҥыллан киллэриллибиттэр.
Дьэ, уонна 70-с сыллардааҕы урукку хаартыскалар ураты эйгэлэригэр киирэн, оччотооҕу устудьуон олоҕун, Советскай Армия кэккэтигэр сулууспа түгэннэрин көрөн-истэн сэргиигин.
Ойуулуур-дьүһүннүүр эйгэ үлэһиттэрэ, художниктар, скульптордар, архитектордар, норуот маастардарын, оҕолору, ыччаты кэрэ эйгэтигэр умсугутан үөрэтэр уһуйааччылар кинигэлэрэ буолан, араас кэрэ оҥоһуктар хаартыскаларын, интэриэһинэй этюдтар, эскизтэр, хартыыналар репродукцияларын көрөн астынаҕын, дуоһуйаҕын, билиигин-көрүүгүн хаҥатаҕын.
Кинигэ «Биһиги ситиһиилэрбит» («Наши достижения») диэн түһүмэҕинэн түмүктэнэр. Кинигэттэн көрдөххө, 50 сыл устата бу выпуск Сахабыт сирин культурата, искусствота, архитектурата, үөрэхтээһинэ сайдарыгар дьоһун кылааты киллэрэн, биллэр-көстөр суолу хаалларбыттар эбит!
Ол курдук, 1976 сыл выпускниктарын ортолоругар Россия художественнай академиятын член-корреспондена, СР народнай художнига Артур Васильев, Россия художественнай академиятын дипломана, билиилээх график- художник Алексей Евстафьев, художник Людмила Тартыева, Россия художниктарын творческай Союһун чилиэнэ, живописец, скульптор, фотограф Григорий Турантаев, Нерюнгри куоратын сахалыы тыыннаабыт норуот маастара, СӨ культуратын үтүөлээх үлэһитэ Борис Корнилов, норуот маастардара Антонина Христофорова, Реворий Зыков, Надежда Прибылых, СӨ үөрэҕириитин үтүөлээх үлэһиттэрэ Олег Арылахов, Василий Яковлев, Владимир Николаев, талааннах поэттар Калистрат Еремеев, Валерий Иннокентьев, Александр Дунаев бааллар эбит. Киһи үөрэрэ, хайҕыыра: манна үөрэммиттэр, бары да диэххэ сөп, Намнааҕы педучилищеҕа ылбыт идэлэриттэн халты хаампакка, культура, үөрэхтээһин эйгэтигэр айымньылаахтык үлэлээбиттэр, оҕону, ыччаты уһуйан, черчение, уруһуй, үлэ уруоктарын учууталларынан үлэлээбиттэр.
1976 выпуск «А» курсун салайааччыта, РСФСР үөрэҕириитин туйгуна Екатерина Павловна Павлова үөрэнээччилэрин туһунан маннык ахтар:
– Бу выпуспар бары да олус талааннаах, дьоҕурдаах, үрдүккэ, кэрэҕэ дьулуурдаах оҕолор түмсэн үөрэммиттэрэ. Студеннарбын, курсум оҕолорун бэйэм эдэр сааһым аргыстарын курдук куруук махтана санаан ахтабын. Бу оҕолорго классоводтуур кэммэр солбуллубат староста Турантаев Гриша көмө буолара, «комсомолка Мотя», оҕолору түмэр Петрова Мотя баара. Студеннарым бары да үөрэххэ, үлэҕэ, училище олоҕор, спорка активнай этилэр. Айар үлэнэн умсугуйан туран дьарыктанар студеннарым Алексей Евстафьев, Артур Васильев, Реворий Зыков дипломнай үлэлэринэн училищеларыгар улахан кылааты киллэрбиттэрэ. Ол курдук Реворий Зыков училище пааркатыгар мастан тыа харамайдарын оҥорбута дьикти кэрэ көстүү буолбута. Онтон Артур Васильев училище главнай корпуһун актовай саалатын биир эркинигэр толору улахан уруһуй оҥорбута. Онно культура, искусство эйгэтин көрдөрөр, үйэлээҕи айар араас элбэх образтар – үҥкүүһүттэр, ырыаһыттар, художниктар, скульптордар, архитектордар, мас уустара – ойууламмыттар этэ. Онно Артур бэйэтин мольбертаах художник быһыытынан уонна Соняны ньилбэгэр кумааҕы ууран уруһуйдуу олорор гына оҥорбут этэ. Оччолорго биһиги өссө билбэппит буоллаҕа дии, бу дьоммут таптал иэйиитигэр куустаран сылдьалларын. Онтон кэнники ыал буолбуттара, билигин бу тэрээһиннэри иилээн-саҕалаан тэрийэр дьиэ кэргэн буолаллар.
Аны 1975 сыл сайыныгар эмиэ бу курс оҕолорун кыттыыларынан, студент уолаттар саҥа библиотека дьиэтин тутуспуттара. Ол дьиэ тутуллан бүтэн, нөҥүө сылыгар онно художник Ефим Шапошников аатынан хартыына галереята аһыллыбыта.
Манна даҕатан эттэххэ, бу выпуск Нам педучилищетын историятыгар өссө биир улахан кылааттаах. Бу оҕолор үөрэнэр кэмнэригэр педучилище художественнай-графическай салаатын сабар туһунан боппуруос тура сылдьыбыта. Тоҕо эрэ оннук түбэһэн хаалбыта. Москваттан, Дьокуускайтан араас бэрэбиэркэ бөҕө кэлбитэ, учууталлар, преподавателлэр, студеннар ити сылларга туох баар кыахпытынан, кыһамньыбытынан үлэлээбиппит, художественнай-графическай салаабытын турууласпыппыт. Ити элбэх ахсааннаах араас таһымнаах бэрэбиэркэлиир хамыыһыйалар туох да сыыһаны, итэҕэһи булбакка, бу салааҕа эҥкилэ суох үөрэнэллэр, үлэлииллэр эбит диэн, бу отделениебыт сабыллыбатаҕа. Онон бу выпуһум итиннэ эмиэ биллэр-көстөр оруоллаах диэн тоһоҕолоон бэлиэтиэхпин баҕарабын.
Курс оҕолорун көхтөөх үлэтинэн, үөрэҕин билиитин таһымынан 1975 сыллаахха педучилищеҕа социалистическай куоталаһыы түмүгүнэн кыайыылаах тахсаммыт, «Ленские столбы» барар путевкаларынан наҕараадаламмыппыт. Бүтүн курсунан теплоходунан Өлүөнэ очуостарыгар күүлэйдээн, пленэрдээн кэлбиппит!
Кэнчээри ыччакка туһаайан
1976 сыллааҕы выпускниктар өссө биир дьоһун тэрээһиннэринэн культура, искусство киэҥ эйгэтигэр көччөх гынан көтүтэн таһаарбыт кыһаларыгар, И.Е. Винокуров аатынан Намнааҕы педколледж Ефим Шапошников аатынан хартыына галереятыгар быыстапка туруорбуттара буолар. Быыстапкаҕа 11 автор 48 үлэлэрэ – араас техниканан толоруллубут хартыыналар, норуот маастардарын оҥоһуктара, үөрэтэр-методическай пособиелар, кинигэлэр – туруорулуннулар. Сорох улахан, бөдөҥ экспонаттар слайдаларынан көрдөрүлүннүлэр.
Алтынньы 7 күнүгэр кинигэ сүрэхтэниитин уонна быыстапка аһыллыытын үөрүүлээх түһүлгэтэ буолла. Саамай үөрүүлээҕэ, долгутуулааҕа быыстапка аһыллыытыгар 50 сыл анараа өттүгэр 1976 сыллаах выпуһу үөрэппит дириҥник убаастыыр учууталлара, үлэ бэтэрээннэрэ Екатерина Павловна уонна Федор Федорович Павловтар, Реворий Степанович Гаврильев кыттыыны ылбыттара буолар. Итиэннэ педколледж студеннара, преподавателлэрэ, араас сыллар выпускниктара кэлбиттэрэ.
Онно педколледж дириэктэрэ, педнаука кандидата, СӨ үөрэҕириитин туйгуна Елена Вячеславовна Никитина:
– Кырдьык даҕаны, бу кыһыл көмүс выпуск! 1976 сыл выпускниктарын ортолоругар кыһыл көмүс медалынан наҕараадаламмыт, народнай художник Артур Васильев, Россия художественнай Академиятын дипломана, биллиилээх график-художник Алексей Евстафьев бааллар. Ити курдук Россия таһымыгар биллэр художник-выпускниктарбытынан киэн туттабыт, – диэн үөрэн-көтөн туран бэлиэтээбитэ уонна быыстапканы иилээн-саҕалаан тэрийбит выпускниктарга Махтал суруктары туттарбыта.
Екатерина Петровна Ширяева, СӨ культуратын туйгуна, СӨ Национальнай художественнай музейын Намнааҕы филиалын салайааччыта:
– Саха биллиилээх художнига Е.М. Шапошников аатынан хартыына галереятыгар быыстапкалар тиһигин быспакка тэриллэн ыытыллаллар: художниктар, преподавателлэр юбилейдарыгар, биирдиилээн да, бөлөҕүнэн да быыстапкалар буолаллар. Быйыл төгүрүччү үбүлүөйдээх сыл: Е.М. Шапошников төрөөбүтэ 100 сылын, хартыына галереята тэриллибитэ 50 сылын туолла. Бу кэрэ-бэлиэ сылга маннык хабааннаах, выпуһунан быыстапка аан бастакынан тэриллибитэ өссө улахан суолталаах. НПУ 1976 сыллааҕы выпускниктара суолу тэлээччилэринэн буоллулар. Быыстапка баай ис хоһоонноох, студеннарга олус туһалаах. Манна оҕолор уруһуй, иис араас техникаларын кытта билсиэхтэрин сөп. Холобур, Артур Дмитриевич Васильев сүрдээх уустук, лессировка ньыматынан оҥорбут хартыыналара бааллар. Алексей Егорович Евстафьев саха атын, кулунчуктары ойуулаан, киэҥ эйгэҕэ биллибит художник буолар. Кинилэр үрдүк таһымнаах үлэлэрин көрөн студеннар элбэххэ үөрэниэхтэрэ. Бу быыстапка студеннарбытыгар, атын да выпускниктарбытыгар уруок, туһалаах үөрүйэх, трамплин, үөһээ дьулуһар суолдьут буолуоҕа.
Намнааҕы педколледж 1 курсун студеннара Екатерина Сотникова, Айыына Суханова, Иванна Гуляева:
– Биһиги быыстапканы умсугуйан туран көрдүбүт. Өссө да сиһилии көрүөхпүт-истиэхпит. Саамай сэргии, астына көрбүт үлэлэрбит София Васильева быысапканан хартыыналара уонна Борис Корнилов «Рождение Вселенной» диэн хартыыната.
Дьиэ кэргэн сылаас эйгэтэ
Корниловтар дьиэ кэргэннэрэ
СӨ культуратын үтүөлээх үлэһитэ, Нерюнгри куорат бастакы тутааччыта, норуот маастара, педагогическай үлэ бэтэрээнэ Борис Егорович Корнилов быыстапкаҕа кыттыбыта модун санаа холобурунан буолар. Кини ыарахан ыарыыга ыалдьан, инбэлиит кэлээскэтинэн да сылдьар буоллар, үөрэммит кыһатыгар махталын, бииргэ үөрэммит доҕотторун кытта сомоҕолоһуу бэлиэтигэр быыстапка аһыллыытыгар кэлэн кыттыыны ылла. Кинини кэргэнэ Прасковья Николаевна Корнилова уонна уола Эргис арыаллаан аҕалбыттар. Борис Корнилов педагогическай үлэтин таһынан айар үлэнэн утумнаахтык дьарыктаммыта. Кини Нерюнгри куораты сахалыы тыыннаан тутарга улахан өҥөтүн киллэрбит киһи, Саха сирин улуустарынан элбэх пааматынньыктары, куораттарга, бөһүөлэктэргэ киирии бэлиэлэрин оҥорбута. 90-с сылларга тэриллибит «Саха Таас» хампаанньа төрүттээччитигэр, сиэн балтыгар Изабелла Солтыска көмөлөһөн, фирма ураты суолун-ииһин буларыгар көмөлөһөн, художник быһыытынан үлэлээбитэ. Ол үлэлэриттэн сороҕун бу быыстапкаҕа туруорда. Итиэннэ Б.Е. Корнилов туоһунан аппликация ньыматынан Кулаковскай, Ойуунускай мэтириэттэрин оҥорбут хартыыналара быыстапка кыттыылаахтарын болҕомтотун тартылар.
–90-с сылларга мин Уус Алдаҥҥа баран, туоһунан иискэ үөрэммитим. Онтон сиэттэрэн, Борис туос хомуйан, туоһунан Ойуунускай, Кулаковскай, Максим Аммосов уонна Манчаары мэтириэттэрин оҥорбута. Ол хартыыналара барыта улуустарынан тарҕаммыттара. Бу кэлин Кулаковскайы өксөкү кыыл курдук көрдөрөн, «Ойуун түүлэ» диэн поэматыгар дьүөрэлээн оҥорбут үлэтэ, – диэн кэпсээбитэ ити үлэлэр туһунан кэргэнэ Прасковья Корнилова.
Художник Алексей Евстафьев бииргэ төрөөбүттэрэ уонна кинигэ ааптара С.И. Васильева
Быыстапка 1976 сыллааҕы выпускниктары эрэ буолбакка, кинилэр дьиэ кэргэттэрин түмпүт истиҥ-иһирэх түһүлгэнэн буолбута. Ол курдук биллиилээх график-художник Алексей Егорович Евстафьев (1955-2014) бииргэ төрөөбүттэрэ кэлэн кыттыыны ылбыттара эмиэ биир долгутуулаах түгэнинэн буолбута.
Васильева С.И., Гаврильев Р.С., Турантаев Г.Г., Ф.Ф. уонна Е.П. Павловтар, Корнилов Б.Е., Хрирстофорова А.С., Бурнашова О.И., Корнилова П.Н., Васильев А.Д.
Айар суолбутун буларга сирдээбитэ
Норуот маастардарын Надежда Прибылых сиэлтэн оҥоһуктара, Антонина Христофорова аҕыйах ахсааннаах хотугу омуктар национальнай таҥастарын комплектара быыстапканы ураты тыыннаатылар. Маннык үлэлэр Сахабыт сирин норуоттарын культуратын уонна түҥ былыргы үгэстэрин харыстаан сылдьар омуктары аар-саарга аатырдаллар.
Антонина Степановна Христофорова, норуот маастара, аҕыйах ахсааннаах хотугу омуктар ассоциацияларын бырабылыанньатын чилиэнэ, «Аборигенка» аҕыйах ахсааннаах хотугу омуктар дьахталларын общественнай тэрилтэтин солбуйааччы председателэ:
– Кинигэни бэчээккэ бэлэмнээбит, быыстапканы тэрийэргэ көҕүлээбит однокурсницабар София Иннокентьевнаҕа барыбыт аатыттан махталбытын тиэрдэбин. Биһиги билигин үксүбүт бочуоттаах сынньалаҥҥа да олордорбут, общественнай үлэнэн дьарыктанабыт, культура, искусство сайдарыгар кылааппытын киллэрэбит. Национальнай таҥаһы тигиинэн дьарыктаныы, бастатан туран, көрдүүр-чинчийэр хабааннаах үлэ. Онон иистэнэрим, уһанарым таһынан үс методическай пособие ааптарабын. Төрүттэрбит иистэнэр ньымаларын харыстаан, онно саҥаны киллэрэн, культурабытын, норуоппут үгэстэрин кэнчээри ыччакка тиэрдиэхтээхпит. Олоххо бэйэм суолбун булунарбар идэ биэрэн төһүү күүс буолбут тапталлаах училищебар махталым муҥура суох, училищетааҕы сылларым мэлдьи өйбөр-сүрэхпэр бааллар. Намнааҕы педагогическай училищебыт художественнай-графическай салаатын 60 сыллаах үбүлүөйүнэн бары онно үөрэммиттэри, үлэлээбиттэри, билигин үлэлии, саҥа үйэҕэ үүнэ-сайда турар кэлэктииби барыгытын ис сүрэхтэн эҕэрдэлиибин!
Бэлэмнээтэ Лира ЯКОВЛЕВА.
ПОДЕЛИТЬСЯ: