«Амарах хаһыакка-амарах сурутуу» хаһыаппыт акция-эстафетата көхтөөхтүк бара турар. Бу акция-эстафетабытын «Вива-тур» фирма үлэһиттэрэ өйөөтүлэр.
Сахабыт сиригэр «Вива-тур» туризмынан дьарыктанар фирма туһунан билбэт киһи, арааһа, ахсааннааҕа буолуо. Бу тэрилтэни эдэр, эрчимнээх Иван Чирков саталлаахтык салайан үлэлэтэр. Кини хас да омук тылын билэр буолан, кэпсэтэн-ипсэтэн, туристарыгар анаан хатыламмат турдары тэрийэр. Аны бу турдарга туристары көрдөөх-нардаах, олоххо мындыр көрүүлэрдээх блогер Клим Федоров салайан илдьэ сылдьар.
«Вива-турдар» улуу Кытайга айар дьону, кэлэктииптэри түмэн фестиваллары үрдүк таһымҥа тэрийэн ыыталларын, бөдөҥ судаарыстыбалар икки ардыларыгар доҕордоһуу сыһыаны бөҕөргөтүүгэ үлэлэһэллэрин бэлиэтээн ааһар хайаан да наадалаах дии саныыбын. Ол курдук, соторутааҕыта Кытай Янцзы уонна Чжанцзяцзе куораттарыгар фестиваллар буолбуттара. Аҥаардас Чжанцзяцзе куоракка ыытыллыбыт «Золотой путь» фестивалга 200 айар куттаах дьон Кытайтан, Санкт-Петербургтан, Саха сириттэн, Тываттан, Бурятияттан, о.д.а. сирдэртэн кыттыыны ылбыттара. Атын омугу кытта күрэстэһии диэн олох туспа турук буоллаҕа. Инникитин үүнүүгэ-сайдыыга аартык тэлэччи арылларыгар кыах үөскүүр. Фестивалы норуоттар доҕордоһууларын бырааһынньыга диэн ааттыахха эмиэ сөп. Кыттааччылар фестивалы таһынан Кытай кэрэ-бэлиэ миэстэлэрин көрөннөр, төһөлөөх дуоһуйаллара-астыналлара буолуой?
Турфирма ыам ыйыгар Гуанчжоу, бэс ыйыгар Далянь, Токио куораттарга, от ыйыгар муора устун круизка уонна балаҕан ыйыгар Бэйдайхэҕэ фестиваль ыытар былааннаах. Манна үҥкүүлүүр, ыллыыр, хомустуур айар куттаах биирдиилээн дьон, ансамбллар кыттыыны ылыаххытын сөп.
Кистэл буолбатах, билиҥҥи олохпутугар-дьаһахпытыгар аҕам саастаах дьонтон тэйэ туттуу баар. «Вива-тур» фирма өссө биир уратытынан ытык дьоммутун, бэтэрээннэри ыраах айаҥҥа илдьэ сылдьан, араас дойдулары көрдөрөн, аралдьытан, үйэлэрин уһаталлара буолар. Олус хайҕаллаах дьыала. Ол курдук, фирма эйэлээх кэллэктиибэ Улуу Кыайыы бырааһынньыгын көрсө «Забота-Арчы» амарах хаһыакка сыл иккис аҥаарыгар биэс бэтэрээн-туристарыгар сурутан, бэлэх уунна. Аҕам саастаах дьоммут ити үтүө сураҕы истэн олус диэн үөрдүлэр, «Вива-турдарга» махталларын тиэриэртилэр. Ити бэлэх туппут туристартан саамай аҕа саастаахтара 95 саастаах Анна Евсеевна Ушницкая буолар. Ытык киһи Москва-Санкт-Петербург турга сылдьан, киһи ис кыаҕа муҥура суоҕун көрдөрбүтэ.
Людмила НОГОВИЦЫНА
ПОДЕЛИТЬСЯ: