Кулун тутар 7-8 күннэригэр «Өрөгөй» күрэс уораҕайыгар ССРС спордун үтүөлээх маастара, Сэбиэскэй Сойуус уонна Арассыыйа үтүөлээх тренерэ, олимпийскай чемпион Роман Михайлович Дмитриев сырдык аатыгар 2006-2008 сс. төрөөбүт уолаттарга көҥүл тустууга норуоттар икки ардыларынааҕы XII күрэхтэһии ыытыллар.
Сылын аайы үгэс быһыытынан тэриллэр күрэхтэһиигэ уонча дойдуга уонна Россия регионнарыгар ыҥырыылар ыытыллыбыттар.
Хаһан баҕарар буоларыныы, биһигиттэн бэйэбит эдэр бөҕөстөрбүт ыйааһын ахсын хото кыттыахтара. Кинилэр билигин, бэйэлэрин дьиэлэригэр ситиһиилээхтик кыттар инниттэн анал бэлэмнэниини бара сылдьаллар.
Тосхол быһыытынан, күрэхтэһии бастакы күнүгэр Комсомольскай болуоссакка Роман Дмитриев пааматынньыгар сибэкки дьөрбөтүн ууруу сиэрэ-туома, оттон өрөбүл күн Олимпийскай эрэл училищетыгар Саха Республикатын уонна Арассыыйа үтүөлээх тренерэ Иван Николаевич Сивцев мемориальнай дуоскатын аһыы түгэнэ буолуохтара.
Онон бу өрөбүл күннэргэ бастакы олимпийскай чемпиоммут кэриэһигэр күрэхтэһиини күүтэбит. Тэрийээччилэр биллэрбиттэринэн, күрэхтэһиигэ киирии – босхо. Ону тэҥэ «Саха» национальнай көрдөрөр-иһитиннэрэр хампаанньа кулун тутар 7 уонна 8 күннэригэр Роман Дмитриев түһүлгэтиттэн хапсыһыылары “күөх экранынан” быһа көрдөрүөҕэ.
Петр ПАВЛОВ.
ПОДЕЛИТЬСЯ: