Тохсунньу 31 уонна олунньу 1 күннэригэр, Нам улууһун Хамаҕатта нэһилиэгэр волейболга Xll төгүлүн республика улахан нэһилиэктэрин икки ардыларыгар ыытыллар турнира буолан ааста.
Барыта 17 хамаанда (кыргыттар 9 уонна уолаттар 8 хамаандалара) кытынна.
Спортсменнары Саха Өрөспүүбүлүкэтин волейболга федерациятын салайааччыта, Ил Түмэн депутата В.И. Чичигинаров, Нам улууһун волейболга федерациятын салайааччыта, Нам улууһун баһылыгын солбуйааччыта Ф.В. Николаев, «Хамаҕатта нэһилиэгэ» тыа сирин түөлбэтин баһылыга Е.В. Ушницкай, Нам улууһун физическэй култуураҕа уонна спорка управлениятын начальнига П.Г. Иванов уонна күрэхтэһии сүрүн судьуйата Я.С. Сивцев эҕэрдэлээтилэр.
Икки күннээх быһаарсыылаах күрэхтэһии кэнниттэн, кыргыттарга бастакы миэстэни Мэҥэ-Хаҥалас улууһун Майа сэлиэнньэтин хамаандата ылан, кыайыылааҕынан таҕыста. Иккис миэстэни Дьокуускай куорат таһынааҕы Хатас бөһүөлэгин хамаандата ыллылар. Үһүс быһаарыылаах миэстэҕэ Нам улууһун «Ленскэй нэһилиэгин» хамаанда тигистэ.
Уолаттарга – Нам улууһун Хамаҕатта нэһилиэгин хамаандата кыайыылааҕынан таҕыста. Иккис миэстэҕэ эмиэ куорат таһынааҕы Хатас хамаандата таҕыста уонна үһүс миэстэни Амма улууһун Абаҕа нэһилиэгин хамаандата ылла.
Күрэхтэһии түмүгүнэн бастыҥ оонньооччулар: Дария Апросимова (Майа), Светлана Шишигина (Хатас), Алика Иванова (Ленскэй), Евгения Дегтярева (Бороҕон), Дмитрий Федоров (Хамаҕатта), Игорь Таркаев (Хатас), Ратмир Сивцев (Абаҕа) уо.д.а. анал бириистэринэн наҕараадаланнылар.
Аны кэлэр өрөбүллэргэ кыра нэһилиэктэр күрэхтэһиилэрэ Горнай улууһугар ыытыллыахтара.
Анатолий СОФРОНОВ — Онтуон.
Нам.
ПОДЕЛИТЬСЯ: