Биирдэ эдэр кэргэнниилэр ийэлээх аҕаларын кытары оҕолорун ханнык оскуолаҕа үөрэттэрэ биэрэллэрин туһунан мөккүспүттэр. Эдэрдэр олох нууччалыы, английскайдыы эрэ хайысхалаах оскуолаҕа биэрэбит диэбиттэрин төрөппүттэрэ сөбүлээбэтэхтэр. Саха оҕотун сахалыы үөрэтиэхтээх диэн эдэр ыалга өйдөтө сатаабыттар. Хас эмэ күн айдаарсыбыттарын кэннэ киэһэ аһыы олорон тоҥхойо кырдьыбыт эбэлэрэ айаҕа аһыллан маннык кэпсээннээх буолбут : «Биир көрүөхтэн эрэ көнө дьылыгырас уҥуохтаах мас үүнэн турбут. Кини аттынааҕы мастары көрө- көрө «мин куһаҕан баҕайы мастар ортолоругар үүнэ турабын» диэн иһигэр саныыр буолбут. Бу манна мин тоҕо хам хараҕаланан туруохтаахпыный? Миигин манна туох тутарый? Хап- хара, куп- куһаҕан силис эрэ тутан турар. Билигин ол силиспин турута тыытан быраҕан баран атын үтүө дойдуларга, кэрэ мастар быыстарыгар туруом, сылдьыам, көҥүл буолуом дии санаабыт. Эппитин толорон силиһин турута тыытан быраҕан кэбиспит уонна баҕалаах дойдуларын кэрийэ көппүт. Силиһэ суох уһуо баара дуо? Сотору буолаат кууран- хатан баран өлбүт, ким да сэҥээрбэт эмэх маһыгар кубулуйбут». Аһыы олорор дьон өйдөөбөтөхтүү бэйэ- бэйэлэрин саҥата суох көрсөн кэбиспиттэр, онтон эмээхсиннэрэ аа-дьуо туран хоһун диэки таҥкычахтыы турбут.
Киһи курдук ытыыллар…
Сахаларга сылгы сүөһүнү өрө тутан ынах сүөһүнү атарахсыта санааһын ардыгар баар буолар. Ол итэҕэлбитин кытары сыһыаннаах Уордаах Дьөһөгөй диэн сылгы таҥаратын кытары сибээстээҕэ биллэр. Онтон мин былыргыттан алааһынан олорбут саха ыалыгар, хотоҥҥо турар сүөһү курдук киһиэхэ чугас доҕор тэҥэ буолбут ынахтары сылгыттан намыһахтар дии санаабаппын. Икки Атахха уйгулаах олоҕу түстүүр ынах сүөһү өйүнэн- санаатынан да сылгыттан итэҕэһэ суох. Бу ыарахан айылҕалаах дойдуга, кыыдааннаах кыһыҥҥа саха омук үрүҥ тыынын өллөйдөөбүт, хара тыынын харыһыйбыт ынах сүөһүбүт буолар. Этэ-аһа, үүтэ- сүөгэйэ диэн этэ да барыллыбат уйгу- быйаҥ буоллаҕа. Ону таһынан тоһуттар тымныыга балаҕаннаах хотон силлиһэ турдахтарына, сылаас тыынынан угуттаабыт эмиэ кини буолар. Ынахтар – олус өйдөөх сүөһүлэр. Онно мин биир түгэни ахтан ааһыахпын баҕарабын. Кыра эрдэхпиттэн кэтэх сүөһүлэрбититтэн, онтон кэлин ыанньыксыттыы да сылдьан көрдөххө, аҕыйах хонугунан идэһэ буолуохтаах ынах сүөһү аһаабат буолар эбит этэ. Аһаабакка, уулаабакка төбөтүн долборукка анньан баран саҥата суох икки хараҕын уута сүүрэн ытыы турар буолааччы. Оо, уопсай да, кэтэх да сүөһү көрөөччүлэргэ онтон ордук хараастыылаах ыарахан түгэн, хартыына суох буоллаҕа! Сылы быһа көрбүт сүөһүҥ өлөрүн билэн киһи курдук ытыы турарыттан киһи бэйэтэ уйадыйан барара. Дьиэҕэ дьон икки ардыгар кэпсэтиини хантан билэн итинник хараасталлара буолла диэн санаа билигин да миигин үүйэ тутар. Оччоҕо ыанньыксыттыы сылдьан көрбүт ынахтарым илэ бэйэлэрин санаан кэлэбин, ардыгар түүлбэр киирэллэриттэн үөрэн уһуктабын.
ЛОГЛО
ПОДЕЛИТЬСЯ: