Климент ИВАНОВ, биллэр уопсастыбаннай-политическай деятель, Саха Өрөспүүбүлүкэтин Бочуоттаах олохтооҕо:
— Суруналыыстыка, пресса оруола хайа да кэмҥэ намтаабат. Уустук, быыһык уларыйыылаах-тэлэрийиилээх кэмнэргэ хаһыат суолтата өссө улаатан биэрэр. Дьон-сэргэ, норуот өйүн-санаатын уларытыыга хаһыаттар, пресса оруоллара олус улахан. Итилэри таһынан тыл күүһэ диэн баар — сүдү күүс.
«Айыы киһитэ аһыныгас, күн киһитэ көмүскэс» диэн өбүгэ саҕаттан илдьэ кэлбит этиилээхпит. Дьэ, «Забота-Арчы» амарах хаһыат норуот быһыытынан бу уратыбытын көрдөрөр, билиҥҥи уустук кэмҥэ саамай дьоҥҥо-сэргэҕэ наадалаах хаһыатынан буолар диэтэхпинэ, сыыстарбатым буолуо. Арааһа маннык социальнай хайысхалаах хаһыат атын регионнарга суох буолуохтаах.
Сэбиэскэй кэми өйдүүр буолуохтааххыт. Хаһыакка уонна сурунаалга, бэчээт таһаарыыларыгар ыаллар күрэхтэһэ-күрэхтэһэ суруталлара. Итини тэҥэ дойдуга уопсастыба өйө-санаата үүммүтэ-сайдыбыта.
Биллэрин курдук, анал байыаннай дьайыы буола турар, информационнай сэрии уҕараабат. Дойдубутугар арҕаа судаарыстыбалар санкциялары биллэрэннэр, бары өттүнэн уустук кэмҥэ кэлэн олоробут. Маннык кэмҥэ Саха сирин олохтоохторо сөбүлээн ааҕар «Забота-Арчы» амарах, социальнай хаһыаты өрөспүүбүлүкэ үрдүкү салалтата бары өттүнэн өйүөҕэр эрэнэбин.
ПОДЕЛИТЬСЯ: