Оҕолору октябренокка ылаллар диэни истэн, оҕо, эдэр сааспын санаан, интэриэһиргээн бара сырыттым.
КПРФ дьиэтин актовай саалатыгар киһи толору. Ол турдахпына горн тыаһатан, барабаан охсон, речевка ааҕан дьиҥнээх пионерскай этэрээт тахсан кэллэ. Уруккуттан туоҕа да уларыйбатах, инньэ гынан оҕо сааспар төннөн ыллым, сүрдээҕин астынным.
Хомосмуол төрөөбүт күнүгэр 26 №-дээх оскуола үөрэнээччилэрин октябренокка ыллылар, оҕолор барахсаттар олус долгуйдулар, бэл кыратык ытамньыйан ылааччы кытта баар. Кинилэргэ аҕа табаарыстар Ленин төбөлөөх значоктары ииллилэр, кыра бэлэх туттардылар. Бу 26 №-дээх оскуола пионерияҕа уонна хомсомуолга аналлаах музейдаах, онно пионер, хомсомуол устуоруйатын үөрэтэллэр эбит. Олус махталлаах дьыаланан дьарыктанар учууталлары көрсөн, кэпсэтэн, кинилэр үлэлэрин сырдатыах буоллубут.
Биһиги бэйэбит “Забота-Арчы” хаһыаппыт сүрүннээн ССРС-ка төрөөбүт, үөрэммит, үлэлээбит дьон сурутар. Онон алтынньы 29 күнүттэн саҕалаан, сэтинньи устата биһиги хаһыаппытыгар “Рожденные в СССР” диэн сурутуу акциата саҕаланна. Хаһыакка суруттарыҥ, биһигинниин бииргэ буолуҥ!
Тэрээһин буола турдаҕына идеологияҕа КПРФ Саха сиринээҕи рескомун сэкирэтээрин, СӨ норуодунай дьокутаатын Иннокентий Романовы көрсөн кэпсэттим.
— Хомсомуол төрүттэммит күнүн дойду үрдүнэн бары көлүөнэ дьон бэлиэтииллэр, — диир Иннокентий Иванович. — Оҕолору октябренокка, пионерга ылаллар, хомсомуоллар үлэлэрин түмүгүн таһаараллар, салгыы тугу гыналларын былаанныыллар. Оттон биһиэхэ бүгүн ЫБСЛКС төрүттэммитэ 107 сыллаах үөрүүлээх тэрээһинигэр октябреноктар, Валя Котик аатынан пионерскай этэрээт, хомсомуолар, төрөппүттэр, хомуньуустар кытыннылар. Ол курдук Дьокуускайдааҕы 26 №-дээх оскуола 20-тэн тахса үөрэнээччитин октябренокка ыллыбыт.
Хомсомуол күнэ олус улахан суолталаах, биһиги дойдубутугар кини аатын кытта сүҥкэннээх ситиһиилэр сибээстээхтэр, ол курдук дьоруойдуу Аҕа дойду Улуу сэриитигэр кыттыбыттара, улуу тутууларга үлэлээбиттэрэ, улаатан эрэр ыччаты иитиигэ кыттыбыттара.
Хомсомуол билигин да оруола сүҥкэн улахан, кини РФ Хомуньуус баартыйатын эрэллээх көмөлөһөөччүтэ, резервэтэ буолар. Өссө төгүл барыгытын бу бэртээхэй бырааһынньыгынан эҕэрдэлиибин, чэгиэн доруобуйаны, ситиһиилэри баҕарабыт.
Бу күн барыбытыгар улахан үөрүүлээх да, долгутуулаах да, бары Союз кэмигэр төрөөбүт дьон буоллахпыт. Оннук буола да туруоҕа. Оттон мин бу оҕолор долгуйалларын көрөн, кинилэрдиин октябренок, пионер сааспар төннүһэн, бииргэ үөрэн-көтөн ылбыппар олуһун диэн махтанным.
Виктор Эверстов
ПОДЕЛИТЬСЯ: