Сайсаар
Сэбиэскэй саҕана Дьокуускай куоракка Сайсаар диэн сахалар түөлбэлээн олорор оройуоннара этэ дииллэр. Ол курдук улахан үбэ-харчыта суох дьон мустан олорор түөлбэтин курдук этэ. Ардах кэнниттэн куруук дэриэбинэм суолуттан улахан уратыта суох курдук онно бырыы да бадараан буолааччы. Оччотооҕу олохтоохтор этэллэринэн, куорат киинин, аэропорт таһын курдук оччолорго Сайсаарга улахан тутуу да барбат эбит. Биһиэхэ, тыаттан киирбит устудьуоннарга, Сайсаар диэн күлүгээттэр, арыгыһыттар олороллорун курдук өйдөбүл баарын өйдүүбүн. Туох кистэлэ кэлиэй, оччотооҕу устудьуоннартан үгүс киһи итинник санааны элбэхтэ иһиттэхпит. Оччотооҕу Сайсаар ыччаттара билигин бэйэлэрэ кэпсииллэринэн, Сайсаарга куорат киинин оскуолаларын оҕолоро анаан охсуһа кэлэллэрэ үһү. Билиҥҥи курдук хас муннук аайы тренажернай, физзааллар суохтара да онно биир олук буолан эрдэҕэ. Саҥа ситэн, улаатан эрэр уолаттар быыппастар быччыҥнарынан оонньооһуннара сэрэхтээх дьыала. Ону билигин номнуо история тумарыгар хаалбыт 1979,1986 сыллардаахха ыччат ортотугар буолбут сабыытыйалар кэрэһэлииллэр. Олох диэн олох. Кэм- кэрдии бэйэтэ туспа тыыннаах, ирдэбиллээх, сокуоннаах буоллаҕа. Билигин Сайсаар уокуруга аныгылыы тутууларынан дьэндэйбит, куорат биир саамай кэрэ көстүүлээх, сайдарга инникилээх уокуруга. Өйдөөн көрдөххө кырдьык да, бары ытыктыыр эбэбит Сайсары күөлбүтүн тула олохтоохтор сайдар кэскилбит дьиэлэрэ дьэндэһэллэр. Ол курдук улуу олимпиецтарбытын уруйдуур «Өрөгөй» успуорт комплекстара, талааннаах оҕолорбут үөрэнэр республиканскай лицейдэрэ, тутулла турар «Олоҥхолэнд», саха омук хороҕор муостааҕы, сыспай сиэллээҕи иитэргэ үйэттэн үйэҕэ илдьэ кэлбит кистэлэҥнэрин үөрэтэр Арктическай технологическай университет, олохтоохтор уонна ыалдьыттар доруобуйаларын көрөр-истэр мэдиссиинискэй киин уо.д.а. Онон саханы саха дэтэр Сайсары эбэбит куруук баар буоллун!
Ырыынак «ытырсыыта»
Бу сыл от ыйын бүтүүтүгэр айанньыттары Өлүөнэ эбэ нөҥүө туоратар тэрилтэлэр икки ардыларыгар харчыттан сылтаан «ытырсыы» буолла. Ол курдук урут-уруккуттан «Ленаводсервис» диэн тэрилтэ суос-соҕотоҕун «бөө» диэн хаһаайыннаан, өрүһү туоруур кыһалҕалаахтартан 1000 солкуобайы соролуу олорбутун бары билэбит. Онуоха «Сулус» диэн ырыынак бу хайысхатыгар саҥа лицензия ылбыт тэрилтэ сыананы түһэрэннэр айдаарсыы буола сырытта. Биллэн турар, ырыынак сокуонунан ким чэпчэки сыаналаахха дьон-сэргэ үөрэ-көтө олорсоро — олох сокуона буоллаҕа. Онуоха үйэ тухары бу ырыынакка соҕотоҕун айбардаан сыананы 1000 солк. диэн быһа олорбут катердаахтар, биллэн турар, саҥа лицензиялаахтары туоратаары зҥин араас албаһы туттубуттарын туһунан бассаап толору буолла. Ырыынак сокуонунан конкуренция бу хайысхаҕа дьону тиэйэр-таһар үлэлэргэ киирбитэ, айанньыттарга барыстаах буолара кимиэхэ барытыгар өйдөнөр. Бу дьыала дириҥээбэккэ тутатына быһаарылларыгар Ил Түмэн дьокутааттара, СӨ тырааныспарга уонна суол хаһаайыстыбатыгар министиэристибэтэ, Мэҥэ улууһун дьаһалтата уо.д.а. дьыала сокуон хараҕынан быһаарылларыгар күүс-көмө буоллулар. Онон ити «Ленаводсервис» уонна «Сулус» тэрилтэ катердара этэҥҥэ үлэлээн дьону тиэйэр-таһар үлэлэрин салгыыллар.
Логло
ПОДЕЛИТЬСЯ: