Сүрэхпитигэр чугастар
Дьокуускайга аэропортан кэлэн эбэтэр баран истэххэ, Дзержинскэй уулуссатыгар кырдьаҕас, харааран хаалбыт хатыҥнар үүнэн тураллар. Сиртэн халлааҥҥа наһаа өрө харбаһан үүммэтэх эрээри бэйэлэрин холлоругар лабаалара балай эмэ элбэх, оннук токуруччу — бакырыччы үүммэтэхтэриттэн киһи соһуйар. Куорат биир саамай улахан, киин Дзержинскэй уулуссата кыһын буоллун, сайын буоллун, түүн буоллун, күнүс буоллун бу саамай сырыылаах, массыыналар тохтоло суох субуллар уулуссалара. Бу үлүгэрдээх тыаска- ууска, кэлиигэ-барыыга үүнэн турар хатыҥнар барахсаттары дэлби хараарбыттарыттан бастаан киһи аһына көрөр. Онтон кинилэр дьоһун, кыраттан сынтарыйбат, ымыттыбат сэбэрэлэрин сыныйан көрөн баран тоҕо эрэ ис — искиттэн ытыгылыы саныыгын. Бу үлүгэрдээх кэлиилээх-барыылаах, биир кэм өрө күпсүйэ олорор тыастаах-уустаах айан аартыгар турар барахсаттар, аныгы куорат быылын-буорун, сырылас сырыытын, сытын- сымарын, дьаарын барытын уйан турдахтара. Кинилэр баар буоланнар биһиги кинилэр намчы лабааларынан суугунуулларын истэн астынабыт, ахтылҕаннаах алаастарбытын санаан манньыйабыт, куйаас күн кинилэр халыҥ күлүктэригэр киирэн харысхаллаах курдук сананабыт, тымныы, тыаллыын уордаах күн көмүскэллээх курдук туттабыт. Дьокуускай сайынын быылга-буорга, сылы эргитэ бэнзиин сытыгар чачайбыт отторо-мастара, чэчиктэрэ барыта сүрэхпитигэр- быарбытыгар ол да иһин олус чугастар, бэйэбит куппутугар-сүрбүтүгэр барсаллар.
«Ыарахан кэм күүстээх дьону үөскэтэр»
Аан дойдуга баайынан аатырар Дубай куоратын тойоно эппит: «Мин эһэм бөрбөлүүтүнэн айанныыр этэ. Мин билигин сыаналаах массыынанан айанныыбын. Мин уолум эмиэ оннук сылдьыа. Онтон мин хос сиэним бөрбөлүүтүнэн айанныа». Тоҕо инньэ диигин диэбиттэригэр: «Ыарахан кэмнэр күүстээх дьону үөскэтэллэр. Онтон үтүө кэмнэр мөлтөх дьону үөскэтэллэр». Этэр эттэҕинэ кырдьык курдук. Манна биири өйдүөххэ сөп. Омук да буоллун, киһи да буоллун икки уһукка сылдьар буоллаххына түһүүҥ-тахсыыҥ оннук охсуулаах буолар эбит. Наһаа байар эмиэ сатаммат, аһары дьадайар эмиэ куһаҕан. Ортону тутуһуу барыстаах эбит. Ордук биһиги курдук аҕыйах ахсааннаахтарга. Баҕар ол аҕыйахпыт Дьылҕа хаан харыстыыр ыйааҕа эбэтэр Куйаар мүччүрүйбэт сокуона буолуо. Сүппэтинэр, симэлийбэтинэр диэн. Дубай олохтоохторун курдук икки кыраайга аһары түспэккэ олох устун айаннаатахпыт буоллун.
Логло
ПОДЕЛИТЬСЯ: