Көҥүл тустууга Россия чемпионата саҕаланара 12 хонук хаалла. Спорт бэтэрээннэрин бөлөҕө «Өрөгөй» Спорка бэлэмнэнии киинигэр кэлэн, анал үөрэтэр-эрчиллэр түмсүүгэ сылдьар Саха сирин көҥүл тустууга хамаандатын бөҕөстөрүн, тренердэри кытта көрүстэ.
Бөлөххө РСФСР-1965 көҥүл тустууга чемпиона Петр Попов, ССРС спордун маастара Михаил Друзьянов, спорт бэтэрээннэрин өрөспүүбүлүкэтээҕи түмсүүтүн салайааччы Гаврил Сивцев, атах оонньуутугар спорт маастара, суруналыыс Василий Посельскай, спорт бэтэрээнэ, элбэх кинигэ ааптара Дмитрий Егоров киирдилэр.
Кинилэр, буолаары турар улахан түһүлгэҕэ кыттааччыларга туһаайан – ситиһиилээхтик тустарга бэйэлэрин үтүө баҕа санааларын эттилэр, алгыстарын тиэртилэр.
Санатан эттэххэ, Россия көҥүл тустууга эр дьоҥҥо чемпионата бэс ыйын 26-27 күннэригэр Москваҕа ыытыллар. Тустууктарбытыгар ситиһиилээх кыттыыны баҕарабыт!
Дьулурҕан.
ПОДЕЛИТЬСЯ: