80-с сыллар ортолорун диэки илин эҥээртэн икки дьүөгэлии кыргыттар 8 кылаас кэнниттэн педучилищеҕа туттарса киирбиттэр. Илиилэригэр аймахтарын аадырыстарын тутан баран муна сырыттахтарына биир саастаах саха киһитэ сирдээн дьиэлэригэр илдьэн биэрбит. От ыйын өҥүрүк куйааһыгар кыргыттар биир аймах кыыс сирдьиттээх 8 оптуобуһунан Оржанкаҕа кэлэн түспүттэр. Аймах кыыс умнан буоллаҕа буолуо кыргыттары дьиэлэригэр төннөллөрүгэр утары тохтобулга бараҕыт диэн эппэтэх. Кыргыттар докумуоннарын педучилищеҕа туттаран баран дьиэлэригэр бараары үөрэ-көтө били түспүт тохтобулларыгар тиийбиттэр. 8-с оптуобус сыылаҥхайдаан кэлэн тохтообутугар олорсубуттар. Арай Люда көрдөҕүнэ дьоннор туох эрэ кыһыллыҥы кумааҕыны уган баран билиэт ылаллар эбит. Уһуну-киэҥи толкуйдуу барбакка Люда кыыс тиийэн ол тэрили эрийээт билиэти ылбыт уонна дьон бары угалларын үтүктэн хайаҕаска угаат эмиэ икки билиэти эрийэн ылбыт. Кыргыттар оптуобус кип-киэҥ түннүгүнэн илиитин уунан турар Ленин пааматынньыгын көрө-көрө айаннаабыттар. Оптуобус эргийиитигэр «маннык айаннаабатахпыт» ээ диэн аан бастаан ытырыктата санаабыттар. Онтон дьон бары «Автовокзал» диэн улахан суруктаах тохтобулга түспүттэригэр батыһан түспүттэр. Мааҕын айанныырбытыгар маннык тохтобул суох этэ, онон мааҕыҥҥы тохтобулбутугар барыах диэн сүбэлэһэн баран төттөрү Оржанкаҕа сатыы барбыттар. Эһээ Лениннэрин көрө-көрө айаннаан Оржанкаҕа тиийбиттэр. Уонна 8 оптуобус кэлбитигэр эмиэ киирэн олорбуттар, сытыы киһи Люда бэйэтигэр уонна дьүөгэтигэр урукку курдук билиэт ылан хаачччыммыт. Ол айаннаан иһэн илиитин ууммут Ленины көрө-көрөлөр: «Эмиэ турар дии», – диэн ботугураспыттар. Оптуобус эргийэн баран автовокзалга тиийбитигэр эмиэ түспүттэр. От ыйын өҥүрүк куйааһа өссө сатыылаабытыгар Люда ыас хара бүрүүкэлээх, чаҕылхай сибэкки атлас куопталаах буолан буспут-хаппыт, дьүөгэтэ Надя эмиэ куйааһырҕаан саҥата-иҥэтэ мөлтөөбүт. Үгүс саҥата суох оптуобустан түһээт, сатыы эмиэ били Оржанкаҕа баар тохтобулларыгар төннөн саппарыспыттар. Ленин пааматынньыгын ааспыттар уонна Оржанкаҕа били тохтобулларыгар тиийбиттэр. Надя ырыган бэйэтэ өссө куччаабыт курдук буолан баран дьүөгэтигэр сылайбытын уонна утаппытын эппит. Дьаһаллаах киһи Люда ыйыытынан 4-с маҕаһыыҥҥа киирэн утах көрдөөн баран, билэрдии 3 лиитирэлээх суок ылбыттар. Аны тугунан да аһаллара суох буолан кыайан испэтэхтэр. Сол курдук 8-с нүөмэрдээх оптуобус кэлбитигэр хайыахтарай, быстыахтара дуу ойдуохтара дуу киирэн олороохтообуттар. Эмиэ автовокзал кэлбитигэр түспүттэр уонна туох да саҥата суох Лениннэрин көрбөтөҕө буола-буола Оржанкаларыгар ааспыттар. Киэһэрэн барбыт, муҥкук 15 саастаах икки тыа кыргыттара үнтү сылайан, утатан да олордоллор 3 киилэлээх суоктарын туппутунан оптуобустарыгар киирээхтээбиттэр. Лениннэрин диэки хайыһан да көрбөккө олорон автовокзалга тиийэн эмиэ түспүттэр. Кыайан саҥарар да кыахтара суох буолбут 3 лиитэрэ суок соһуулаах кыргыттар Оржанкаҕа тиийэн сынньана ыскамыайкаҕа олорбуттар. Арай ол олордохторуна утары тохтобул диэкиттэн били аймах кыыстара илиитинэн далбаатыы-далбаатыы сүүрэн кэлбит. Ол киэһэ аһыыр да кыахтара суох буолбут оҕолор квартираҕа киирээт уу иһээт ороҥҥо охтоот утуйан хаалаахтаабыттар.
Бу дьиҥнээх түбэлтэни аймаҕым кыыс кэпсээбитин сурукка тистим. Оччотооҕу муҥкук, көнө тыа кыысчааннара куорат сиргэ аан бастаан кэлэн баран муммуттарын туһунан.
Логло
ПОДЕЛИТЬСЯ: