Олохпутугар-дьаһахпытыгар үүнүү-сайдыы балысханнык киирэрин, бары билэн-көрөн олоробут. Кэлиҥҥи кэмҥэ «креативнай экономика» диэн саҥа өйдөбүлү элбэхтик истэр буоллубут. Өрөспүүбүлүкэбит Ил Дархана Айсен Николаев бу туһунан эмиэ элбэхтик этэр. Ол эрээри, кистэл буолбатах, үгүстэр итини төбөбүтүгэр үчүгэйдик буһара иликпит.
Урукку өттүгэр экономиканы сырьену, оҥорон таһаарыыны эрэ кытта ситимниирбит. Куйаар ситиминэн саҥаран-иҥэрэн, суруйан-бичийэн үп-харчы оҥостуохтара диэн өйгө-санааҕа да суоҕа. Креативнай экономиканы, үүнэр көлүөнэ экономиката диэн ааттыыллар. Ураты идеялардаах дьон үбү-харчыны оҥоруулара, креативнай экономикаҕа киирсэр. Айар талааннаахтар бу хайысхаҕа ылсыһыахтарын сөптөөх. Суруйааччылар, музыканнар, киинэ устуутунан дьарыктанааччылар, блогердар…
Арктикатааҕы култуура уонна искусство судаарыстыбаннай института өрөспүүбүлүкэ оскуолаларыгар креативнай хайысхаларынан аҕыс фирменнай кылаастары арыйбыта. Дьокуускайдааҕы сахаполиттехническай лицейгэ, Чурапчытааҕы гимназияҕа, Өлүөхүмэ гимназиятыгар, Одьулуун, Чаппанда, Тааһаҕар, Дьэлиҥдэ, Амма-Наахара орто оскуолаларыгар. Бу үөрэх модела теоретическай эрэ буолбакка, үөрэнээччилэргэ практикаҕа кытта билиини-көрүүнү биэриэр.
Ааспыт сыллаахха фирменнай кылаастар, «КиноМАНия» уонна «Медиахакотон» бырайыактар үөрэнээччилэргэ креативнай хайысхаларга билии-көрүү, уопут ылалларыгар, баар кыахтара арылларыгар улахан төһүү буолбуттар. Арктика улуустарыгар ыытыллыбыт тэрээһиннэр, тыйыс күннээх-дьыллаах сиргэ-уокка олорор дьоҥҥо, оҕолорго креативнай индустрияны кытта билсэллэригэр кыаҕы биэрбиттэр. Үөрэнээччилэр инникитин ханнык идэлэри баһылыахтарын сөптөөҕөр билии-көрүү эбиммиттэр.
Малай академия ыытар үлэтин чэрчитинэн Булуҥ, Өлөөн, Эдьигээн, Үөһээ Дьааҥы улуустарыгар «Твой АГУГУК» диэн арктическай экспедициялар тэриллэн үлэлээбиттэр. Экспедицияҕа Арктикатааҕы култуура уонна искусство судаарыстыбаннай институт уонна «Үүнэр көлүөнэ Пааркатын» преподавателлэрэ, профессордара, салайааччылара уонна үлэһиттэрэ лекциялары оҥорбуттар, маастар-кылаастары ыыппыттар. Экспедиция 200 үөрэнээччини хаппыт. Бу ыытыллар үлэ үүнэр көлүөнэҕэ креативнай индустрияҕа билиилэрэ-көрүүлэрэ кэҥииригэр бигэ тирэх буолара саарбаҕа суох.
«КиноМАНия» бырайыак чэрчитинэн үөрэнээччилэр киинэ устуутун ымпыктарын-чымпыктарын кытта билсибиттэр. Бэйэлэрэ кылгас метражтаах киинэлэри устарга холоммуттар. Күндү ааҕааччылар, билигин саха киинэтэ хайдах курдук үүммүтүн-сайдыбытын билэн-көрөн олороҕун. Ааспыт сылга бу бырайыакка 68 үөрэнээччи хабыллыбыт. Оттон «Медиахакотон» бырайыакка оҕолор Саха сиригэр баар хампаанньалар ыытар үлэлэрин-хамнастарын өрө анньар роликтары оҥорорго холонон көрбүттэр.
Арктикатааҕы култуура уонна искусство судаарыстыбаннай институт ахсынньыга 8-11 кылаас үөрэнээччилэригэр информатикаҕа уонна Саха сирин норуоттарын култууратыгар олимпиадалары ыыппыт. Олимпидаларга барыта 150 үөрэнээччи кыттыбыт.
Креативнай, үүнэр көлүөнэ экономикатыгар оҕолорбут бэлэмнээх буолалларыгар тустаах үлэ хайысхата төһүүнэн буоларыгар эрэнэбин.
Людмила НОГОВИЦЫНА
ПОДЕЛИТЬСЯ: