Бүгүн, кулун тутар 12 күнүгэр Саха сирин спордун үрдүк үктэлгэ таһаарбыт дьонтон биирдэстэрэ, Монреаллааҕы олимпиада кыайыылааҕа, Ил Түмэн депутата Павел Пинигин төрөөбүт күнэ.
Кини: «Кыайыылар киһини элбэххэ кынаттыыллар, сирдииллэр. Ситиһиллибэтэҕи ситиһиэххин, ылбатах үрдэллэргин дабайыаххын баҕараҕын», — диэн этэр. Ол курдук, Павел Павлович ис дьыала министиэристибэтин иһинэн салайыы Академиятын үөрэнэн бүтэрбитэ. Полковникка тиийэ үүммүтэ. Онтон бэйэтин иннигэр Олимпийскай оонньууларга судьуйалыахтаахпын диэн сыал-сорук туруоруммута. Ити ыра санаата 2000 сыллаахха туолбута. Сиднейгэ буолбут олимпиадаҕа судьуйалаабыта.
Төрөөбүт үөскээбит дойдутугар, Саха сиригэр сайдыылаах сирдэргэ, куораттарга баар курдук, чулуу спортсменнары бэлэмнээн, иитэн таһаарар спортивнай комплекс туттарар баҕалааҕа. Биллэрин курдук, ол баҕата эмиэ туолбута. Өрөспүүбүлүкэ Президенин Вячеслав Штыровка сүбэһитинэн үлэлии сылдьан, ити толкуйун туһунан киниэхэ эппитэ. Бу этии өйөнөн, «Триумф» спортивнай киин тутуллан дьэндэйбитэ. Өрөспүүбүлүкэбитигэр кэлбит ыалдьыттар сөҕөр-махтайар тутууларыгар кубулуйда. Спортсменнарбыт дьарыктаналларыгар толору усулуобуйа баар буолла.
— Патриоппун, төрөөбүт-үөскээбит Хоптоҕо нэһилиэгин, Чурапчым, Сахам сирин, дойдум тустарыгар күрэхтэһэрим. Төһө да улахан спортан тохтообутум иһин, ол патриотическай тыыным ханна да сүтэн-оһон хаалбата, дьоммор-сэргэбэр, дойдубар туһалыыр, көмөлөһөр баҕа санаам батарбат, — диэн этэр Павел Павлович.
Ол да иһин Ил Түмэн быыбардарыгар кыттан, биир дойдулаахтара кинини өйөөннөр норуот депутатынан таллахтара.
Биллэрин курдук, кэлиҥҥи кэмҥэ саха тустуута биллэрдик сэргэхсийдэ. Ол курдук, бу күннэргэ элбэҕи эрэннэрэр эдэр тустуукпут Лев Павлов 23 саастарыгар диэри Европаҕа бастыыр иһин күрэхтэһиигэ кыайыы көтөллөнөн, барыбыт сүргэтин көтөхтө. Павел Павлович эдэр тустууктарга анаан бу курдук этэн турардаах.
— Спортсмен стабильнай көрдөрүүлэрдээх, күрэхтэһиилэр ахсын утарылаһааччыларгын кыайыахтааххын, тустууктар терминнэринэн тоһуталыы сылдьыахтааххын. Оччоҕо моральнай-психологическай өттүнэн баһыйтараллар, толлор, чаҕыйар буолаллар. Ити инниттэн эн кинилэртэн икки-үс төбөнөн үрдүк кылаастаах, маастарыстыбалаах буолуохтааххын.
Маны таһынан мин күрэхтэһиилэри, ордук көҥүл тустууну элбэхтик батыһа сылдьан көрөбүн. Онно кэтээн көрүүбүнэн, күүстээх өбүгэлэрдээх, удьуордаах, айдарыылаах, айылҕалаах тустууктар, олох ураты буолаллар. Ити моральнай-психологическай баһыйыыга улахан оруолу оонньуур. Лидер, чемпион хаана төрүөххүттэн баар буолар дии саныыбын. Күүстээх дьарык, үлэ эмиэ манна улахан оруоллаах. Спортка эрэ буолбатах, туохха барытыгар дьарык, сүрэхтээх буолуу туох эрэ түмүккэ, кыайыыга, ситиһиигэ тириэрдэр. Дьаныардаах үлэһит киһи син-биир тугу эмэ ситиһэр.
Людмила НОГОВИЦЫНА
ПОДЕЛИТЬСЯ: