Кимтэн да күһэллиитэ суох, дьон-сэргэ бэйэлэрэ санааларыттан түмүстэхтэринэ, сомоҕолостохторуна таас хайаны да сыҕарытыахтарын сөптөөх. Маныаха Уус-Алдан улууһун Кэптэни бөһүөлэгин олохтоохторо үгүстэргэ тыыннаах холобур буолуохтарын сөп.
Кинилэр үлэ-хамнас, спортивнай күрэхтэһиилэр, араас тэрээһиннэр, сынньалаҥ буоллуннар мэлдьи түмсэн, бары саба түһэн, үмүрүппүттэрэ, кыайбыттара-хоппуттара эрэ баар буолар.
Аҕа дойдуну көмүскээччилэр, дьахталлар аан дойдутааҕы күннэрин бэлиэтээтибит. Кэптэни бөһүөлэгин олохтоохторо бу бырааһынньыктары уратытык бэлиэтээтилэр. Ол курдук, кэрэ аҥаардар күүстээх аҥаардарыгар сынньалаҥ киинигэр маанылаах остуоллары тэрийбиттэрэ. Оттон эр дьон Дьахталлар күннэригэр ырыалаах-тойуктаах, үҥкүүлээх-битиилээх, оонньуулаах-көрдөөх олус диэн үчүгэй бырааһынньыгы тэрийэннэр, бөһүөлэк кэрэ аҥаардарын сүргэлэрин көтөхтүлэр. Күүстээх аҥаардар аэрогриллэргэ тиийэ бириистэри туруордулар. Онон сорох кэрэ аҥаардар дьиэлэригэр илии тутуурдаах, өттүк харалаах төнүннүлэр.
Ньукуолуҥҥа ытык кырдьаҕастарга кус сиэтии, остуол тэрийии эмиэ үтүө үгэскэ кубулуйбут.
Ааспыт күһүн Кэптэниттэн төрүттээх дьон, бары турунан, Кэптэни-Хомустаах айанын суолун оҥорон кэбиспиттэрэ. Бу айан суолунан Кэптэни, Даалы, Найахы, Баатаҕай, Дүпсүн, Өспөх, Уһун-Күөл, Бээди, Остуойка, сайынын Кылаайы бөһүөлэктэрин айанньыттара сылдьаллар.
Саас ахсын бөһүөлэктэрин таһын, ыһыах ыһар сири, сыбаалканы ыраастааһыҥҥа, хомуйууга эмиэ бары түмсэ түһэн, үлэни бырааһынньыкка кубулутан, үөрэ-көтө үмүрүтэн кэбиһэллэр.
Соторутааҕыта Кэптэни бөһүөлэгин «Добун» эр дьон түмсүүтэ национальнай многоборьеҕа улуустааҕы күрэхтэһиини үрдүк таһымнаахтык тэрийэннэр, олус үчүгэй бириистэри туруораннар үгүс дьон сэҥээриитин ылыахтарын ылбыттара.
Людмила НОГОВИЦЫНА
ПОДЕЛИТЬСЯ: