«Өрөгөй» Спорка бэлэмнэнии киинигэр сахаттан бастакы олимпийскай чемпион, ССРС спордун үтүөлээх маастара уонна үтүөлээх тренерэ Роман Михайлович Дмитриев кэриэһигэр 21-гэр диэри саастаахтарга көҥүл тустууга норуоттар икки ардыларынааҕы XI турнир ыытыллан түмүктэннэ.
Быйылгы күрэхтэһиигэ 9 тас дойдуттан уонна Россия 13 регионуттан барыта 270 эдэр спортсмен күрэс былдьаста.
Түһүлгэ түмүгүнэн Саха сирин хамаандатыттан Игорь Матвеев уонна Андрей Аронов кыһыл көмүс мэтээли аҕалары ситистилэр. Ону тэҥэ хамаандабыт 2 үрүҥ көмүс уонна 5 боруонса мэтээллээх.
70 киилэҕэ тустубут Игорь Матвеев утарылаһааччыларын барыларын аһара баһыйа тутта, биир даҕаны баалы биэрбэккэ, кэлтэйдии кыайталаата. Кини билигин Саха Республикатын үтүөлээх тренерэ Прокопий Семенович Иванов салалтатынан дьарыктанар. Кэлиҥҥи кэмҥэ Игорь кырдьык ситиһиилээхтик тустар, көрдөрүүтүн тупсардар тупсаран иһэрэ кэрэхсэбиллээх.
Кини оҕо сылдьан тустуунан дьарыгын Нам улууһугар саҕалаабыта. Бастакы тренерэ – көҥүл тустууга ССРС спордун Владимир Семенович Копырин буолар.
Үөрэнээччитин ситиһиититтэн астынан Владимир Семенович санаатын маннык үллэстэр: «Игорь бу күрэхтэһиигэ хонноҕо аһыллан туһунна. Быһаарыылаах хапсыһыыга сөптөөх тактиканы тутуспута, кыайыыга тиэртэ. Утарсааччыта казах уола күүстээх уонна түргэн хамсаныылаах эбит. Ону үчүгэйдик хонтуруоллаан туһунна, бүтэһигэр киһитэ синэ биир диэн баран киирэн биэрдэ.
Мин кинини кыра эрдэҕиттэн дьарыктаабытым. Киһи тылын ылынар, истигэн. Сыыһаларын-халтыларын көннөрүнэ сылдьар. Хас күрэхтэһиитин аайы, хайдах киирсибит видеотын бэйэтинэн ыыттарабын. Уонна ону көрөн, сүбэлээн биэрээччибин. Аны Игорь иннигэр Россия түһүлгэтигэр ситиһиилээхтик тустар сыал-сорук турар».
Петр ПАВЛОВ.
Ааптар хаартыскаҕа түэриитигэр: кыайыылаах Игорь Матвеев тренердэрэ П.С. Иванову, В.С. Копырины кытта.
ПОДЕЛИТЬСЯ: