«Уот Дьулустаан» сериалга бииртэн-биир араас, эгэлгэ дьахтар уобарастара арыллаллар. Били, этэргэ дылы, саха дьахталларын уобарастарын «энциклопедията» диэххэ сөп. Көрөөччү биир саамай ылыммыт уобараһынан, биллэн турар, Ылдьаана хотун буолар. «Сахалыы саҥа сериалы көрөөр эрэ, онно олох наһаа астык Ылдьаана хотун диэн баар. Дьиҥ сахалыы саҥаран-иҥэрэн, уоһун-тииһин оҥостон, олох кырдьык даҕаны кырыктаах баай хотун», — диэн бииргэ үлэлиир дьонум «ымсыырдыбыттара».
Дьахтар күнүгэр туһулаан, «Уот Дьулустаан» сериалга дьахтар уобарастарын арыйбыт артыыстарбытын блиц-интервью быһыытынан маннык ыйытыыларга хоруйдуулларыгар көрдөстүбүт.
– Кулун тутар 8 күнүн хайдах бэлиэтиигиний, туох үгэстэрдээххиний?
– Кулун тутар 8 күнүн бу диэн бырааһынньыктыыр үгэһим суох курдук. Урут, оҕо сылдьан дьиэ кэргэнинэн, кылааһынан сүрдээх үчүгэйдик бэлиэтиирбитин өйдүүбүн. Дьиэбитигэр бырааһынньыктааҕы остуол тардан, кыргыттар – эдьиийим, ийэм буолан, ас бөҕө астаан, аҕабыт бырааппынаан бэлэх бэлэмнээн үөрэ-көтө дьиэ кэргэн бырааһынньыга буолара. Оттон оскуолаҕа уолаттар кыргыттарга бэлэх биэрэллэрэ, оонньоон-көрүлээн бырааһынньыгынан эҕэрдэлэһэрбит.
– Кулун тутар 8 күнүгэр туппут саамай өйгөр хатаммыт бэлэх.
– Саамай сүрэхпэр күндү, өйдөөн хаалбыт бэлэҕим – аҕам бырааппынаан станокка уһанан, бэйэлэрэ оҥорон бэлэхтээбит куукунаҕа туттуллар маллара буолар. Сүрдээх үчүгэйдик хас биирдиибитигэр күөрчэх, арыы ытыйар ытыктары, мас хамыйах, лаппаакы, бөлүөк оҥорбуттар этэ. Ити дьэ, миэхэ хаһан да умнуллубат бэлэх буолар!
– Олоххор холобур оҥостор дьонуҥ.
– Олохпор холобур оҥостор дьонум, биллэн турар, ийэлээх аҕам буолаллар. Ийэм Зоя Николаевна, аҕам Владимир Ильич Семеновтар – тыа үлэһит дьоно. Ийэм үйэтин тухары кулуупка охраннигынан үлэлээбитэ, аҕам кэтэх хаһаайыстыбатыгар үлэлиир. Дьонум билиҥҥэ диэри сүөһүлэрин, хаһаайыстыбаларын тутан олороллор, ийэм – оҕуруоччут бастыҥа. Иккиэн наар үлэни өрө туппут дьон. Кинилэр харыларын күүһүнэн үлэлээн, биһигини, үс оҕолорун барыларын үрдүк үөрэхтээх дьон оҥорон таһаардылар. Мин ийэлээх аҕабар махталым муҥура суох.
– «Уот Дьулустаан» сериалга толорбут оруолгар биһириир уонна итэҕэһэ дии саныыр хаачыстыбаларыҥ ханныктарый?
– Мин санаабар, Ылдьаана үчүгэй өрүтэ – кини куруутун оруннаахтык (справедливо) кыыһырара, сөбүлээбэтэх санаатын эгилитэ-бугулута суох, баары-баарынан этэн иһэрэ. Кини хаһан да суохтан оҥоро-оҥоро кыыһырбат ээ. Көссүүлэһэр, кинини аанньа ахтыбат эригэр сөптөөхтүк кыыһырар, кыйаханар. Албыннаһан, толлубута, куттаммыта буолар хамначчыттарыгар эмиэ сөпкө бардьыгынаталыыр. Ылдьаананы аһына саныыбын, оҕото, дьоло суоҕуттан, кэргэнэ кинини таптаабатыттан итинник майгылаах. Ылдьаана саамай улахан итэҕэһэ – кими да истибэтэ. Хаһан баҕарар киһи киһиттэн үөрэнэр, киһи киһи санаатын истэн, ону ырытан, сөптөөх түмүктэри оҥостуохтаах. Оттон Ылдьаана аһары атаахтык иитиллибит буолан, олус бэйэмсэх, билиҥҥилии эттэххэ, бэйэтин эрэ өрө тутар киһи. Ол да буоллар, героинябын көмүскээн эттэхпинэ, ити эмиэ кини буруйа буолбатах. Ити кини дьиэ кэргэнин алҕаһа, ийэлээх аҕата, убайдара кинини аһары ачаалатан, итинник гына иитэн таһаардахтара. Атаах, бэйэмсэх кыыс олох ыарахаттарыттан оҕустаран, итинник киҥнээх, кыыһырымтаҕай дьахтарга кубулуйаахтаатаҕа.
Саха Республикатын үтүөлээх артыыһа Екатерина Семенова Үүнэр көлүөнэ театрыгар быйыл 20-с сезонун айымньылаахтык үлэлиир. Кини Бүлүү улууһун Бороҕон нэһилиэгиттэн төрүттээх, 2004 сыллаахха Дьокуускайдааҕы культура уонна искусство колледжын, 2013 сыллаахха. М.К. Аммосов аатынан ХИФУ культурологияҕа салаатын бүтэрбитэ. Е.В. Семенова артыыс талаана аймахтарыттан утум, силис тардан бэриллибит диэххэ сөп, кини абаҕата – Саха государственнай театрын артыыһа Кирилл Семенов (сериалга олоҥхоһут Охонооһой оруолун толорбута), оттон эбээтин убайа Бүлүү эҥэр биллэр-көстөр олоҥхоһут Афанасий Софронов-Хоохура Охонооһой эбит. Екатерина комическай амплуалаах артыыска, оскуола эрдэҕиттэн Алексей Павлов көрдөөх миниатюраларын сэҥээрэн көрөрө, кинини үтүктэ сатыыра. Театрга бастакы оруола «Наара суох» комедияҕа Күндү Күлүүк уобараһа. «Наахара-2», «Хаамаайы Бааска», «Тумарык» уо.д.а. киинэлэргэ эпизодическай оруолларга оонньообута. Екатерина Владимировна икки 11 саастаах игирэ уолаттар күн-күбэй ийэлэрэ.
– Екатерина, эн быырпах туһунан тылларыҥ мем буолан тарҕанна, онон Дьахтар күнүгэр дьиэ кэргэнинэн саамай астынан астанар аскыт, бүлүүдэҕит туһунан ыйыттахпына табыллар.
– Урут, оҕо эрдэххэ эмиэ диибин, бырааһынньыкка уурунан, хаһаанан баран, астына-дуоһуйа сиир астардаах буоларбыт. Холобура, дьэдьэн барыанньата. Кыһыны быһа хаһаанан, уурунан баран, Дьахтар күнүгэр астына-дуоһуйа сиир эмиэ бэйэтэ туспа үтүө үгэс эбит.
Лира Яковлева
Хаартыскалар интернет аһаҕас ситимиттэн уонна
Е.В. Семенова дьиэтээҕи архыыбыттан туһанылыннылар
ПОДЕЛИТЬСЯ: