Үгүс артыыс омсолоох геройу оонньуур чэпчэки, куһаҕаны куһаҕан дэтэр биир сүрүн хаачыстыбатын таба тайанныҥ да, мөкү герой уобараһа табыллар, оттон биһирэмнээх герой оруолун толорорго күчүмэҕэй диэн санаалаахтар. Үчүгэй киһи эргиччи үчүгэй буолар, онтон биир эмэ өрүтүн таба көрөн, онно тирэҕирэн, туустаан-тумалаан, айан таһаарар мээнэ артыыска дэбигис кыаллыбат суол. Саха дьахтарын биһирэмнээх уобараһын, эбээ Сүөкүлэни СӨ үтүөлээх артыыһа, Ньурба куоратын, Ньурба улууһун, Бахсы нэһилиэгин бочуоттаах олохтооҕо Майя Петровна Слепцова кыайа-хото тутан көрдөрдө.
Дьахтар күнүгэр туһулаан, «Уот Дьулустаан» сериалга дьахтар уобарастарын арыйбыт артыыстарбытын блиц-интервью быһыытынан маннык ыйытыыларга хоруйдуулларыгар көрдөстүбүт.
– Кулун тутар 8 күнүн хайдах бэлиэтиигиний, туох үгэстэрдээххиний?
–Дьахтар күнүн дьиэ кэргэнинэн, икки кыыһым дьиэ кэргэттэрин кытта түмсэн көрсөр, эҕэрдэлэһэр үгэстээхпит. Уопсайынан да бырааһынньыктарга куруутун дьиэ кэргэнинэн бииргэ түмсэ, муста сатыыбыт. Ньурба театрыгар аан бастаан үлэлии кэлэн баран, кулун тутар 8 күнүн бырааһынньыктаабыппытын куруутун өйдүү-саныы сылдьабын. Онно эр дьоммут наһаа үчүгэй пародия оҥорон, олус көрдөөх бырааһынньык бэлэхтээн сөхтөрбүттэрэ.
–Кулун тутар 8 күнүгэр туппут саамай өйгөр хатаммыт бэлэх.
– Саамай өйбөр хатаммыт бэлэҕим – кэргэним Боря миэхэ анаан оҥорбут кыракый мас остуола. Оччолорго саҥа ыал буолбуппут. Ол саҕана барыта дефицит үйэтэ, миэбэл да соччо-бачча көстүбэт, атыыламмат этэ. Мин кыра мас остуолланыахпын наһаа баҕарарым, ону кэргэним бэйэтин илиитинэн тутан-хабан, уһанан оҥорон биэрбитэ.
– Олоххор холобур оҥостор дьонуҥ.
– Олохпор холобур оҥостор, саамай суолталаах дьонум — төрөппүттэрим. Ийэм Павлова Анастасия Степановна 9 оҕону төрөтөн, иитэн улаатыннарбыта. Мин бэйэм икки оҕолоохпун, онтон ийэм 9 оҕону көрөн-харайан улаатыннарбытын санаатахпына, төһө да оччолорго дьахтар үксэ элбэх оҕолоох буоллар, син биир сөҕөбүн, махтайабын. Ийэбит барахсан этэр буолара: «Мин эһигини аһатабын, таҥыннарабын, онтон билиини эһиги бэйэҕит ыла сатааҥ». Ити кини биһигини үөрэххэ, сырдыкка туһаайан иитиитэ-такайыыта эбит. Оттон аҕабын Слепцов Петр Филипповиһы төһө да олоххо алҕастардаах, сыыһалардаах буоллар, эмиэ махталынан ахтабын-саныыбын. Кини баар буолан, биһиги баар буоллахпыт дии. Уонна кини алҕаһа, сыыһалара биһиэхэ уруок буоллахтара. Аҕабыт сэрии кэмигэр Ааллаах Үүнүнэн сылдьан, сыыстаран ыалдьан, тыҥатыгар улахан операциялааҕа. Мээнэ киһи ордубат ыарыытын кытта охсуһан, олоххо дьулуурунан тыыннаах хаалан, 9 оҕону төрөтөн ииттэҕэ. Сэрии ыар сылын көлүөнэтин киһитэ буолан, дьиппиэн, кытаанах майгылааҕа, эппитин булгу оҥотторон тэйэрэ. Онон биһиги киһи, личность быһыытынан туруубутугар улахан оруоллаах. Итиэннэ улаатар, уларыйар сааспар, Чыаппараҕа 8 кылааска үөрэнэр кэммэр учууталым Варвара Григорьевна Слепцова миэхэ улахан үтүө сабыдыаллаах этэ. Дьылҕабар саамай махтанар, мин олохпор сүдү суолталаах киһинэн кэргэним Борис Петрович буолар. Кини билигин биһиги ортобутугар суох да буоллар, миэхэ куруутун сүбэ-ама, күүс биэрэр курдук. Айар үлэбэр холобур оҥостор дьоммунан өссө хотунум, кэргэним ийэтэ Маргарита Гаврильевна Тихонова, режиссербут Юрий Алексеевич Макаров буолаллар. Ити мин бэйэм эйгэм, тулабар баар чугас дьоммун ааттаталаатым. Биллэн турар, айар киһиэхэ улуу дьон сабыдыала эмиэ баар буолар. Холобур, мин билигин Лев Толстой айымньыларын ааҕа сылдьабын. Кини санаатын муҥура суох далааһыныттан төһөлөөх соһуйабыный, сөҕөбүнүй! Оттон кинини сахалыы саҥардыбыт, тылбаастаабыт Амма Аччыгыйа эмиэ дьоһун киһи!
–»Уот Дьулустаан» сериалга толорбут оруолгар биһириир уонна итэҕэһэ дии саныыр хаачыстыбаларыҥ ханныктарый?
–Сүөкүлэҕэ саамай биһириир өрүтүм – кини Үрдүк Айыылары этинэн-хаанынан билгэлиирэ, төһө да дьадаҥы саха дьахтара буоллар, тойоттортон-хотуттартан үрдүкү турар Айыы күүһэ баарыгар эрэнэрэ, итэҕэйэрэ, ол аата үтүөҕэ бүк эрэллээх сырдык санаалааҕа буолар. Оттон итэҕэһэ дии саныыр хаачыстыбам – кини арыт ардыгар хааччахха киирэн хаалара. Былыргы олох-дьаһах тутула, эйгэтэ оннукка күһэйэр буоллаҕа. Дьахтар киһи быһыытынан толлон, куттанан, күрүөҕэ, хааччахха бүгэн хаалар курдук.
М.П. Слепцова Дьокуускайдааҕы культурнай-сырдатар училищены, онтон Илин Сибиирдээҕи культура институтун бүтэрэн баран, 1986 сылтан Ньурба театрыгар айымньылаахтык үлэлээн, 70-ча араас дьахтар уобараһын көрөөччүлэригэр бэлэхтээтэ. Кини Чурапчы улууһун Бахсы нэһилиэгиттэн төрүттээх, театрга олохторун анаабыт аймахтарын, Саха АССР, РСФСР народнай артыыһа Слепцов Марк Дмитриевич, Саха АССР үтүөлээх артыыһа, «Норуоттар доҕордоһуулара» орден кавалера Слепцов Спартак Иванович, Саха АССР үтүөлээх артыыһа Слепцов Андриан Семенович, Саха АССР народнай артыыһа, режиссер, Саха театрын директора Местников Тарас Павлович утумнааччылара буолар. Майя Петровна бэйэтин дьиэ кэргэнэ эмиэ театр эйгэтин кытта ыкса ситимнээх. Кэргэнэ Борис Петрович Васильев Ньурба театрыгар музыкальнай чаас сэбиэдиссэйэ этэ. Кини ийэтэ, СР үтүөлээх артыыһа Маргарита Гаврильевна Тихонова Щепкин аатынан үрдүкү театральнай училище 1966 с. выпускницата, Ньурба театрыгар олоҕун анаабыт дьонтон биирдэстэрэ. Оттон Майя Петровна кыыһа Маргарита Васильева Ньурба театрын эдэр кэскиллээх режиссера.
М.П. Слепцова «Уот Дьулустаан» айымньыга бу бастакы холонуута буолбатах. Ньурба театрыгар Юрий Макаров туруорбут испэктээгэр кини Буор кут уонна балыксыт эмээхсинин оруолларын толорбута. Артыыска кэлиҥҥи сылларга «Сүлүһүннээх таптал», «Мин таптыыр спутнигым» сериалларга оонньообута. 2019 сылтан социальнай ситимҥэ «Эбээ Маайа ааҕар» диэн сахалыы ханаал арыйан, саха классиктарын уонна араас омук суруйааччыларын айымньыларын ааҕан иһитиннэрэр. Кини ити бырайыагынан дьон-сэргэ сахалыы ааҕарын көҕүлүүргэ, төрөөбүт тылы көлүөнэттэн көлүөнэҕэ харыстаан тиэрдэргэ сүдү кылаатын киллэрдэ. Эбээ Маайа ааҕыыларын Национальнай библиотека электроннай библиотекатыгар истиэххэ сөп.
– Майя Петровна, сериалга эн дьиҥ чахчы Айыы санаалаах саха эбээтин бастыҥ уобараһын көрдөрдүҥ. Онон кэнчээри ыччакка, ордук эдэркээн куоларга, кыргыттарга тугу сүбэлиэҥ этэй?
– Кыыс оҕо дьоло – ыал, ийэ буолуу. Онон кыргыттарбытын сааскы бырааһынньыгынан эҕэрдэлээн туран, сирдээҕи аналгытын булан, ол соҕотох киһигитигэр үйэҕит тухары бэриниилээх буоларгытыгар баҕарабын. Кыыс оҕо хаһан баҕарар ыраас, чэнчис буолуохтаах. Уонна оттон билиҥҥи кэмҥэ кыргыттарбыт киэҥ билиилээх-көрүүлээх, чэгиэн-чэбдик, чөл туруктаах буоллуннар!
Лира Яковлева
Хаартыскалар интернет аһаҕас ситимиттэн уонна
М.П. Слепцова дьиэтээҕи архыыбыттан туһанылыннылар
ПОДЕЛИТЬСЯ: