Биллэрин курдук, 2012 сылтан өрөспүүбүлүкэбитигэр кулун тутар 5 күнүгэр Норуот маастарын күнэ бэлиэтэнэр буолбута. Төһө даҕаны тыйыс айылҕалаах сиргэ-уокка олордорбут, дьоҕурдаах, талааннаах дьонунан хатаҕаламмыт субъекпыт диэтэхпинэ, омуннаан этии буолбата чахчы. Бары итиннэ сөпсөһөр буолуохтааххыт.
Бу күн Саха сиригэр олорор норуоттар национальнай таҥастарын-саптарын таҥнан, Дьокуускай куорат киин уулуссатынан сэлэлии хаамсыы үтүө үгэскэ кубулуйбутун бэлиэтиибин. Быйылгы сэлэлии хаамсыы Улуу Кыайыы 80 сылыгар ананна. Бу бэлиэ даатаҕа сүгүрүйэн, ытыктаан, быйылгы тэрээһин хаһааҥҥытааҕар да өрө көтөҕүллүүлээхтик ыытылынна. Парадка барыта 27 улуус бэрэстиибэтэллэрэ, тыһыынчаттан тахса киһи сэлэлии хаамта. Тэрээһиҥҥэ аҥаардас Амма улууһуттан 80 киһи кытыыны ылла. Этэргэ дылы, киһи хараҕа халтарыйар кэрэ көстүүтэ. Өбүгэ саҕаттан илдьэ кэлбит үтүө үгэспитин, култуурабытын күн бүгүнүгэр диэри илдьэ кэлиибит, норуоппут дириҥ историятын сорҕотунан буолуон буолар.
Тэрээһин кыттыылаахтарын өрөспүүбүлүкэ Ил Дархана Айсен Николаев, култуура уонна духуобунай сайдыы миниистирэ Афанасий Ноев эҕэрдэлээтилэр. Парад кыттыылаахтара Орджоникидзе болуоссатыттан Өрөспүүбүлүкэ болуоссатыгар хаамсан кэлэннэр, оһуохайдаан ойдулар. Күн бүгүн Сахабыт сиригэр 316 норуот маастара баар.
Саха сирэ Россия судаарыстыбатын састаабыгар киириэҕиттэн манна сүүһүнэн ааҕыллар араас экспедициялар, биирдиилээн айанньыттар, промышленниктар сылдьыбыттара. Ити кэм устатыгар кинилэр Саха сирин төрүт олохтоох омуктарын: сахалар, эбээннэр, эбэҥкилэр, юкагирдар, чукчалар, о.д.а. тыһыынчанан оҥоһуктарын таҥаһыттн-сабыттан туттар тэрилигэр, араас бэйэлээх киэргэлигэр тиийэ Саха сирин, Россия тас өттүгэр таһаарбыттара. Оччолортон биһиги культурнай нэһилиэстибэбитигэр улахан интэриэс баара. Инникитин Норуот маастарын күнүн бэлиэтээһин өрөспүүбүлүкэбитигэр этнотуризм сайдыытыгар төһүүнэн буолара саарбаҕа суох.
Людмила НОГОВИЦЫНА
ПОДЕЛИТЬСЯ: