Бу түүн күн күбэй ийэ эмиэ хараҕын симэн ылбата. Утуйбакка эрэйдэнэ сытар киһиэхэ түүлэй түүн бу уһунун… Анал байыаннай дьайыыга сылдьар уолуттан сурах-садьык кэлбэтэҕэ ыраатта. Кыһыҥҥы халлаан суһуктуйа сырдыыта ийэ барахсан «оҕом бүгүн төлөпүөннүүр ини» диэн эрэл санаалаах оронуттан ойон туран, күннээҕи түбүккэ түспүтүнэн барда.
Кини — волонтер, суруналыыс идэлээх, саллаат ийэтэ Светлана Диодорова-Лаврентьева. Үгүстэр Светлананы билэр буолуохтааххыт. Бүгүҥҥү суруйуум биир идэлээҕим амарах санаалаах дьиэ кэргэнигэр ананыаҕа.
Оччоттон үтэн-анньан көрбүт
Светлана күн сирин көрүүтэ бэйэтэ туспа остуоруйалаах. Кинини оччоттон Дьылҕа хаан үтэн-анньан көрбүт эбит. Ол курдук, иһирэх ийэтэ Светаны Чурапчы киин балыыһатыгар оҕолоноругар олус уһуннук сүрэҕэ тэппэккэ, эмчиттэр сырдык тыына быһынна диэннэр палаататтан тахсан барбыттар.
Ол эрээри кэлэр киһи бу орто дойдуга син-биир кэлэр. Хирург киирэн, ийэ пульсун тутан көрбүт. Биллэр биллибэттик сүрэҕэ тэбэрин билэн, хачайдаабыттар. Ол кэнниттэн кэмниэ-кэнэҕэс ийэ тыынан, сүрэҕэ тэтимнээхтик тэбэн кэлбит. Үрүҥ халааттаах анньаллар олус диэн үөрбүттэр. Кыһыл оҕо бэбээрэр саҥата чочумча сатыылаабыт чуумпуну аймаабыт. Ити Света, Светлана Диодорова-Лаврентьева этэ.
Арай ийэ барахсан кыайан итинтэн тахсыбатах буоллун, кырачаан киһи тэҥинэн күн сырдыгын көрбөккө хаалыахтаах этэ… Света баччаҕа кэлэр быатыгар, барыта этэҥҥэ буолбута. Кыысчаан оскуоланы бүтэрэн, сөбүлүүр идэтигэр үөрэнэ киирбитэ.
Бэйэтигэр тардар күүстээх
Света үрдүк үөрэх кыһатыгар үөрэнэ сылдьан, холоонноох доҕорун, Чурапчы улууһун Мындаҕаайытыттан төрүттээх биир дойдулааҕын Владислав Диодоровы көрсөн, алаһа дьиэ тэриммитэрэ. Ити кэмҥэ Владик үлэлии сылдьара. Олунньу 19 күнүгэр Диодоровтар ыал буолан олорбуттара 25 сылын туолла.
2000 сыллаахха эдэркээн ыал уол оҕоломмуттара. Күн күбэй ийэ уолчааныгар амарах аҕатын аатын биэрбитэ. Вованы, Буобусканы көрбүт эрэ киһи барыта таптыыра, ымманыйара. Кини кыра эрдэҕиттэн наһаа актыыбынайа. Уһуйааҥҥа сылдьан, олоҥхолуура, хоһоон ааҕара. Оскуолаҕа үөрэнэр кэмигэр араас спортивнай күрэхтэһиилэргэ кыттара.
Вова Диодоровы мин эмиэ билэбин диэхпин сөп. Кини саха гимназиятыгар үөрэнэ сылдьан, норуодунай артыыстар Клавдия уонна Герман Хатылаевтарга барабааҥҥа оонньуура. Кэнсиэрдэргэ үҥкүүһүттэр сыанаҕа киирдэхтэринэ, биир саамай имигэстик хамсанар, күүстээх ньэгирдээх киһиэхэ хараҕын хатанааччы. Сол курдук барабааҥҥа оонньуур оҕолортон Воваҕа тута хараҕын хатанара. Кырачаан уолчаан оннук көрөөччүлэри бэйэтигэр тардар күүстээҕэ. Барабааҥҥа оонньуур оҕолортон саамай кыралара кини этэ. Сытыы-хотуу, барабааҥҥа олус үчүгэйдик оонньуур уолчааны көрөөччүлэр, бары таптаабыт, сөбүлээбит буолуохтаахтар.
— Вова бэйэтэ баҕаран, Хатылаевтар салайар барабанщиктарын ансамблыгар киирбит этэ. Итиннэ дьарыктанан оҕом олох сахалыы тыыҥҥа иитилиннэ. Клавдиялаах, Гермаҥҥа махталбыт муҥура суох. Саҥа дьыл иннинэ Вова байыаннай дьайыыттан уоппускаҕа кэлэ сылдьан, Хатылаевтарга ыалдьыттыы бара сылдьыбыта, — диэн Светлана кэпсээбитэ.
Уолчаан орто оскуола кэнниттэн медицинскэй колледжы үөрэнэн бүтэрэн, биэлсэр идэтин баһылаабыта. Вова үлэлии-үлэлии колледжыгар үөрэммитэ.
Уһуну-киэҥи толкуйдаабакка
Вова Диодоров саас муустаах ууга түһэн эрэр оҕолору быһаабытын, эмиэ үгүстэр истибит, куйаар ситимигэр аахпыт буолуохтааххыт. «Оҕолор ууга былдьанаары гыммыттарын көрөөт да, уһуну-киэҥи толкуйдаабакка эрэ, быыһыы ыстаммытым», — диэн уолчаан ийэтигэр кэпсээбит.
— Дьиэбэр олордохпуна, ватсапка «оҕолору быыһаабыт бу эн уолуҥ дуо?» диэн иһитиннэрии бөҕө кэллэ. Инстаграмы көр, куйаар ситимэ барыта эн уолуҥ туһунан диэтилэр. Кырдьык, куйаар ситимигэр икки уол үс оҕону муустаах ууга түһэн эрэллэрин быыһаабыттар диэн иһитиннэрии бөҕө эбит. Уолбар хаста да төлөпүөннээтим, олох төлөпүөнүн ылбат. Онтон дьэ ылла. «Кафеҕа киирэммит иттэ, чэй иһэ олоробут», — диэн кэпсээтэ. Ол түүн быһылааны эргитэ саныы-саныыбын олох кыайан утуйбатым, — диир Светлана.
Ити оҥорбут хорсун быһыытын иһин Вова Россия ыксаллаах быһыыга-майгыга министиэристибэтиттэн мэтээлинэн наҕараадаламмыта. Киһи эрэ барыта итинник хорсун быһыыны кыайан оҥорбото биллэр.
Ылсыбытын тиһэҕэр тиэрдэр
Биир сайын ойуур баһаардара наһаа да элбэхтик тура сылдьыбыттара. Ону тэҥэ хоруона дьаҥа үгэннээн турара.
— Ол сайын Вова Уус-Алдаҥҥа тутууга үлэлии сылдьыбыта. Чурапчы улууһугар киһи өлүүлээх баһаар буолбутугар, эмчит наада диэннэр, уолбун ыҥыран ылбытым. Мин Ил Түмэн депутата Михаил Дмитриевич Гуляевтыын дьоммутугар-сэргэбитигэр өйөбүл буолаарыбыт, онно баарбыт. Вова манна балаһыанньа куһаҕана суох эбит диэт, баран хаалбыта. Икки эрэ күн сылдьыбыта быһыылааҕа. Ийэ күлүгэр сылдьарын сөбүлээбэтэ.
Сотору буолан баран, миэхэ Дьокуускайтан төлөпүөн кэллэ. «Светлана Владимировна, Владимир Владиславович Диодоров диэн эн уолуҥ дуо? Уус-Майаҕа тайҕа баһаарыгар биригээдэ тэринэн, бэйэтэ салайан, баран эрэр. Бөртөлүөккэ көтөөрү киирдилэр», — диэтилэр. Тайҕа баһаара диэн алдьархай буоллаҕа. Эрдэ биллэрбиттэрэ да буоллар, мин кинини кыайан тохтоппоппун билэбин. Эппитин хайаан да толорор идэлээх. Тайҕаҕа сибээс суох буолан, кыайан кэпсэппэт этибит. Онно эмиэ санаарҕааһын баара. Улуус баһылыгыттан Махтал суруктаах оҕом ыран-дьүдэйэн аҕай дьиэтигэр кэлбитэ, — диэн кэпсээбитэ ийэ.
Ити үөһээ кэпсэниллибит түгэннэртэн Вова элбэх киһиэхэ тиийбэт үтүө хаачыстыбалааҕа, ылсыбыт дьыалатын хайаан да тиһэҕэр тиэрдэр дьиҥнээх эр киһилии майгылааҕа көстөн кэлэр.
Дууһаҕа аймалҕан
Диодоровтар ыал волонтер дьыалатыгар ылсыылара уолларыттан Воваттан саҕаламмыта. Уолчаан аармыйаҕа сулууспалыы барбыта. Вова М.И. Калинин аатынан Суворов, Октябрьскай Өрөбөлүүссүйэ уордьаннардаах Таманскай дивизияҕа түбэспитэ. Кини аармыйаҕа сулууспалыы сырыттаҕына, анал байыаннай дьайыы саҕаламмыта. Саха сириттэн сылдьар хас даҕаны уол байыаннай дьайыыга кыттар гына контракка илии баттаан кэбиспиттэр этэ. Ол иһигэр Вова Диодоров баара.
Атырдьах ыйыгар диэри ити контрагы тохтотуохха сөптөөҕө. Светлана толкуйа уолаттарга хайдах гынан көмөлөһөбүн диэн буолбута. Москваҕа айаҥҥа туруммута. Киниэхэ урукку военком, Ил Дархан, бырабыыталыстыба дьаһалтатын салайааччыта Гөоргий Михайлов, бырабыыталыстыба бэрэссэдээтэлин солбуйааччы Ольга Балабкина, Ил Түмэн депутата Михаил Гуляев, айылҕаттан айдарыылаах Эдьиий Дора күүс-көмө, өйөбүл буолбуттара. Бырабыыталыстыба дьиэтин остолобуойа сахалыы ас бөҕөтүн астаабыттара. Өрөспүүбүлүкэ Ил Дархана Айсен Николаев Светлананы кытта мэлдьи сибээскэ сылдьыбыта.
— Бастаан элбэх дьааһыктардаах малы илдьэ барар уустуктардааҕа. Багажпын барытын бэйэм төлөөбүтүм. Кэлин барарбар Ольга Балабкина дьааһыктардаах эмп-том бөҕөтүн ыыппыта. Уолаттарга бэлэх гынан туттарарга саха быһахтардаах этим. Ону биир байыаннай киһи истэн, харабыл киһилээх бар диэн сүбэлээбитэ. Мин кыра кыыспын Дайаананы илдьэ барбытым, — диир Светлана.
Байыаннай чааска мээнэ киһи кыайан киирбэт. Ол эрээри Светланаҕа ааннара барыта арыллан испит. Кини Саха сириттэн сулууспалыы сылдьар отучча уолу муспута. Дойдуларын аһынан-үөлүнэн күндүлээбитэ. Санааларын-оноолорун истибитэ. Ол гынан баран Светлана байыаннай дьайыыга кыттан кэлбит уолаттары кыайан уоскуппатаҕа. Онон кини сенатор Егор Борисовтан уолаттары кытта кэпсэтэригэр көрдөспүтэ.
— Егор Афанасьевич тута сөбүлэспитэ. Дивизияҕа тиийэн, уолаттары кытта эһээлии эйэҕэстик кэпсэппитэ. Наһаа үчүгэйдик уоскуталаан кэбиспитэ. Билигин уолаттар ону наһаа күндүтүк саныыллар. Кэлин эргитэ санаан көрдөхпүнэ, наһаа да хорсуннук быһыыламмыт эбиппин. Байыаннай чаас аттыгар «уолаттарбытын төнүннэриҥ» дии-дии ытыы сытар ийэлэр бааллара. Саха сирин саллааттарын ийэлэрин Мария Емельянованы хайдах сылдьара буоллар диэн санаан ылбытым.
Байыаннай чааска хаста да бара сылдьыбытым. Итиннэ барытыгар бырабыыталыстыба уонна Ил Түмэн өйөбүл буолбуттара. Коллегаларым, Ил Түмэн үлэһиттэрэ, биирдиилээн дьон ас астаан биэрэллэрэ.
Бастаан анал байыаннай дьайыыга барыахтаах түөрт уолтан үстэрин оробуочай бөлөххө көһөртөрбүтүм. Бэйэм оҕом медицинскэй үөрэхтээх буолан, хайдах даҕаны гынан көһөрөр кыаллыбат этэ, — диэн кэпсээбитэ Светлана Владимировна.
Ийэ барахсан уолун атаарарыгар санаарҕыы сылдьарын, чып кистээбитэ. Үөрбүтэ-көппүтэ буолан, мичээрдээн, курутуйбакка, харах уута суох атаарбыта. Олус муударайдык быһыыламмыта. Дьиҥэ, дууһатыгар, этэргэ дылы, буурҕа ытыллара. Анал байыаннай дьайыы бастаан саҕаланыыта, соһуччута бэрдиттэн, чахчы аймалҕан этэ эбээт. Оҕолорун, кэргэттэрин, чугас дьоннорун ыытан эрэр дьоҥҥо ити икки-үс бүк ыарахан буоллаҕа.
Светлана түүн Вованы уонна табаарыһын казармаларыттан күрэтэн илдьэн, гостиницаҕа хоннорбута. Ити сайын этэ. Ас бөҕөтүн аһаппыта. Уолун атааран, аймаммыт ийэ Москваҕа чороҥ соҕотох туран хаалбыта. Ил Дархан, бырабыыталыстыба дьаһалтатын салайааччыта Гөоргий Михайлов Светлананы Бэс Чагда санаторийга тиийэн, сытан уоскуйа түс диэн сүбэлээбитэ. Онно тиийэн, биир дойдулаахтарбын, эбээлэри уонна эһээлэри көрсөммүн, аралдьыйаммын, кырдьык сэргэхсийэ түспүтүм. Онно да сытан, үлэм курдук, дивизияҕа тиийэммин уолаттары кытта билсэ турарым. Төлөпүөннээтилэр эрэ, байыаннай чааска барарым. Итинник сылдьаммын, элбэх уолу тохтоппуппун быһыылаах. Билигин ол оҕолор наһаа махтаналлар. Кэлин сорохтор хантараагынан анал байыаннай дьайыыга кытта барбыттара. Балыыһаҕа эмтэнэ киирбиппэр, олох билсэ сыппыттара. Манна бааллар ас бөҕөтүн аҕалар этилэр. Үтүө үтүөнэн төлөнөр дииллэрэ, ити эбит.
Оттон мин кинилэр кыһалҕаларыгар мэлдьи көмөлөһөбүн. Таҥастара суох буоллаҕына, харчы була охсон, атыылаһан биэрэбин, Олох оҕолорум кэриэтэ, — диэн кэпсээнин салҕаабыта Светлана.
Тустаахтарга олус ыарахан
Хомойуох иһин, Вова анал байыаннай дьайыыга бастаан барыытыгар бааһырбыта. Госпитальга сытан эмтэммитэ. Төрөөбүт-үөскээбит дойдутугар төннөн кэлэн баран, өр тэһийэн-тулуйан сылдьыбатаҕа. Кини иккистээн анал байыаннай дьайыыга хантараак баттаан барбыта.
Үөһээ этэн аһарбытым курдук, ийэлээх аҕа уоллара төлөпүөннүүрүн, эбэтэр ватсабынан суруйарын кэтэспитэрэ икки ыйтан орпут. Утуйар уулара уу буолбат. Доруобуйаларыгар кытта оҕустарбыттар. Ийэлээх аҕа балыыһаҕа эмтэнэн тахсыбыттар. Вова симэммит харыйаны наһаа сөбүлүүр, видеосибээһинэн кэпсэттэҕинэ, көрдөрүөхпүт диэннэр, Саҥа дьыллааҕы харыйаларын хомуйбакка туруораллар.
— Муустаах ууттан оҕолору быыһыыр, тайҕа баһаарыгар барар, төрөөбүт дойдутугар бэриниилээх киһи иккистээн анал байыаннай дьайыыга барбыта өйдөнүллэр. Барарыгар ханна мэҥнээҕин, шрамнааҕын, барытын көрдөрөн барбыта. Кулҕаагын хаартыскаҕа түһэртэрбитэ. Хас биирдии киһи кулгааҕын раковината тус туһунан буолар үһү. Уолум эмчит идэлээх буолан билэр эбит. Ити барыта тустаахтарга олус ыарахан. Маны барытын ис дьиҥин чугас киһилэрэ байыаннай дьайыыга кытта сылдьар эрэ дьон өйдүүллэр.
Оҕоҥ өлбүт саллааты тиэйэн иһэр видеотун, эбэтэр чалбахтан уу иһэ олорор хаартыскатын көрө-көрөҕүн хайа киһи аймаммат буолуой?
Оҕобут блиндаһын көрбүппүт. Наһаа да үчүгэйдик туттан-хаптан олорор. Оннооҕор хамандыыра ымсыыран, киирэн хонор эбит. Вова төлөпүөннээтэҕинэ, уруккуттан ырыанан кэпсэтээччи. Мин санаабын көтөҕөөрү буолуо, – диир Светлана Владимировна.
Светланалаах Владислав волонтердаан, үтүөнү оҥорон, саллаат уолаттар махталларынан кынаттаналлар. «Волонтердааһын диэн мээнэ киһи ылсыбат дьыалата, үлэтэ. Сороҕор дьон арааһы саҥараннар хомотооччулар», — диэн этэр Светлана. Кырдьыга да оннук. Владислав төһөлөөх элбэх эти-аһы, барытын ыйааһыннаан, дьааһыктарга хаалаан, ону ыһыллыбат гына суулаан, суруйан, үгүс түбүгү көрсөр. Светланалаах Владислав төһөлөөх элбэхтик байыаннай дьайыы буола сылдьар сирдэригэр, госпиталларга тиийэннэр саллааттары кытта сирэй көрүстүлэр, дойдуларын ахтылҕаннаах аһынан күндүлээтилэр. Ити эттэххэ эрэ дөбөҥ. Киһиттэн төһөлөөх тулууру, дьулууру, сыраны эрэйэрэ буолуой?
Амарах санаа аргыстаах
Диодоровтар дьиэ кэргэттэрэ урут уруккуттан амарах дьыаланы оҥоруунан дьарыктаналлара. Ити туохтан саҕаламмытай?
Биир үтүө күн ыал аҕа баһылыга Владислав маҕаһыыҥҥа килиэп атыылаһа тахсыбыта. Онно биир кырачаан уолчаан аҕатыттан кэмпиэттэ атыылас диэн көрдөһө турарын көрбүт. Онтуката аҕата сакалаат буолбакка, пиибэ атыыласпыт. Ону көрөн, Владислав олус диэн хомойбут уолчааҥҥа араас сакалааттары атыылаһан биэрбит. Аҕа даҕаны, оҕо даҕаны олус диэн соһуйбуттар уонна сиэттиһэн баран, бара турбуттар. Уолчаан соһуччу бэлэхтэн үөрбүт мөссүөнэ киниэхэ хараҕар хатанан хаалбыт буолуохтаах.
— Кэргэним наһаа санаата түспүт этэ. Өр баҕайы оронугар сыппыта. Онтон туран баран: «Света, төһөлөөх элбэх оҕо ити көрбүт уолчааным курдук эрэйи көрө сылдьаллара буолуой? Оҕо дьиэтин булаар эрэ, бэлэх оҥороммут бара сылдьыахпыт этэ», — диэбитэ. Оччолорго мин араадьыйаҕа үлэлии сылдьарым. Түргэн үлүгэрдик «Берегиня» оҕо дьиэтин булбутум. Саҥа дьылга оҕолорго бэлэхтэри оҥорон, илдьэн туттарбыппыт, — диир ыал ийэтэ.
Ити кэнниттэн Мэҥэ-Хаҥалас улууһун Балыктааҕар баар оҕо дьиэтин кытта Диолоровтар дьиэ кэргэттэрэ үлэлэспиттэрэ. Балыктаахха оҕо дьиэтэ баарын туһунан кинилэргэ Света аҕата кэпсээбит. Биэс сыл устата, оҕо дьиэтэ үлэтин тохтотуор диэри бу ыал кинилэргэ кыралыын-улаханныын күүтэр-кэтэһэр Саҥа дьыл бырааһынньыгын тэрийэргэ көмөлөспүт. Бэлэхтэри оҥорон, артыыстары таһааран, ыллатан-туойдаран, оҕолор барахсаттары сэргэхсиппиттэр, санааларын көтөхпүттэр. Оннооҕор Балыктаах орто оскуолатын үлэһиттэрэ ымсыырыахтарыгар, холбуу бииргэ быраһынньыктары тэрийиэхтэригэр диэри үчүгэй бырааһынньыктар ыытыллыбыттар.
Тургутуу
Ыал ийэтэ Светлана араадьыйаҕа үлэлии-хамсыы сылдьан, олох өссө биир кытаанах тургутуутугар түбэһэ сылдьыбыта. Үлэлии олордоҕуна, хаана барбыта. Ол кэнниттэн искэннээх ыарыы буулаабытын билбитэ. Биллэн турар, бастаан утаа санаата күүскэ түспүтэ. Олоҕо түмүктэммит курдук санаабыта.
— Кэргэним Владислав тута Соҕуруу Кореяҕа барыахха диэбитэ. Манныка чугас дьонуҥ, коллегаларын өйөбүллэрэ олус наада. Сеулга эпэрээсийэҕэ киирэрбэр, кэргэммэр Владикка хайаан да үтүөрүөм, оҕолорбутун атахтарыгар туруоруохпут диэн эрэннэрбитим. Элбэҕи ааспытым. Олох киһини ыстаал курдук хатарар эбит, — диир Светлана.
Амарах санаалаах дьиэ кэргэн Соҕуруу Кореяҕа да мээнэ сылдьыбатахтара. Светлана Владимировна тылбаасчыты кытта мэрияҕа тиийбитэ. Саха сириттэн эмтэнэ кэлэр дьоҥҥо көмөлөһүҥ диэн көрдөспүтэ. Кореецтар кини этиитин быһа гымматахтара. Саха сириттэн эмтэнэ кэлэр дьону анал бырагыраамаҕа киллэрэннэр, буор босхо олорор дьиэнэн хзааччыйар буолбуттара. Элбэх киһи абыраммыта. Улахан дьыала оҥоһуллубута.
— Кэриэйдэр ыалдьытымсахтарыттан, эйэҕэстэриттэн сөхпүтүм. Киһи соһуйуоҕун курдук кыһаллаллара. Эмтэнэ кэлэр дьон дьиэлэригэр ууга, туалетнай кумааҕыга, мас арыытыгар, сымыыкка тиийэ уураллара. Биир дойдулаахтарым буор босхо олоробут дуо диэн наһаа соһуйаллара уонна махтаналлара.
Кыһалҕаҕа киирдэхпинэ, бэйэбэр киирэн, сабьллан хаалар идэлээх эбиппин. Ити ыалдьыбыппын кимиэхэ да кэпсээбэтэҕим. Сорохтор Кореяҕа күүлэйдии сылдьар дии санаабыттар этэ.
Биир кыһалҕалаах дьон доҕордоһуулара диэн наһаа күүстээх буолар эбит. Тааттаттан сылдьар Аанчыктыын наһаа ыкса дьүөгэлэспиппит. Бэйэм саастыы кыыс этэ. Сиринэн айанныыр кыаҕа суох кыыһы бөртөлүөккэ атаарбытым, наһаа да ыарахан этэ. Төрөөбүт күнүгэр тыыннаах сибэкки букетын ыыппытым. Онно хаартыскаҕа да түһэр кыаҕа суох сытаахтыыра. Аанчыгым тохсунньуга күн сириттэн барбыта. Билигин оҕолоро улаатан эрэллэр. Тааттаҕа тиийдэхпинэ, кини дьонугар сылдьабын. Кинилэр мин туспар наһаа «ыалдьаллар», — диэн кэпсээбитэ Светлана Владимировна.
Светлана итинник кыһалҕаҕа түбэспит дьоҥҥо санааларын олох түһэрбэттэригэр, олоххо тардыһалларыгар, олохтон үчүгэйин, кэрэтин эрэ көрөллөрүгэр сүбэлээбитэ.
* * *
Амарах санаалаах Диодоровтар дьиэ кэргэттэрэ атыттарга холобур эрэ буолуох тустаахтар. Саллаат оҕолорун дьылҕатыттан дууһа аймалҕанын, дууһа ыарыытын ийэ уонна аҕа сүрэхтэрэ эрэ билэн эрдэхтэрэ. Туора киһи ити ис дьиҥин билбэт. Маннык дьоммутугар туох кыалларынан күүс-көмө, өйөбүл буолуохтаахпыт, кинилэр кыһалҕаларын өйдүү сатыахтаахпыт. Ордук истиҥ сыһыаммытынан уонна үтүө тылбытынан…
Людмила НОГОВИЦЫНА
ПОДЕЛИТЬСЯ: