Олунньу 19-20 күннэригэр Благовщенскайга «БГПУ-2025 кубога» диэн волейболга Дальнай Восток регионун үрдүк таһымнаах күрэхтэһиитэ ыытылынна. Үөрүүлээҕэ диэн, бу күрэхтэһиигэ Саха сирин хамаандата кыайыылааҕынан таҕыста. Күрэхтэһиигэ аҕыс хамаанда күөн көрүстэ.
Биһиги волейболистарбыт бэйэлэрин бөлөхтөрүгэр ситиһиилээхтик оонньоон, быһаарыылаах киирсиигэ «Амурстрой» хамаандатын кытта көрүстүлэр. Наһаа сытыытык, тыҥааһыннаахтык барбыт оонньууга 0:2 хотторон иһэн, кыайыыга дьулуурдарын, кытаанах санааларын көрдөрөн, түмүккэ 3:2 ахсаанынан кыайан таҕыстылар. Бу оонньуу – күрэхтэһии саамай көстүүлээх, дьон сэҥээриитин ылар оонньуунан буолла.
Саха сирин хамаандатыгар Денис Лисачев, Денис Осетров, Андриан Григорьев, Кирсан Эверстов, Айтал Шишигин, Денис Шестаков оонньоотулар. Күрэхтэһии түмүгүнэн Денис Шестаков – бастыҥ оонньооччунан ааттанна. Хамаанданы тренер Айсен Жерготов бэлэмнээтэ.
Кыайыылаахтарга эҕэрдэ!
Манна сыһыары тутан эттэххэ, олунньу 26 күнүттэн – кулун тутар 2 күнүгэр диэри Намҥа, Саха Республикатын волейболга эр дьоҥҥо үрдүкү лигатын чемпионата ыытыллар.
«Дьулурҕан».
ПОДЕЛИТЬСЯ: