Ааспыт өрөбүл күннэргэ Сунтаарга ыытыллыбыт Н.Н. Тарскай аатынан көҥүл тустууга биирдиилээн уонна хамаанданан күрэхтэһиини «Мамонт» ханаалга сирийэн көрдүм. Сунтаар улууһун салалтата уонна олохтоохторо, Өрөспүүбүлүкэтээҕи көҥүл тустуу федерацията уонна туһааннаах министиэристибэ тустуу сүгүрүйээччилэригэр улахан бырааһынньыгы бэлэхтээбиттэригэр барҕа махтал тылларын тиэрдэбин.
Күүстээх эдэр тустууктар ДФО улахан дьоҥҥо чемпионнара Эдуард Попов (65 кг) уонна Игорь Матвеев (70 кг), Россия эдэрдэргэ призера Роман Николаев (79 кг), Д. Крылов аатынан Бүтүн Россиятааҕы турнир призера Василий Винокуров (65 кг), күүстээх спорт маастардара Станислав Свинобоев уонна Даниил Иванов, республика сэттэ төгүллээх чемиона Константин Власов уонна да атыттар араас биричиинэнэн кыттыбатахтара күрэхтээһии күүрээнин намтаппата.
Эрдэттэн Чурапчылар бастыыллара биллэрэ, иккис миэстэ иһин эдэр тустууктардаах Сунтаардар уонна тустуулара киэһэрэн эрэр тустууктардаах Мэҥэ Хаҥаластар киирсэллэрэ сабаҕаланара. Уус Алданнар састааптарыгар күүстээх тустууктар суох да буоллаллар, бочуоттаах төрдүс миэстэни ылбыттара хайҕаныан эрэ сөп. Элбэх күүстээх тустууктардаах Таатталар, Аммалар, Хаҥаластар, Дьокуускайдар, Намнар, Бүлүүлэр уонна Үөһээ Бүлүүлэр толору састааптаах хамаанданы туруорбатахтара өйдөммөт. Арааһа хапсаҕайынан үлүһүйэннэр тустууну көйгөттүлэр быһыылаах. Өрөспүүбүлүкэ сорох күүстээх тустууктара биирдии-иккилии ыйааһын өрө тахсан туһуннулар, ол иһин ыйааһын лидердэрин быыһаарар уустуктардаах буолла. Холобур, Олег Фомин уонна Уйгулаан Иванов иккилии ыйааһыны көттүлэр.
Чугас сылларга Чурапчы улууһун хамаандатын куоһарар улуус баар сибикитэ биллибэт. Ол да иһин, сорох улуустар хаһан кэлэн бастаары диэн матыыптаан, Тарскай күрэхтэһиититтэн сыыйа-баайа туораан иһэллэр. Кэлэр өттүгэр Чурапчытааҕы судаарыстыбаннай физкультура уонна спорт институтун студеннарын төрөөбүт улуустарыттан туһуннардахха эрэ, улуустар икки ардыларыгар конкуренция тыына билиннэҕинэ, Н.Н. Тарскай аатынан өрөспүүбүлүэтээҕи күрэхтэһии суолтатын сүтэриэ суоҕа.
Түмүккэ, тустуук этикатыгар тохтуом этэ. Сорох тустууктар тэпсиллибит кирдээх муоста устун хааман кэлэн көбүөргэ үктэнээт борцовкаларын тиҥилэҕин тарбахтарынан-ытыстарынан сотоллор, дьэ ол кэннэ кирдээх ытыстарынан утараһааччыларын уонна көбүөр судьуйатын кытта илии тутуһаллар. Хапсыһыы кэмигэр бааһырыы-дьуккуруйуу элбэх, ону кирдээх илиилэринэн соттоллор. Кэтээн көрдөххө, тустууктар баастарыгар-дьуккурууйаларыгар араас сүһүрдэр инфекция киирэн бытаанннык оһоллор эбит. Өрөспүүбүлүкэ тустуутун федерацията уонна тустаах министиэристибэ санитарнай-гигиеническэй ирдэбиллэргэ олоҕуран борцовка тиҥилэҕин уонна көбүөрү ытыһынан сууралааһыны уонна ыраастааһыны бобор ирдэбиллэри олохтуура олох ирдэбилинэн буолла.
Максим Афанасьев, Дьокуускай, Марха түөлбэтэ
ПОДЕЛИТЬСЯ: