Ааспыт өрөбүллэргэ норуот духуобунай сирдьитэ Борис Неустроев-Мандар Уус 80 сааһыгар анаммыт өрөспүүбүлүкэтээҕи «Дархан Уус» тимир уустарын сүрүн түһүлгэтэ ыытылынна.
Бу быыстапкаҕа 80 тахса тимир ууһа кыттыыны ылла. Бэйэм саха быһаҕын интэриэһиргиир буолан түһүлгэ кыайыылаахтарын хото хаартыскаҕа түһэртээтим уонна санааларын үллэһинним.
«Дэгиттэр быһах» тургутуу кыайыылааҕа, Уус Алдан улууһун Байаҕантай нэһилиэгиттэн төрүттээх, Илья Готовцев:
«Уһаммытым сэттис-ахсыс сыла буолла, “Дархан Ууска” 2017 сылтан кыттабын, бу бэһис кыттыым, бастаан аҕабын Роман Ильич Готовцевы-Мындыр Ууһу кытта уһанан саҕалаабытым. Бу күрэхтэһиигэ хас сыл аайы миэстэлэһиэхпин баҕарабын да кыайтарбат, бииртэн биир үчүгэй уус тахсан иһэр. Бу быһахпын сүрдээх уһуннук оҥостубутум, үс күрэхтэһиигэ кыра-кыралаан биитин көннөрө-көннөрө кыттан миэстэлэһэр этим уонна быйыл дьэ, бастыҥ быһах буолла. Тургутууга саамай ыарахан көрүҥнэринэн алтан туруупка уонна тайах муоһа этэ».
«Уус уран оҥоһуулаах быһах» тургутуу кыайыылааҕа Сандал Мордосов Дьокуускай куоракка олорор, Ленскэй улууһун Бэчинчэ нэһилиэгиттэн төрүттээх. Бу күрэхтэһиигэ аан бастаан кыттаат да, бастакы миэстэни ылбыт.
«Олоҥхону саныы олорон быһахпын охсубутум, — диир кини. — Манна үөһэ дойду айыылара, орто дойду дьоно, аллараа дойду абааһылара бааллар. Бу дьоннор айыылартан күүс-көмө көрдөһө тураллар, оттон бу халлаан күүһэ абааһыны өлөрөн эрэр. Дьиҥэр мин ювелирбын, аҕыс сыл анараа өттүгэр Дьокуускайдааҕы художественнай коллеһы бүтэрбитим, ол кэннэ “Киэргэҕэ” ювелирынан үлэлээбитим. Бу соторутааҕыта эрэ тимиринэн уһаныыга көспүтүм. Билигин “Одун Хаан” диэн мастарыскыайдаахпыт, үһүө буолан онно дьарыктанабыт. Инстаграмҥа (бобуулаах ситим) баарбыт, атыыга быһахпытын таһаарабыт”, — диир.
«Бастыҥ ас быһаҕа» тургутуу кыайыылааҕа Мандар Уус үөрэнээччитэ Степан Пахомов Таатта Баайаҕатыттан төрүттээх. Уонтан тахса сыллааҕыта, оччолорго оскуола оҕото бадаайы күрэҕэр аан бастаан кыттаат бастаан турар. Мин ол бадаайыны атыыласпыт дьоллоохпун. Онон билэр киһибин көрсөн, үөрэ-көтө кэпсэттим.
“Билигин куоракка олоробун, уһанабын, — диэн кэпсиир Степан. -Хас биирдии уус бэйэтэ туспа ньымалаах буолар, ол курдук дэгиттэр уонна аска туттуллар быһахтар олох тус-туспалар. Мин бу сырыыга аска туттуллар быһах күрэҕэр кытынным. Маннык күрэхтэһии наһаа наадалаах, атын уустары көрөн, бэйэҕин тэҥниигин, кинилэртэн туохха эрэ үөрэнэҕин. Мин бу күрэхтэһиигэ сыл ахсын киирсэбин, иллэрээ сыл ас быһаҕар иккис буолбутум, ол иннинэ оһуорга кыттыбытым. Куруук да буолбатар, кыралаан миэстэлэһэбин».
Степан оҕо эрдэҕиттэн Мандар Уус куруһуогар дьарыктанан улааппыт. Бадаайы күрэхтэһиитигэр бастаан баран, Өймөкөөҥҥө баран эмиэ ситиһиилээхтик кыттан табанан наҕараадаламмыт. Баайаҕаҕа батыйа күрэҕэр, норуоттар икки ардыларынааҕы «Клинок» күрэҕэр эмиэ бастаабыт
“Элбэх үлэттэн ситиһии кэлэр. Улахан убайдардаах буолан, тимири үөрэтэн маннык таһымҥа таҕыстаҕым. Учууталларбар барҕа махтал”, — диир кини.
Дьэ маннык күрэхтэһиилэр сыллата ыытылла, кыттааччыта сылын аайы эбиллэ турар буоланнар, төрүт үгэспит тыыннаах, салҕана турарыгар эрэллээхпит.
Виктор Эверстов
ПОДЕЛИТЬСЯ: