Өрөспүүбүлүкэтээҕи доруобуйаларынан хааччахтаах дьон уопсастыбатын бэрэссэдээтэлэ Ирина Васильевна Лебедеваны кытта Москва куоракка буолбут Россиятааҕы доруобуйаларынан хааччахтаах дьон уопсастыбаларын Президиумун мунньаҕын туһунан сэһэргэстим.
— Ирина Васильевна, Москва куоракка баран кэллиҥ, ол туһунан баһаалыста сиһилии кэпсээ эрэ.
— Икки күн устата, олунньу 4-5 күннэригэр киин куоракка Бүтүн Россиятааҕы инбэлииттэр уопсастыбаларын Президиумун мунньаҕа буолан ааста. Мунньахха регионнар икки ардыларынааҕы сэбиэттэр бэрэссэдээтэллэрэ, Президиум чилиэннэрэ уонна хонтуруоллуур, ревизиялыыр хамыыһыйа бэрэссэдээтэлэ А.Б. Толстов кыттыыны ыллылар.
Бастакы күҥҥэ доруобуйаларынан хааччахтаах дьон олохторун хаачыстыбатын үрдэтиигэ кыттыгас тэрилтэлэртэн «РЖД» «Россия тимир суоллара» уонна «Федеральнай пассажирскай компания» бэрэстэбиитэллэрэ ыҥырыллан үлэлэрин сиһилии кэпсээтилэр. Бүтүн Россиятааҕы инбэлииттэр уопсастыбалар бэрэссэдээтэлэ Михаил Терентьев 2024 сылга сүрүн хайысхаларынан үлэнэн хааччыйыы уонна Россияҕа доруобуйаларынан хааччахтаах дьону өйөөһүн боппуруостарыгар министиэристибэлэр уонна биэдэмистибэлэр бэрэстэбиитэллэрин кытта бииргэ үлэлээһин, сокуонунан аакталарын уонна чөлгө түһэрии киэптэрин ырытан оҥоруу туһунан кэпсээтэ. «Инбэлииттэр балаһыанньаларын тупсарыыга туһуламмыт сокуону оҥорууга кыттыы биһиги тэрилтэбит биир сүрүн хайысхатынан буолар. Ааспыт сылга киин аппараакка сокуон нуорматын докумуоннарын бырайыактара көрүллүбүттэрэ, инбэлииттэр олохторун хаачыстыбатын үрдэтэр сыалтан бэлиэтээһиннэр уонна этиилэр киирбиттэрэ», – диэн дакылааты Бүтүн Россиятааҕы инбэлииттэр уопсастыбаларын бэрэссэдээтэлэ Михаил Терентьев иһитиннэрдэ. Бүтүн Россиятааҕы инбэлииттэр уопсастыбаларын тутаах үлэһиттэрэ инбэлиит дьоҥҥо сыһыаннаах сокуоҥҥа киирбит докумуоннары олоххо киллэрдилэр. Чөлгө түһэрии ирдэбилин, тимир суол уонна салгын тырааныспарыгар табыгастаах эйгэни сайыннарыыга, инбэлииттэри үлэнэн хааччыйыыга, инбэлииттэри көрүү-истии, чөлгө түһэрии техническэй тэриллэринэн хааччыйыыга, туристическай индустриятын уонна да атын боппуруостарга сүбэ бэрилиннэ. Инбэлииттэр олохторун-дьаһахтарын сүрүн боппуруостарыгар этиилэрин, ону тэҥэ инбэлииттэр уопсастыбаларын регионнааҕы уонна олохтоох тэрилтэлэрин үлэлэрин боппуруостарыгар киэҥ далааһыннаах үлэ ыытыллыбытын ырытыстыбыт.
Ааспыт сылга барыта 950 тахса регион, онтон 2500 тахса олохтоох салайыы тэрилтэлэрэ араас хайысхалаах тэрээһиннэри ыыппыттарын иһитиннэрдилэр. Ону таһынан уопсастыбаннай тэрилтэ иһинэн үлэлиир экспердэр тиһиги быспакка эбийиэктэри паспордааһыҥҥа, национальнай туристическай суоллары чинчийиигэ, транспорка табыгастаах эйгэни сайыннарыыга кыттыыны ылбыттар. 2024 сылга дойду 84 регионугар олорор дьиэлэри чинчийиигэ үлэ барбыт. Бүтүн Россиятааҕы инбэлииттэр уопсастыбаларын иһинэн үлэлиир экспердэри бэлэмниир киин ситимигэр сэртипикээтинэн 66 экспертнэй киин аккредитацияламмыт олортон 40 экспертнэй киин Россия 35 регионугар үлэлиирин эттилэр.
— Саҥа сылга туох уларыйыылар киирдилэр?
— Президиум мунньаҕар уопсастыбалары үп өттүнэн өйөөһүн, тэрилтэбит улахан тэрээһиннэрин ыытарга сүбэлэһии, саҥа сүүрээннэри киллэриигэ үлэлээһин буолла. Манна даҕатан эттэххэ, инбэлиит дьахталлар бырааптарын көмүскээһиҥҥэ, кинилэргэ өйөбүл буоларга диэн уопсастыба иһинэн дьахталлар сэбиэттэрэ мантан инньэ үлэлиэхтэрэ. Бу Сэбиэти үлэлэтэргэ Коми Өрөспүүбүлүкэтин уопсастыбатын бэрэссэдээтэлэ Маргарита Михайловна Колпащиков аананна, солбуйааччытынан миигин таллылар.
— Инники былааҥҥыт?
— Биһиги тэрилтэбит улуустарынан отчуоттуур-быыбардыыр хампаанньата саҕаланна, онон үлэ күргүөмнээхтик бара турар. Бу үүммүт сылга Улуу Кыайыы 80 сылыгар туһуланар бары тэрээһиннэрбит ытык дьоммутугар махтал, сүгүрүйүү өйдөбүлүнэн ыытыллыахтара.
— Бу күннэргэ уопсастыба көҕүлээһининэн социальнай десант буолаары турар. Ол туһунан билиһиннэриэҥ дуо?
— Олунньу 27 күнүгэр бу акцияны саамай улахан улуустан – Мэҥэ Хаҥаластан саҕалыыбыт. Социальнай десант сыала-соруга – доруобуйаларынан хааччахтаах дьоҥҥо көмөлөһүү, сүбэлээһин уонна түмэ тардыы. Бу тэрээһиҥҥэ бииргэ үлэлэһэр партнердарбыт социальнай пуондаттан, дьарыктаах буолуу судаарыстыбаннай кэмитиэтиттэн, киһи быраабын көмүскүүр аппараттан, аҕа дойдуну көмүскээччилэр пуондатыттан уонна МСЭ-лэр кыттыахтара.
Кэпсэттэ Ньургуйаана Скрябина
ПОДЕЛИТЬСЯ: