Фашисткай Германияны утары барбыт 1418 хонуктаах Аҕа дойду сэриитэ оччотооҕу ССРС-н норуоттарын кыайыытынан түмүктэммитэ 80 сылын көрсө, Улуу Кыайыы Знамятын эстафетатын тэрээһиннэрэ сахалартан бастакы Советскай сойуус героя Федор Кузьмич Попов төрөөбүт сириттэн Мэҥэ Хаҥалас Баатара нэһилиэгиттэн саҕаламмыта, ол чэрчитинэн олунньу ый 13 күнүгэр Мытаахпыт нэһилиэгэр сахабыт сиригэр Ийэ тыл, сурук-бичик күнүгэр Кыайыы Знамятын үөрүүлээх түгэҥҥэ көрсүү тэрээһинэ норуодунай суруйааччы Софрон Петрович Данилов аатынан Дьиикимдэ орто оскуолатыгар ыытылынна. Бэлиэ күҥҥэ нэһилиэк эдэр ыччаттара, үлэ бэтэрээннэрэ, сэрии сылларын оҕолоро кыттыыны ыллылар, үөрүүлээх тэрээһиҥҥэ кэлбиттэр РФ, СӨ-н гимнарын ыллаан бүтээттэрин кытта оскуола бастыҥ үөрэнээччилэрэ: Аким Осипов, Кирилл Чемезов, Георгий Григорьев Кыайыы Знамятын күөрэччи тутан киллэрбиттэрин атахха туран көрүстүлэр.
Тэрээһиҥҥэ нэһилиэк дьаһалтатын баһылыга И.Е. Петров, ыччат лидера Сергей Высокомернай, тыыл, үлэ бэтэрээннэрин сэбиэтин бэрэссэдээтэлэ Л.Д. Павлова кыайыы элбэх сыранан, харах уутунан, өлүүнэн, алдьатыынан ситиһиллибитин бэлиэтээн тураннар аҕа көлүөнэ сүҥкэн суолталаах оҥорбут түгэннэрин үйэтитэрбит, эдэр ыччаттарга тиэрдэрбит наадатын тоһоҕолоон эттилэр, тэрээһиҥҥэ сэрии сылларын оҕолоро Иван Ефимович Парфенов, Герман Михайлович Епифанов ахтыылара барыбыт дууһатын долгутта, ол курдук И.Е. Пафенов төрөөбүт түөлбэтиттэн “Правда” холкуостан сэриигэ хаан уруу аймахтара уон киһи барбытыттан үс эрэ киһи тыыннаах эргиллэн кэлбиттэрин, Г.М. Епифанов сэрии кэмигэр Ленинград куорат блокадатыгар кэмигэр детдомҥа олоро сылдьан “Олох суола” диэн норуокка биллибит суолунан киин сиргэ кэлбитин эттилэр. Олохтоох библиотека уонна ыччат түмсүүтүн көҕүлээһиннэринэн биэс түһүмэхтээх кыайыы, сурук-бичик күнүгэр аналлаах “Толкуйдаа Оонньоо Кыай” диэн интеллектуальнай оонньуу тэрээһиннээхтик ыытылынна.
Николай Осипов РФ сурналыыстарын сойууһун чилиэнэ
ПОДЕЛИТЬСЯ: