Саха Сирин бастакы Президена М.Е. Николаев 1996 сыл олунньу 9 күнүнээҕи 1294 №-дээх «Төрөөбүт тыл уонна сурук-бичик күнүн биллэрии туһунан» Ыйааҕыгар олоҕуран, С.А. Новгородов төрөөбүт күнэ — олунньу 13 күнэ — Төрөөбүт тыл уонна сурук-бичик күнүнэн биллэриллибитэ.
Бу күн олохтонуута Саха сирин төрүт олохтоохторун төрөөбүт тылларын сайыннарыыга, бастакы саха суругун-бичигин олохтообут саха лингвист-учуонайа, бастакы саха үөрэҕин кинигэлэрин таһаарааччы Семен Андреевич Новгородов сырдык кэриэһин үйэтитэр, аатын ытыктатар соруктаах.
Бу күн араас үөрэх кыһаларыгар, культура кииннэригэр төрөөбүт тылга аналлаах араас тэрээһиннэр ыытыллаллар. Олунньу 13 күнүгэр Күндээдэҕэ олохтоох библиотекаҕа бэртээхэй тэрээһин буолан ааста. Тойугунан Валерий Платонов арыйда. Сахалыы хоһооннору кырачаан 1 кылаас оҕолоро хоһоон аахтылар,салайааччы Полина Васильевна Иванова. Араҥастаах детдомун иитиллээччилэрэ Степан Федотов, Николай Чуор, күндү күтүөттэр Ахмет Дмитриев, Дмитрий Пономарев СӨ суруйааччыларын чилиэннэрэ буолан үүнэн тахсыбыттарын туһунан Светлана Михайловна сырдатта. Олохтоох библиотекарь Татьяна Аркадьевна айар алыптаах Күндээдэттэн төрүттээх дьоннор тустарынан Раиса Горохова (Самсонова) — Туймаада дэгиттэр талааннаах учуутал, хоһоонньут, ырыаһыт, иистэнньэҥ туһунан видео көрдөрдө. Тэттик кинигэҕэ даҕаны хоһоонноро бэчээккэ тахсыбыт биир дойдулаахтарбыт туһунан Александр Егоров, Александра Варламова (Данилова), Акулина Старостина, Александра, Сардаана Гаврильевалар, Таисия Иванова туһунан билиһиннэрдэ. Аммосова Альбина — Күндээдинскэйэни дьүөгэтэ Акулина Романова слайд көрдөрдө араас кинигэлэргэ хоһоонноро киирбиттэрин туһунан. Альбина бэйэтэ айбыт ырыатын ыллыырын иһитиннэрдэ. Кини айбыт хоһоонун СВОҕа сылдьар уолаттарбытыгар анаабытын Ольга Петрова аахта.
«Ньурба уоттара» түмсүү салайааччыта СӨ суруйааччыларын чилиэнэ Дмитрий Пономарев билиҥҥи суруйааччылар, хоһоонньуттар тугу үлэлии сылдьалларын,былааннарын туһунан кэпсээтэ. Николай, Александр Ананьевтар хоһоонньуттар ырыаларын толордулар. «Күндээрэ» эбээлэр түмсүүлэрэ Альбина Күндээдинскэйэ хоһоонугар ырыанан түмүктээтилэр.
Сахалар тылбытынан,
Өрүү киэн туттуоххайыҥ,
Өбүгэлэрбит тылын,
Сыыһырдан бүтүөххэйиҥ.
Өрөгөйбүт үрдээтин,
Саха тыллаах элбээтин.
Акулина Романова
ПОДЕЛИТЬСЯ: