Горнай улууһун Солоҕон нэһилиэгин баһылыга Александра Павловна Александрова быйылгы сылы “Өбүгэ ситимин” сылынан биллэрбитэ, биһиги санаабытыгар олус сөптөөх, оруннаах…
Ону билбит курдук, соторутааҕыта, Муома улууһун гастрольнай биригээдэтэ кэлэн киэҥ программалаах концерт көрдөрөн көрөөччү кэрэхсэбилин, биһирэбилин ылыахтарын ылан бардылар…
Бу гастрольнай бөлөх салайааччыта “Осикат” этно-культурнай киин директора Алексей Алексеевич Варламов.
Театр историятыттан кылгастык билиһиннэрдэххэ маннык. Алексей Алексеевичаҕата Муома улууһун народнай театрын артыыһа Алексей Варламов. Кини Мэҥэ Хаҥаластан төрүттээх Муома күтүөтэ этэ. Василий Васильевич Аммосов – СР эдэр ыччат политикатын туйгуна, театр артыыһа Василий Аммосов (эмиэ Мэҥэттэн төрүттээх) уола “Халбас харата” көр-күлүү мини театр салайааччыта.
Ирина Иванова “Халбас харата” көр-күлүү мини театр артыыската, балта “Тэтим” үҥкүү ансамбылын салайааччыта Любовь Федорова – эбэлэрэ театр кассира этэ, эһэлэрэ Муома народнай театрын аксакала, сүрүн артыыһа, ийэлэрэ “Һээ—ку”үҥкүү ансамблын төрүттэспитэ.
Виталий Старков — талааннаах эдэр артыыс, көрдөөх сценкалар автордара.
Вячеслав Винокуров “Тэтим” үҥкүү ансамблын солбуллубат үҥкүүһүтэ. Кини эбэтэ Эллэйтэн сыдьааннаах Стручковтар кыра кыыстара Ирина Ивановна Винокурова Муома кийиитэ, народнай театр биир биллэр көрдөөх-талааннаах артыыската этэ. Кини уола Юрий Иванович театр уотун-күөһүн, муусукатын дьаһааччы этэ.
Сэбиэскэй кэмҥэ Муома народнай театра “дойду” сир диэки гастроллуу кэллэхтэринэ хайаан да Мэҥэ Хаҥалас уонна Горнай оройуоннарыттанүлэлэрин саҕалыыллара.
Тамара Константиновна Апросимова, Ирина Николаевна Слепцова Мэҥэ кыргыттара театры өр кэмҥэ салайан хоту дойду дьонун-сэргэтин олоҕун култуура нөҥүө көрдөрөн театр Аан дойдуга биллэрин ситиспиттэрэ. Бу үтүө үгэһи, өбүгэ ситимин салҕаан театр иитэн таһаарбыт оҕолоро, сиэннэрэ билигин ситиһиилээхтик үлэлии сылдьаллара олус кэрэхсэбиллээх, үөрүүлээх…
Хотугу норуоттар тэтимнээх үҥкүүлэрэ, ылбаҕай ырыалара, көрдөөх-нардаах, хамсаныылаах-имсэниилээх сценкалара көрөөччүлэр биһирэбиллэрин, кыра нэһилиэккэ сүүсчэкэ киһи мустубут саалатыттан “Браво” хаһыынан тиэртилэр.
Кэрэхсэбиллээх кэнсиэр бүтээтин кытта сценаҕа нэһилиэк дьаһалтатын баһылыгын солбуйааччыта Мария Юрьевна олохтоох дьаһалта, нэһилиэк аатыттан махталын этэн туран сэмэй бэлэх туттарда. Ол кэнниттэн Марина Ильинична ис-иһиттэн истиҥник иэйэн, үөрэн-көтөн туран эдьиийэ Ирина Ивановна сиэнигэр Вячеслав Винокуровка, бу саалаҕа мустубут дьон бары аймах буолалларын үөрүүлээх быһыыга-майгыга билиһиннэрдэ, ыалдьыттарга сэмэй бэлэхтэрин туттарда. Ол кэнниттэн нэһилиэк олохтоохторун көҕүлээһининэн хаартыскаҕа түһүү буолла…
Кэрэ кэнсиэри көрөн кэлээт да кэрэхсэбилим сүтэ илигинэ “Өбүгэ ситимэ” диэн хоһоону – ырыа тылын “Тэтим” үҥкүү бөлөҕөр анаан суруйдум:
“Тэтим” үҥкүү бөлөҕүн
Тэйэр-тэбэр кыргыттарын
Таптыы, сэргии көрөҕүн
Тэтимнээхтик хамсыылларын –
Хоту дойдум бэлэҕин
Хайҕаан, сөҕөн кэлэбин,
Өбүгэбит ситимин
Өйдөөн олус үөрэбин…
Хамсаныы аайы биллэр
Хоту дойдум уратыта,
Ааспыт үйэбит тиллэр
Абылаҥнаах музыката –
Хоту дойдум бэлэҕин
Хайҕаан, сөҕөн кэлэбин,
Өбүгэбит ситимин
Өйдөөн олус үөрэбин…
Дьэрэлийэр таҥас-сап
Дьүкээбили санатар…
Аҕырымнаабат алып
Аартыктаргытын аһар –
Хоту дойдум бэлэҕин
Хайҕаан, сөҕөн кэлэбин,
Өбүгэбит ситимин
Өйдөөн олус үөрэбин!
Ирина Ивановна хаан аймахтара
Александр Тарасов, Марина Павлова,
Солоҕон нэһилиэгин олохтоохторо.
ПОДЕЛИТЬСЯ: