Благовещенскайга, 18-гар диэри саастаах кыргыттарга уонна уолаттарга Дальнай Восток Федеральнай уокуругун тустууга күрэхтэһиитэ ыытыллан түмүктэннэ.
Биһиги хамаандабыт бу түһүлгэҕэ эриэ-дэхси ситиһиилэннэ. Ол курдук, түөрт уолбут бастаата: Антон Голиков (45 кг), Антон Григорьев (48 кг), Эрхаан Смирников (51 кг), Уйгун Бурцев (71 кг). Оттон кыргыттарга Алена Диодорова (69 кг) пьедестал үрдүкү үктэлигэр таҕыста.
Ылан көрдөххө, уолаттарбыт уон алта мэтээли, оттон кыргыттарбыт аҕыс мэтээли ылары ситистилэр. Итинэн кинилэр бары Россия быһаарыылаах түһүлгэтигэр кыттар быраабы ыллылар.
Кыайыылаахтары уонна мэтээлгэ тиксибит эдэр бөҕөстөрү барыларын, кинилэр тренердэрэ Н.Г. Яковлевы, П.С. Иванову, Р.А. Самсоновы, И.С. Петрову, М.Д. Аммосовы эҕэрдэлиибит!
Аны тустууну таптааччылар олунньу 14-15 күннэригэр Дьокуускайга буолар улахан дьоҥҥо көҥүл тустууга Дальнай Восток Федеральнай уокуругун чемпионатын кэтэһэллэр.
“Дьулурҕан”.
Хаартыскаҕа: В.П. Керемясов аатынан Дьокуускай куорат 3 №-дээх спортивнай оскуолатын тренерэ Николай Яковлев иитиллээччилэрин кытта.
ПОДЕЛИТЬСЯ: