Тохсунньу 19 күнүгэр М.Н. Жирков аатынан култуура дыбарыаһыгар буолбут “Чөмпүйүөннэр баалларыгар” 2024 сыл түмүгүнэн бастыҥ спортсменнар уонна тренердэр ааттара биллибитэ. Бастыҥ тренердэр ахсааннарыгар Саха Республикатын физическай култууратын уонна спордун туйгуна Халабышев Георгий Владимирович киирбитэ.
Георгий Владимирович Халабышев Бүлүүтээҕи В.Г. Румянцев аатынан ДЮСШ-ҕа «Саhарҕа» диэн секция тэрийэн, кикбоксинг көрүҥэр тренеринэн 2021 сылтан ситиһиилээхтик үлэлии сылдьар.
Үөрэх салаатыгар үлэтин аан бастаан Г.С. Донской аатынан Бүлүүтээҕи иккис нүөмэрдээх орто оскуолатыгар история учууталынан саҕалаабыта. Кини манна 9 сыл үлэлээбитэ. История учууталын быһыытынан кини үрдүк билиилээх этэ, ол курдук бэйэтин предметигэр БКЭ туругун туттаран, 100 баалы ылбыта. Онно сылдьан тренер быһыытынан үлэтин саҕалаабыта. 2010 сылтан спорка угуйан элбэх оҕону секциятыгар хабан эрчийэр, араас таһымнаах күрэхтэһиилэргэ кытыннарар. Билигин киниэхэ 30-ча оҕо дьарыктана сылдьар.
Үлэтэ, үрдүк таһымын иитэн-такайан таһаарбыт оҕолорун араас таһымнаах күрэхтэргэ ситиһиилэрэ туоһулууллар. Ол курдук, сыл ахсын оҕолор – өрөспүүбүлүкэ, Дальнай Восток, Россия чөмпүйүөннэрэ буолаллар. Холобура, 2021 сыллаах Европа чемпионатын призердарынан буолбуттара: Колтовской Харысхан уонна Павлова Надя. 2024 сыллааҕы аан дойдутааҕы “Азия оҕолорун” VIII спортивнай оонньууларыгар кини икки иитиллээччилэрэ Дорофеев Рудольф уонна Поскачин Айаал кыттыыны ылбыттара. Оттон Поскачин Айаал кикбоксинг көрүҥэр бастаабыта.
Хас сылын ахсын Георгий Владимирович иитиллээччилэрэ Бүлүү улууһун бастыҥ спортсмена аатын ылаллар. Ол курдук, Павлова Надя 2024 сыл түмүгүнэн улахан дьоҥҥо “Бастыҥ спортсмен” аатын ылла.
Эрсан СТЕПАНОВ, “Батыс” куруһуок, Н.И. Протопопова аатынан “Кэскил” оҕо айар-тобулар дьоҕурун сайыннарар киинэ.
Бүлүү к.
Хаартыскаҕа: улуус баһылыга С.Н. Винокуров тренер Георгий Халабышевка уонна кини иитиллээччитэ Надя Павловаҕа наҕараада туттарар.
ПОДЕЛИТЬСЯ: