Николай Кривошапкин хаһыаппыт Саҥа дьыллааҕы нүөмэригэр республика биллиилээх суруналыыстарын таайар куонкуруска Россия саамай арҕааҥҥы региона – Калининградскай уобаластан кыттан, биэс киһини таайан бастакы миэстэни ылла. Онон киниэхэ сибээскэ тахсан эҕэдэлии таарыйа кылгас интервью ыллыбыт.
— Бырааһынньыктааҕы өрөбүллэргэ спорт куттаах биир идэлээҕим, биир дойдулааҕым Петр Павлов «Уус Алдан суруналыыстара» ватсап-бөлөхпүтүгэр «Забота-Арчы» сайтыгар матырыйаал сигэтин ыыппыт этэ. Онно күннэтэ тахсар оҕо эрдэҕинээҕи хаартыскаларынан, тыллыы саас Саҥа дьылыгар төннөн ылар ахтыыларынан сирдэтэн, кимнээх буолалларын тургутар күрэс биллэриллибитин аахпытым.
Россия президенэ Владимир Путин пресс-сэкирэтээрэ Дмитрий Песковтыын сэһэргэһии кэннэ
Хаартыскаларынан эрэ буолбакка, суруйар «буочардарынан», истииллэринэн эмиэ биллим диэн бэлиэтиэххэ наада. Саха сиригэр бэчээттэммит хаһыаттары, сурунааллары бүтүннүү ааҕан иһэр үөрүйэҕи букатын кыра саастарбыттан иҥэриммит буолан, ханнык суруналыыс хайа тылы-өһү сөбүлээн туттарын, этиилэрин тутулун хайдах сааһылыырын кытта эндэппэккэ билэбин диэн аһаҕастык билиниэх кэриҥнээхпин.
Мин оскуолатааҕы кэммэр республика бары кэриэтэ хаһыатыгар тэҥинэн көхтөөхтүк, хото суруйарым. Ол иһигэр айар үлэбэр биир бэлиэ кэрчиги «Забота-Арчы» ылар. Сүрүн редактор Александр Веревкин быһаччы өйөбүлүнэн 1999-2004 сылларга матырыйаалларым нүөмэр аайы кэриэтэ тахсаллара.
— Мин СР Правительствотын «Саха сирэ» хаһыатыгар фотографтыыр эрдэхпинэ эн, төһө да күнүскү үөрэх устудьуона буолларгын, үлэни тэҥҥэ дьүөрэлээн, наһаа таһаарыылаахтык суруналыыстаабыккын өйдүүбүн.
— Үтүө тылларгар махтал! Бу санаатахха, бэйэбин өйдүүр буолуохпуттан олоҕум бүтүннүү суруналыыстыканы кытта ыкса ситимнээх эбит.
Россия промышленноска уонна эргиэҥҥэ министрэ Антон Алихановтыын үгэскэ кубулуйбут көрсүһүү
Уус Алдаҥҥа дойдум хаһыатыгар, «Мүрү саһарҕатыгар», миигин суруналыыстыка умсугутуулаах эйгэтигэр 11 сааспыттан аҕалыы бүөбэйдээбит, олус ытыктыыр дьонум – Иннокентий Сыроватскай, Аркадий Алексеев өйөбүллэринэн ахсыс кылаас кэннэ хас сыл аайы сайын бүтүн хамнаска үлэлиирим. Персональнай компьютер тэнийиэн иннинээҕи кэмҥэ, матырыйаалбын илиибинэн суруйан баран, бэчээттиир машинкаҕа охсор диэни билбит дьоллоохпун.
1 куурус устудьуона буолаат, бэйэм баҕаран туран, «Саха сирэ» хаһыакка сыстан барбытым. Саха далбардарыттан маҥнайгы норуодунай поэт Наталья Харлампьева ийэлии мындыр өйөбүлүнэн дуогабарынан хамнастанан, республика сүрүн хаһыата диэтэххэ, аҕа саастаах аксакал биир идэлээхтэрим итэҕэйэллэрэ уонна эрэнэллэрэ бэрт буолан, айар киһи быһыытынан кыахпын толору туһанан, көҥүллүк, санаа хоту айан-тутан, үтүө да дьоннуун алтыһан ааспыппын дьылҕам бэлэҕинэн ааҕабын.
Миэхэ, дьиҥэр, судаарыстыбаннай суруналыыстыка суолунан үүнэр-сайдар кыах да, өйөбүл да баарын аһаҕастык билинэбин. Ол эрээри, төһө да ити хайысхаттан баара-суоҕа 22 сааспар туораатарбын, классическай суруналыыстыка таһымынан, сиэринэн, ирдэбилинэн салайтаран үлэлиир үтүө үөрүйэхпин, эппиэтинэспин хаһан да энчирэппэтэҕим, кэнэҕэһин да онтон туоруом суоҕа диэн бэйэбэр үрдүк ирдэбиллээхпин.
Мин суруналыыстыкаҕа сыһыаным – олоххо курдук. Көннөрү идэм эрэ буолбакка, бу – дьылҕам эргийэр киинэ, суолтатын биир өрүтэ диэтэхпинэ, баһан этии буолар туһа суох. Онон мин кинилиин мэлдьи – ураты истиҥмин, аһаҕаспын. Биһиги кэммитигэр суруналыыстыка сүрүн анала уларыйбата дии саныыбын. Арай, уопсастыба сыһыана, биир идэлээхтэрбит дьаһаныылара араас буолуон сөп.
Виктор ЭВЕРСТОВ
ПОДЕЛИТЬСЯ: