Бу күннэргэ Иван Сергеевич Ярыгин аатынан күрэхтэһии үгэннээн ыытылла турар. Мин Новосибирскайга үөрэнэр кэммэр, уобалас көҥүл тустууга хамаандатын чилиэнэ этим. Онно РСФСР үтүөлээх тренерэ А.Е. Ананиҥҥа эрчиллибитим. Оччотооҕуга миигиттэн икки сыл балыс Иван Ярыгин Новосибирскай куоракка спортротаҕа сулууспалыыра.
1969 сыллааҕы Сибиир көҥүл тустууга хамаанданан чемпионата тувиннар киин куораттыгар, 42 тыһ. нэһилиэнньэлээх Кызылга тэриллибитэ.
Бу күрэхтэһиигэ биһиги эрэллээхтик бастаабыппыт. Мин 57 киилэҕэ РСФСР призера, Красноярскай бөҕөһө Алексей Охапкинныын тустубуппун өйдүүбүн.
Иван Ярыгин оччотооҕуга саҥа РСФСР чемпиона буола сылдьара. Кини 100 киилэ ыйааһыҥҥа тустубута. Онно мин, кини утарсааччыларын хам кууһан ылаат, икки өттүнэн, саҥа үөдүйэн эрэр «зашагивание» диэн албаһы оҥорорун сөҕө көрбүтүм.
Биһиги, новосибирскайдар, күрэхтэһии кэнниттэн Сибиирбит кубогын, Кызыл ресторанын остуолугар туруорбуппут, билигин санаатахха, хайы-үйэ 56 сыл буола охсубут…
Михаил АЛЕКСЕЕВ.
Амма.
ПОДЕЛИТЬСЯ: