Фотокорреспондент Саха АССР Мэҥэ Хаҥалас оройуонугар Байкалов сопхуоска 1925 сыллаахха ыам ыйын 10 күнүгэр төрөөбүт. Кини бэйэтин илиитинэн суруйан хаалларбыт автобиографиятын хайдах баарынан билиһиннэрэбин.
— Мин Порядин Еремей Никитович 1925 сыллаахха Байкалов сопхуоска ыам ыйын 10 күнүгэр төрөөбүтүм. 1944 сыллаахха ШМАС (школа младших авиационных специалистов) Дальночитинская уобаласка бүтэрбитим. 1945 сыллаахха Воронеж куоракка офицердар дьиэлэригэр киэһииҥҥи орто оскуоланы бүтэрбитим. 1955 сыл муус устар ыйтан член кпсс. Демобилизация кэнниттэн 1955 сыллаахха Якутский ОК КПСС Булуҥҥа РК КПСС тэрийии инструкторынан анаан ыыппыттара. Онтон 1958 сыллаахха Дьокуускайдааҕы ОК КПСС быһаарыытынан уобаластааҕы КЫЫМ хаһыат эрэдээксийэтигэр фотокорреспонденынан үлэлии сылдьабын. 1943 сылга ыам ыйын 27 күнүгэр куорат военкомата ыҥыран Сэбиэскэй аармыйа кэккэтигэр киирэн ШМАС-ка Чита уобалаһыгар ыыппыттара онно сылдьан байыаннай бирисээгэни ылыммытым. Оборона министиэристибэтин уурааҕынан 1955 сылга демобилизацияламмытым.1954 сыллаахха Воронежтааҕы «электросигнал» үлэһит кыыһын Косарева Валентина Тихоновнаны 1930 сыллааҕы төрүөх кэргэн ылбытым. Кини билигин ыарытыйар буолан үлэлээбэт, олорор. Уолум Александр РКИИГА Рига куоракка 3 кууруска үөрэнэр..
Аҕам — Порядин Никита Егорович- 1942с өлбүтэ.
Ийэм — Порядина Аграфена Ивановна- 1966с өлбүтэ.
Быраатым — Порядин Игнатий Никитич- «50лет октября» сопхуоска Орджоникидзевскай оройуоҥҥа Саха АССР Дьөппөҥҥө кылаабынай зоотехнигынан үлэлиир, олорор.
Балтыларым — Порядина Анастасия Никитична -герой ийэ Байкалов аатынан сопхуоска олорор, үлэлиир.
Порядина Акулина Никитична өрөспүүбүлүкэтээҕи тыа хаһаайыстыбатын тиэхиникэтин холбоһугар үлэлиир, Дьокуускай куоракка олорор.
Аадырыһым 677005 Дьокуускай куорат Петра Алексеева 75, 2 дьиэ, кв 3. Илии баттааһыннаах.
Ньургуйаана Скрябина
ПОДЕЛИТЬСЯ: