Эдэр сылдьан төһө даҕаны баардылаабатаҕыҥ иһин, санныгар түһэр хаарыҥ халыҥаатаҕын ахсын оҕо эрдэҕинээҕигиттэн өйдөөн-санаан кэлэр түгэннэриҥ ордук күндүтүйэн иһэллэр эбит. Олортон биир чаҕылхайдара, умнуллубаттара – Саҥа дьыллааҕы харыйа, оҕо сааһым харыйата.
Билиҥҥи эриэккэс уоттаах-күөстээх, эгэлгэ киэргэллээх, бэйэтэ эргийэр-хамныыр, саҥарар-ыллыыр харыйаларга ырааҕынан тиийбэтэр даҕаны, оҕо сааһыҥ харыйата сыттыын-сымардыын атын, ураты минньигэс. Ол, бука, барытын бэйэҥ илиигинэн тутан-хабан киэргэтэргиттэн-симииргиттэн буолуо. Биһиги, сыры-сыллатааҕы бииргэ төрөөбүттэр, элбэх буоламмыт уонна учуутал, иитээччи ийэбит ыйан-кэрдэн, бары эйэ-дэмнээхтик көмөлөөн, харыйабытын түргэнник туруорарбыт.
Оччолорго оҥоһуу дьуолка суоҕа дуу, көстөрө уустуга эбитэ дуу, аҕабыт тырахтарыыс буолан, ыраахтан от тиэйэригэр таарыйа илдьэ кэлэрэ. Иһирдьэ сылааска киллэрдэҕинэ, саас мутукча тыллар ойуурун санатан, минньигэс дыргыл сытынан дьиэ иһин толорон кэбиһэрэ олус астык буолааччы. Хас лабаатын аайы үрүҥ баатаны тэлгэтэ уурарбыт, лабааларга таас киэргэл оонньуурдары иилэрбит. Гирлянда, мөһүүрэ оннугар лаампа уотугар кылабачыйар уһун синньигэс таастары ыйыырбыт. Кумааҕыттан хаар кырыйан уонна баатаны сапка тиһэн дьиэ өһүөтүгэр ыйаан, хаардыы турар гына, үөһэттэн түһэрэрбит. Харыйабыт төбөтүгэр хайаан даҕаны биэс салаалаах сулуһу иилэрбит, аллара тэллэҕэр Тымныы Оҕоннору Хаарчаанатын кытта кэккэлэһиннэри уурарбыт.
Кыра сырыттахха, оскуолабыт харыйатыттан улахан суох курдуга. Физкултуура уруога, оскуола тэрээһинэ барыта ыытыллар саалатын хабыллар хаба ортотугар туруораллара. Ону үөрэнээччилэр саба түһэн симиирбит. Кылааһынан эркин хаһыатыгар куоталаһарбыт, онно улахан суруктарыгар, ойууларыгар ыйанар таас киэргэл үлтүрүйбүтүн бытарытан баран, килиэйинэн сыһыаран туттарбыт хаһыаты олус киэргэтэрэ. Таһырдьа оскуола тиэргэнигэр эрдэттэн халыып иһигэр хаар кутан хаалыырбыт. Тоҥон дьиппинийбитин кэннэ уруһуй, үлэ уруоктарыгар учууталбыт ыйыытынан Тымныы Оҕонньору уонна Хаарчаананы кыһан-чочуйан оҥорорбут. Уолаттар онтон үөрэнэн, дьиэбит тэлгэһэтигэр бэйэбит эмиэ туруорар буолбуппут. Оскуола Саҥа дьыллааҕы бырааһынньыгар Тымныы Оҕонньор хас биирдии үөрэнээччигэ саппыйалаах бэлэх туттарааччы. Дьаабылыкатын сыта-амтана билиҥҥэ диэри баарга дылы…
Хос быһаарыы
Маҥнайгы Саҥа дьылым: Оҕо эрдэххэ саамай көһүтүүлээх бырааһынньыгынан Саҥа дьыл буолара. Өрөспүүбүлүкэ биллэр суруналыыстарын оҕо эрдэҕинээҕи хаартыскаларын уонна ахтыыларын таһаарабыт. Бастакынан барыларын таайбыт киһиэхэ «Забота-Арчы» хаһыат аатыттан Саҥа дьыллааҕы сюрприз күүтэр! Эппиэттэргитин ватсап 89142929897 нөҥүө күүтэбит.
ПОДЕЛИТЬСЯ: