Оҕо эрдэхпитинэ Саҥа дьыл бырааһынньыга оскуолабытыгар наһаа да үчүгэйдик ыытыллар этэ. Кабинет барыта остуоруйа хосторо буолара, биһиги кабинеппыт уу саарыстыбата буолбута өйбөр хатанан хаалбыт. Ол Саҥа дьылга мин пират буолбутум. Бэйэбит тикпит, уруһуйдаабыт мөһөөччүкпүтүгэр иккилии дьаабылыка уонна кэмпиэт арааһын угаллара. Дьэ оччоҕо оскуола иһэ барыта дьаабылыка сытынан тунуйара. Наһаа да минньигэс буолара ол оҕо эрдэҕинээҕи дьаабылыкабыт амтана!
Дьиэбитигэр бырааһынньыкка ас арааһа тардыллара, ордук тоҥ балыгы, тоҥ күөрчэҕи сөбүлээн сиирбит. Таһырдьа олбуорга харыйа туруорарбыт, ону киэргэтээри акварель кыраасканы ууга суурайан баран, таһырдьа араас формаҕа кутан тоҥорон кэбиһэрбит. Муус оонньуурдарбытын убайдарбын кытта харыйаҕа ыйыы сылдьан, биир кэмпиэт курдук саамай кыра уонна кэрэ оҥоһуулаах харыйам оонньуурун салыыбын диэн тылым сыстан иэдэйэ сылдьыбыттаахпын. Ийэм барахсан сылаас ууну кутан араарбыта. Убайдарым дьэ кытаанах күлсүү этэ. Онтон ыла муус оҥоһуктарга чугаһаабат буолбутум.
Бука барыгытын кэлэн иһэр Саргылаах Саҥа дьылынан!
Хос быһаарыы
Маҥнайгы Саҥа дьылым: Оҕо эрдэххэ саамай көһүтүүлээх бырааһынньыгынан Саҥа дьыл буолара. Өрөспүүбүлүкэ биллэр суруналыыстарын оҕо эрдэҕинээҕи хаартыскаларын уонна ахтыыларын таһаарабыт. Бастакынан барыларын таайбыт киһиэхэ «Забота-Арчы» хаһыат аатыттан Саҥа дьыллааҕы сюрприз күүтэр! Эппиэттэргитин ватсап 89142929897 нөҥүө күүтэбит.
ПОДЕЛИТЬСЯ: