Тохсунньу 6 күнүгэр Бэрдьигэстээххэ Олимпийскай эрэллэри бэлэмниир өрөспүүбүлүкэтээҕи оҕо спортивнай оскуолатыгар аҕам саастаах дьон ортотугар буулдьанан ытыыга күрэхтэһии буолла.
Күрэхтэһиини улуус киинин бэтэрээннэрин сэбиэтин бэрэссэдээтэлэ Дмитрий Агеев иилээн-саҕалаан ыытта.
Чөл олоҕу, чэгиэн доруобуйаны, спорду көҕүлүүр дьоммут күн бүгүҥҥэ диэри үчүгэй турукка сылдьалларын көрдөрдүлэр. Буулдьаларын барытын кыҥаабыт сирдэригэр түһэртииллэриттэн киһи сөҕүөн эрэ сөп.
Түмүккэ, туран эрэ ытыыга, дьахталларга I миэстэни Анна Протопопова, II Альбина Алексеева, III Евдокия Дьяконова ылла.
Тобуктаан олорон ытыыга: I — Альбина Алексеева, II — Людмила Иванова -Чемезова, III — Евдокия Дьяконова.
Эр дьоҥҥо, бастакы көрүҥҥэ I — Дмитрий Борисов, II — Сергей Барашков, III — Владимир Осипов.
Иккис көрүҥҥэ: I — Дмитрий Борисов, II — Борис Андреев, III — Владимир Осипов.
Күрэхтэһии муҥутуур кыайыылааҕынан, спорт бу көрүҥэр улуус хас да төгүллээх чемпиона Дмитрий Борисов эрэллээхтик ылла.
Пьедестал үктэлигэр тахсыбыт дьоҥҥо мэтээллэр, Бочуотунай грамоталар уонна Тымныы оҕонньор бирииһэ туттарылынна.
Бэрдьигэстээх нэһилиэгин бэтэрээннэрин сэбиэтэ күрэхтэһии тэрээһиннээхтик ыытылларыгар күүс-көмө буолбут физическэй култуураны уонна маассабай спорду сайыннарыы киинин салалтатыгар, исписэлиис Николай Константиновка, күрэхтэһии хаамыытын сурукка-бичиккэ тиспит Антонина Парфеноваҕа махталларын биллэрэллэр.
Вячеслав АЛЕКСЕЕВ, Горнай, Бэрдьигэстээх.
Ааптар хаартыскаҕа түһэриитэ.
ПОДЕЛИТЬСЯ: