Бу көрөр хаартыскаҕытыгар эдэркээн ийэтигэр көтөхтөрбүт мотуруос таҥастаах кыракый киһи – ити мин биир сааспар 1960 сыллаах Саҥа дьылы көрсөн олоробун. Ити кэми биллэн турар букатын өйдөөбөппүн.
Оттон өйбөр умнуллубаттыы хаалбыт Саҥа дьыллааҕы харыйаны төрөппүттэрим биһиэхэ – оҕолоругар анаан 1965 сыл ахсынньытын бүтэһик күннэригэр туруорбуттара. Сэттэбин туолаары сылдьар син обургу киһи буоламмын ол елканы аҕам хайдах туруорбута харахпар субу баардыы хатаммыт. Кини икки дьоҕус харыйаны (бэс буолбатах, дьиҥнээх харыйа этэ) холбуу тутан баайбыта, елкабыт лабаалара хойдо түспүтэ. Онтон аны лабаата убаҕас сирдэринэн мас умнаһын саха быһаҕынан дьөлө анньа-анньа, аһары хойуу буолбут сирдэриттэн лабаа быһан, тэҥнии батарыта анньыталаабыта – харыйабыт биир тэҥник үүммүт олус тупсаҕай мас буола түспүтэ.
Ол кэнниттэн дьиримнэс уоттаах, араас өҥнөрдөөх, билиҥҥилэрдээҕэр балай да улахан, лоппойбут лаампалардаах гирлянданы иилбитэ. Оччотооҕу үгэһинэн харыйабыт лабааларыгар хаар түспүтүн курдук гына маҥан баатаны тэлгэппитэ. Дьэ онтон, хаһан ылбыттара эбитэ буолла, сэбиэскэй кэмнээҕи олус хаачыстыбалаах, дьиҥнээх кэриэтэ оҥоһуллубут чаҕылыйбыт елка оонньуурдарын ийэбинээн ыйаабыттара, харыйабыт төбөтүгэр аналлаах киэргэли аспыттара. Түмүгэр, елкабыт анныгар имэрийдэххэ кылабаччыгаһа киһи илиитигэр сыстар халлаан күөх өҥнөөх уһун саҕынньахтаах, санныгар кууллаах сүгэһэрдээх, үтүлүктээх илиитигэр тайахтаах Тымныы Моруос оҕонньору туруоран кэбиспиттэрэ.
Түүн үөһэ уоту умулларбыттара. Иһит ыскаабын үрдүгэр турар радиолабытын холбообуттара. Кыракый дьиэбит гирлянда суһум уотунан сырдаабыта, Саҥа дьыл кэлбитэ. Биһиги боростуой дьон дьиэ кэргэммит саамай дьоллоох ыал буолбуппут.
Үөрэрим, ол алта уонча сыллааҕы Саҥа дьыллааҕы харыйабыт оонньуурдара билигин да бааллар, ийэм сааһылыы укпут чымыдааныгар аптаах кэрэ күннэри кэтэһэ хараллан сыталлар. Кыра балтым сылтан сыл ахсын күндү оонньуурдарбытын ол эргэ чымыдаантан хостуур, саҥаттан саҥа Саҥа дьыллааҕы харыйабытын симиир.
Күндү Сахабыт сирин олохтоохторо, ааҕааччылар, бука барыгытын үүнэн иһэр Саҥа дьылынан эҕэрдэлиибин. Үүнэр дьыл бука бары ыалларга дьолу-соргуну тосхойдун, оҕолорбут, сиэннэрбит барахсаттар толору дьоллоох буоллуннар, кырдьаҕас кыанара эбилиннин, сүһүөҕэ бөҕөргөөтүн, туруу дьоммут өҕүллүбэт өйөбүлбүт, халыҥ дурдабыт-хаххабыт буоллуннар
Хос быһаарыы
Маҥнайгы Саҥа дьылым: Оҕо эрдэххэ саамай көһүтүүлээх бырааһынньыгынан Саҥа дьыл буолара. Өрөспүүбүлүкэ биллэр суруналыыстарын оҕо эрдэҕинээҕи хаартыскаларын уонна ахтыыларын таһаарабыт. Бастакынан барыларын таайбыт киһиэхэ «Забота-Арчы» хаһыат аатыттан Саҥа дьыллааҕы сюрприз күүтэр! Эппиэттэргитин ватсап 89142929897 нөҥүө күүтэбит.
ПОДЕЛИТЬСЯ: