Саҥа дьыл чугаһыгар бу түгэни өрүү ахтан-санаан ааһабын. Бу туох даҕаны омуна суох Ийэ улуу тапталын биир холобурунан буолар. Биһиги аҕабытын сүтэрбит кэммит этэ. Оччолорго мин кырам да бэрт буолан буоллаҕа, бэйэбин тулаайах курдук санаммат этим. Улаатар да сааспар оннук бэйэни аһыныы санаата хаһан даҕаны киирбэтэҕэ. Кэлин өйдөөбүппүнэн, ол – ийэбит модун күүстээх санаата эбит. Ийэ тулуура, таптала, оҕолорун туһугар олоруута…
… Бу кэпсиир түгэним биир сэттэлээхпэр буолбута. Сарсыарда дьиктилээхэй сыттан уһуктан кэллим. Ороммор олоро биэрэн баран, туох сыта буоларын өйдөөбөккө чочумча буоллум, оттон ойон туран, саалаҕа сүүрэн киирдим. Арай … улахан да улахан, хойуу да хойуу, хараҥа от күөҕэ өҥнөөх көрүөхтэн кэрэ харыйа бу лаглайан турар! Дыргыл сытаа .. Ол сыты билигин да билэр курдукпун. “Иэхэйбиэн! Биһиэхэ харыйа кэлбит!”, — дии-диибин харыйаны тула дьиэрэҥкэйдээбиппин бу баардыы өйдүүбүн. Мин саҕа дьоллоох киһи суоҕа! Эдьиийим Валя туран баран эмиэ олус диэн соһуйда. “Мамаа, бачча улахан харыйаны хантан, хайдах аҕаллыҥ?” – диэн улахан киһилии ыйытта. “Ойууртан…”, — ийэбит биһиги үөрүүбүтүттэн астынан сырдыктык мичээрдии олороро харахпар бу баардыы көстөр… Ийэбит барахсан. Ол сыл кини үс оҕотун кууспутунан огдообо хаалбыт кэмэ этэ. Баара-суоҕа 36 саастааҕа… Ол биһиэхэ Саҥа Дьылы бэлэхтээри ойуурга баран харыйаны кэрдэн баран, соһон аҕалбытын көрүҥ! Ийэбит Валентина (Мария) Андреевна Багдасаева ол мааны харыйата өйбөр-санаабар умнубаттыы хатаммыт. Бу туһунан кэпсээннээхпин.
Күндү доҕоттор! Биһиги ийэбит курдук туохтан да иҥнибэккэ, олохпут дьикти, алыптаах бырааһынньыгын – Саҥа Дьылы -умнуллубаттыы бэлиэтээҥ, оҕолоргутун үөрдүҥ! Оҕо саас сырдык иэйиитэ киһи олоҕун устата харысхал буоларын умнумуоҕуҥ. Кэлэн иһэр саргылаах Саҥа дьылынан эҕэрдэлиибин! Толору олохтоох, дьоллоох олоҕу баҕарабын! Дьолбут — илиибит иһигэр! Саҥа дьыл аҕаллын эйэни, этэҥҥэ буолууну!
Хос быһаарыы
Маҥнайгы Саҥа дьылым: Оҕо эрдэххэ саамай көһүтүүлээх бырааһынньыгынан Саҥа дьыл буолара. Өрөспүүбүлүкэ биллэр суруналыыстарын оҕо эрдэҕинээҕи хаартыскаларын уонна ахтыыларын таһаарабыт. Бастакынан барыларын таайбыт киһиэхэ «Забота-Арчы» хаһыат аатыттан Саҥа дьыллааҕы сюрприз күүтэр! Эппиэттэргитин ватсап 89142929897 нөҥүө күүтэбит.
ПОДЕЛИТЬСЯ: