Төрүппүт Бүөтүкэ Суукунтан саҕаланар, диэн кэпсээтэҕим буоллун…
Саталлаах уус, үлэһит бэрдэ эһэбит үлэлээн киирэн бардаҕына от охсуутугар да, буор хаһыытыгар да тэлэһитэн, бурҕатан барар туруутун иһин, Бурҕаат диэн аат иҥмит эбит. Сүүрбэччэтэ оҕолонон, сатаммакка, биир уол оҕону тутан хаалаллар, Уйбаан диэн ааттыыллар.
Дьэ, бу биир уолтан Бурҕааттар халыҥ аймахпыт тэнийэн барар. Улахан эдьиийбит Анна Ивановна биэс оҕолоох, түөрт уол, биир кыыс. Бу мааны кыыстан Арассыыйа дьоруойа Родимир Максимов күн сирин көрөн, Бурҕаат диэн төрүт аатын ылынан, биһиги аймаҕы Саха сиригэр эрэ буолбакка, бүтүн дойдуга тиийэ суон сурахтаата, ааппытын ааттатта!
Салгыы Ньукулай Дьөгүөрэп — Баайаҕыын, ийэтин араспаанньатынан, уол кэлэр. Барытыгар баар убайбыт, барытын сатыыр, барыбытын бырааттарын, сиэн бырааттарын уһанарга, бултуурга, иистэнэргэ үөрэппит ытык убайбыт, билигин сиэннэрин сиэтэн эрэр. Эдьиий Маасабыт биһиги икки кыралары сууйбут-тараабыт, ийэлээх оҕолортон туох да итэҕэһэ суох улаатыннарбыт махталлаах, тапталлаах эдьиийбит.
Уйбаан Суукун эмиэ ааппытын ааттаппыт, Арассыыйаҕа нуучча дуобатыгар иккитэ бастаабыт, ССРС, Арассыыйа успуордун маастара. Оттон мин тустан сордоспут, мунньан сордонор, суруйа сатыыр дьарыктаахпын.
Саамай талааннаахпыт, кырабыт Дьөгүөр успуорду өрө тутар, ырыаһыт, музыкант. Бу барыта сиэн бырааппыт, дьоруой Родимир Максимов — Бурҕаат диэн ааты ылынан, биһигини Арассыыйа эбэ хотун үрдүнэн аатырдыбыта, биһигини үөрдэр, долгутар. Махтанабыт уолбутугар, киэн туттабыт итиэннэ иннибит диэки баран иһэбит, бурҕатан, суолбутун, кэлэр көлүөнэбитигэр хаалларан!
Билигин уоппускаҕа кэлэ сылдьар, күн иллэҥэ суох, көрсүһүү үөһээ көрсүһүү. Хамсаныылаах, саҥарар-иҥэрэр дьоҕурдаах буолан, барытын ситэн-хотон иһэр, ол быыһыгар ийэтин Москваҕа Бэс Чагдаҕа сынньатан, бэйэтэ эмтэнэн кэллилэр.
Аны эһэтин Дьокуускайга санаторийга сытыаран эмтэтэ сылдьар. Харчы ананан дьиэ көрдүүллэр куоракка, уоппуската бүппүтүн хата уһаттылар. Ийэтэ Варвара Николаевна оҕо уһуйааныгар музыкальнай тэрийээччи, элбэх общественнай үлэлээх, аны волонтерга ылсыһан эрэр. Аҕата Дмитрий Иванович Максимов сылгыһыт, сварщик, икки сыллааҕыта олохтон туораабыта, кыайыылаах үлэһит наһаа дьиэмсэх, оҕолорун аһара таптыыра, оһуоба Родигар ылларан тугу барытын ылан биэрэрэ.
Аҕата сыппытыгар тиһэҕэр тиийэ Родига көрбүтэ оннук убаастыыра итэҕэйэрэ, аҕата техникаҕа сыһыаран, тыраахтарга үөрэтэн, бэйэтэ оттуур сүрүн үлэһитэ буолбута. Икки кыралара Дарина уонна Вадим туһунан дьарыктаах, барытыгар дьоҕурдаах дьон. Киһи тугу эрэ күүтэр, дьикти дьоно. Маннык үлэнэн, спордунан, ырыанан тыйаатырынан иитиллибит, ийэлэрэ Куһумууннар театрдарын сүрүн артыыската, эбээлэрэ Анна Ивановна тыйаатыр сүрүн режиссера, продюсера, костюмера этилэр. Элбэх республиканскай күрэхтэр кыайыылаахтара, Гран при хаһаайыннара. Саамай улахан ситиһиилэрэ «Трио Кузьминын» Турцияҕа, Анталья куоракка ыытыллыбыт международнай ырыа конкурсугар Гран при бирииһи ылан, үөрэн, кыайыы көтөлөнөн кэлбиттэрэ. Маннык дьоҕурдаах дьиэ кэргэн Арассыыйа дьоруойун Родимир Максимов дьоһун мааны дьоно. Кэтэһэбит оҕобут, сиэммит этэҥҥэ эргиллэн кэлиэ диэн.
Родимир успуорду таптыыр дьиэ кэргэҥҥэ улаатан, эмиэ таптыыр көрүҥнэринэн дьарыктанан барбыта, оһуоба футбол курдук сүүрэр-көтөр көрүҥү сөбүлээн, улууһун иһигэр элбэхтик бастаабыта, миэстэлэспитэ. Убайа Баһылай Кузьмин дэгиттэр спортсмен, тустуук, хапсаҕайга кэккэ ситиһиилээх. Устудьуоннуур кэмигэр элбэх күрэхтэһиилэргэ чөмпүйүөн, призер буолбута.
Родимир – Н.Н. Голиков кэриэһигэр аналлаах хапсаҕай аһаҕас турнирыгар 1-кы миэстэ. Ытык Күөл (2012 с.), Саха Өрөспүүбүлүкэтин физическэй култуураҕа уонна успуорка министиэристибэтин мини-футболга хамаанданан үһүс миэстэ (2016). Родимир, футбол улахан фаната, аан дойду футболга кулууптарын, сүүмэрдэммит хамаандалары эндэппэккэ этэн биэрэр, сиһилии ырытар, киэҥ билиилээх. Испания “Реал” (Мадрид) кулуубугар ыалдьар, сүгүрүйэр оонньооччута – Кристиану Роналду.
Маннык киэҥ эйгэлээх, олоххо туһунан суоллаах-иистээх, дойдутун күүскэ таптыыр, көмүскүүр сиэн быраатым, Арассыыйа дьоруойа Родимир Максимов.
Юрий ЩУКИН – Манай.
Туора Күөл, Таатта.
ПОДЕЛИТЬСЯ: