«Былыыр-былыыр» диэн биирдэ оҕо эрдэхпинэ буолбут түгэни кэпсиим. Дьиҥнээхтии буолбут түбэлтэ. Куттала суох, билигин санаатахха.
Оройуон киининээҕи оҕо саада, тоҕо эрэ нууччалыы ааттааҕа, бөһүөлэк арҕаа уһугар син өргө диэри ол мас дьиэтигэр үлэлээбитэ. Кэлин сахалыы ааттаммыта уонна таас дьиэҕэ көспүтэ. Кырам бэрт буолан,
Саҥа дьыл диэн тугун билбэппин, өйдөөбөппүн даҕаны. Хас саастаахпын да билбэппин. Дьыссааппытыгар, группабытыгар сүр улахан маһы туруоран баран наһаа үчүгэй, туох эрэ кылабычыгастарынан ыйаатылар, араас үчүгэй оонньуур курдуктары ол мас лабаатыгар иилбиттэр, өссө чыпчылыҥныыллар, сүүрэ сылдьаллар. Маспытын тыаттан аҕалбыттара наһаа үчүгэй сыттаах.
Биһигини барыбытын эмиэ араастан таҥыннардылар — хаһан да манныгы кэппэт этибит, ол быыһыгар араас кыыллар курдук буоллубут. Дьэ уонна группабытыгар кырачаан олоппосторбутугар олорон кэбистибит, ортобутугар ол дьэрэкээн маспыт өссө үрдээбиттии, улааппыттыы киэркэйэн турар.
Муусука тыаһыыр, тугу эрэ саҥараллар, үөрүү-көтүү уонна кими эрэ кэтэһэр курдукпут. Интэриэһинэйэ диэн сүр, ким, туох буоллаҕай?!
Кими эрэ ыҥырар курдук буоллубут, биир кэм хаһыытаан киирэн бардылар. Туох эрэ наһаа наадалаах дуу, кэтэһиилээх буолаары гынна быһыыта. Арай группабыт аана аһыллаатын кытта туох эрэ кып кыһыл уһун сонноох, наһаа уһун маҥан бытыктаах, мунна кып кыһыл, бэйэтэ улахана диэн киирэн кэлбэт дуо !
Бу оҕолору илдьэ барар абааһылара кэллэ диэн син биллим быһыыта, куттанным. Улахан баҕайы торуоскалаах, өссө ити соһо сылдьар мөһөөччүгэр оҕолору уган баран илдьэттиир эбит. Саатарын араас кыыллардаах сылдьар эбит, олоро тиистэрэ, тыҥырахтара, кутуруктара диэн. Ыстаҥалаһан оҕолорго чугаһаатылар, ити биир бөрө кэлэн мин аттыбар утуйар Коля диэн уолу илиититтэн харбаан ылла! Биир куобах кэлэн эмиэ куобах курдук таҥныбыт кыыһы илдьэ барда! Ол оҕолор эрэйдээхтэр ханна да барар кыахтара суох буолан, дэллэриһэн батыһан бардылар. Ити баар, сэрэйбитим курдук- оҕолору илдьэн абааһыга туттардылар. Абааһылара өссө саҥалаах эбит, наһаа куһаҕан — буочукаҕа саҥарар курдук тугу эрэ этэр. Арааһа, билигин барыгытын сиэм диэтэ быһыылаах. Воспитателлэрбит буоллаҕына тоҕо эрэ үөр да, үөр буолаллар- кинилэри ити абааһы сиэбэт буоллаҕа дии, оҕолору эрэ сиир !
Ол олорон көрдөхпүнэ, группабыт биир өттүнэн аана аһаҕас турар. Онно биир эбээ баар, оһох оттор, оҕолору наһаа таптыыр, кини миигин быыһыаҕа диэн баран онно туох баар күүспүнэн түһүнэн кэбистим. Ол абырыыр оһоҕум таһыгар тиийиэхпэр диэри группабыт оҕото барыта абааһыттан куотан мин кэннибиттэн саба сырсан кэлээхтээтилэр. Эбэбит барахсан барыбытын кууһан ылла уонна аанын сабан кэбистэ. Оҕолору ыла кэлбит илэ абааһыттан быыһаннахпыт ити !
Ити курдук мин саҥа дьыл диэн тугун, Тымныы моруос оҕонньор диэн кимин аан бастаан олохпор көрөн, билэн турардаахпын. Ол буолбута ырааттыа да ыраатта , ол гынан баран куруук миигин кытта баар, саҥа дьыл эргийэн кэллэҕин ахсын сүрэхпин ахтылҕан сылаас тыынынан угуттаан ааһар.
Остуоруйа курдук буоллар да, олоххо буолбут түбэлтэ.
Кэлэн иһэр саргылаах Саҥа 2025 сылынан!
Хос быһаарыы
Маҥнайгы Саҥа дьылым: Оҕо эрдэххэ саамай көһүтүүлээх бырааһынньыгынан Саҥа дьыл буолара. Өрөспүүбүлүкэ биллэр суруналыыстарын оҕо эрдэҕинээҕи хаартыскаларын уонна ахтыыларын таһаарабыт. Бастакынан барыларын таайбыт киһиэхэ «Забота-Арчы» хаһыат аатыттан Саҥа дьыллааҕы сюрприз күүтэр! Эппиэттэргитин ватсап 89142929897 нөҥүө күүтэбит.
ПОДЕЛИТЬСЯ: