2024 сыл түмүгүнэн Саха Республикатын бастыҥ спортсмен-үөрэнээччилэрэ быһаарыллан, Ил Дархан Саҥа дьыллааҕы бырааһынньыгар ыҥырыллан сырыттылар. Кинилэр кимнээҕий?
Ол курдук, спорт олимпийскай көрүҥнэригэр Дьокуускай куорат 29 №-дээх оскуолатын 9-с кылааһын үөрэнээччитэ Николай Яковлев, Дьокуускайдааҕы национальнай гимназия 9-с кылааһын үөрэнээччитэ Аина Готовцева, Чокурдаах (Аллайыаха) оскуолатын 9-с кылааһын үөрэнээччитэ Данияр Дасаев – үһүөн буулдьанан ытааччылар; Р.М. Дмитриев аатынан Олимпийскай эрэл училищетын үөрэнээччитэ Кристина Дрозд (оҕунан ытааччы); Дьокуускайдааҕы сибээс уонна информационнай технологиялар колледжтарын үөрэнээччитэ Дмитрий Большошапов (чэпчэки атлетика) – Саха Республикатын Ил Дарханын стипендиятын лауреаттарынан буоллулар.
Ити курдук, Олимпиадаҕа киллэриллибэтэх көрүҥнэртэн, Дьокуускайдааҕы 2 №-дээх орто оскуола 9-с кылааһын үөрэнээччитэ, дуобатчыт Нарыйаана Сергеева бастыҥынан ааттанна.
Спорт адаптивнай көрүҥнэринэн дьарыктанааччылартан – Р.М. Дмитриев аатынан Олимпийскай эрэл училищетын үөрэнээччитэ Роман Ибрагимов (чэпчэки атлетика).
Спорт национальнай көрүҥнэриттэн – Боотулу (Үөһээ Бүлүү) оскуолатын 9-с кылааһын үөрэнээччитэ, мадьыны Александр Захаров уонна Майа (Мэҥэ Хаҥалас) оскуолатын үөрэнээччитэ, сахалыы ыстаныыларынан дьарыктанар Максим Семенов, Д.П. Коркин аатынан Чурапчытааҕы спортивнай оскуола 11-с кылааһын үөрэнээччитэ, өбүгэ оонньуутунан эрчиллэр Петр Попов – 2024 сыл түмүгүнэн республикаҕа бастыҥнарынан буоллулар.
Кинилэри барыларын эҕэрдэлиибит! Саҥа ситиһиилэри баҕарабыт!
«Дьулурҕан».
Хаартыскаҕа: “Азия оҕолоро” норуоттар икки ардыларынааҕы VIII спортивнай оонньуу оҕунан ытыыга кыайыылааҕа Кристина Дрозд (хаҥас).
Петр Павлов түһэриитэ.
ПОДЕЛИТЬСЯ: