Күндү көрөөччүлэрбитин ахсынньы 26 күнүгэр киэһэ 18:30 чааска Аксения уонна Наталья Посельскайалар ааттарынан балет оскуолатын иһинэн Оҕо тыйаатырыгар «Сүктүү» испэктээк премьератыгар ыҥырабыт. Муусука ааптардара – Анна Томская, Афанасий Томскай, либретто ааптара уонна туруорааччы хореограф – Светлана Бессонова, туруорааччы дирижер Николай Петров, көстүүм худуоһунньуга – Светлана Петрова, научнай консультаннар – Светлана Петрова, Ангелина Лукина.
Былыр-былыргыттан кэргэн кэпсэтии бары норуоттар олохторугар улахан суолталааҕа уонна кинилэр өйдөрүгэр-санааларыгар, дьаһахтарыгар, үгэстэригэр, култуураларыгар биллэрдик дьайар элбэх сиэри-туому кытта ситимнээҕэ.
«Сүктүү» испэктээк – уус-уран айымньы, манна булгуччулаах олоҕурбут үгэһи кытаанахтык тутуһуу суох. Үҥкүү көрүҥэр сахаҕа кэргэн кэпсэтии сиэрэ-туома кэпсэнэрэ: эдэр кыыс суһуоҕун уларытыы — урут биллибэтэх, ол эрэн 1760-с сылларга О.Матушевич, 1878-с Миддендорф үлэлэригэр «үс гына өрүллүбүт суһуох» диэн ахтыллар; кийиит кыыһы таҥыннарыы; «кылыгырас кыабаканан» симэнии; күтүөтү көрсүү; эдэрдэргэ дьоллоох олоҕу баҕаран, Айыы таҥараларга «саргы тардыыта»; сүктэр кыыс энньэтин биэри «тоҕус үрүҥ биэ» үҥкүүтүнэн тиэрдиллэр (В.Серошевкай «Сахалар» кинигэтигэр ахтыллар); күтүөт кийиит кыыһы кытары уот иччитин күндүлээһиннэрэ; кымыһы амсайыы; суол иччитигэр сүгүрүйүү.
Саха номоҕор кэрэ аҥардары уоруу куруук баар олоҕурбут үгэс – ол испэктээккэ «Ойуун» көрүүлэнэр сиэригэр итэҕэтиилээхтик ойууланар. Испэктээк тиһэх түһүмэҕэ — «Сүктүү үҥкүүтэ». Бу саха былыргы уруутун аан бастаан хамсаныы иэйиилээх тэтиминэн бигэргэтэр ураты уус-уран дьүһүйүү.
«Сүктүү» испэктээккэ ааспыт үйэ 30-с, 70-с сыллара уонна ХХI үйэ саҕаланыытыгар археология хаһыыларын туһунан бэчээттэммит уонна архыып матырыйаалларынан Стрельцова Е.Д., Новгородова И.Д., Носов М.М., Гоголев А.И., Саха-французскай эспэдииссийэ уонна Гуманитарнай чинчийии института, археология лабароториятын кэнники сыллардааҕы чинчийиилэринэн (бэрэпиэссэр Р.И.Бравина) сыана көстүүмнэрин кэккэ эскиистэрин биллэр учуонай С.И.Петрова айан таһаарда.
Сүрүн оруолларга:
Кийиит кыыс – Ольга Ботуева
Күтүөт уол – Петр Филатов
Кийиит ийэтэ – Анна Попова
Кийиит аҕата – Дьулуур Андреев
Күтүөт ийэтэ – Виктория Син
Күтүөт аҕата – Владислав Попов
Суол иччитэ – Семен Дьяконов
Дыгын оонньуутун кыттыылаахтара – Эдуард Жирков, Василий Эверстов, Дьулустан Харлампьев, Семен Кузьмин.
Кыыс кэргэн тахсар тойугун Норуоттар икки ардыларынааҕы уонна Бүтүн Арассыыйатааҕы куонкурус кыайыылааҕа Алиса Долгунова толорор. Ойуун уонна Дыгын оонньуулара хартыыналар киирэр тылын Норуоттар икки ардыларынааҕы күрэх дипломант Александр Карманов ааҕар.
«Сүктүү» испэктээк «Кыл Саха»төрүт дорҕоон бөлөх – Анна Томская, Афанасий Томскай, Анюта Иванова, Вера Григорьева, Афанасий Федоров, Зоя Васильева, Дьулустаан Никифоров, Максим Бордонскай уонна аркыастыр артыыстара Альберт Брусенин, Владимир Боярскай, Марианна Попова, Мария Семенова доҕуһуолунан көстөр.
Маассабай сценаларга – тыйаатыр үҥкүүһүттэрэ. Испэктээккэ А.уонна Н.Посельскайалар аатынан балетнай оскуола үөрэнээччилэрэ кытталлар.
Ыытыллар сирэ: А.уонна Н.Посельскайалар аатынан балетнай оскуола иһинэн Оҕо тыйаатыра.
Билсэр тел.: 40-23-29, 8-964-416-68-76
ПОДЕЛИТЬСЯ: