Бу күннэргэ Ойуунускай аатынан литературнай музей дириэктэрэ, саха норуодунай суруйааччыта Николай Алексеевич Лугиновы көрсөн, сурутуу, хаһыат инники дьылҕатын туһунан кылгастык санаатын атастаһарыгар көрдөстүм:
«Билиҥҥи киһи хаһыаты ааҕар үгэһи сүтэрэн, тэйэн хаалла, диир норуодунай суруйааччы. — Урут хас биирдии ыалга үстүү-түөртүү хаһыат кэлэр этэ, биир хаһыаты хас эмэ киһи ааҕара. Кумааҕы хаһыат – олох култуурата, олох үгэһэ этэ. Билигин ити суох, ситим быстан хаалла. Биһиги литературнай сурунаалларбыт эмиэ итинник дьылҕаланнылар, дьон уус-уран айымньыны ааҕар үгэстэн тэйдэ. Урут сурунаалы ыйы ыйдаан кэтэһэр этилэр.
Үгэс сүппүтүн эн хайдах да гынан, аҕыйах сылынан көннөрө охсубаккын. Ол үгэһи чөлүгэр түһэриини биир киһи кыайбат, бу хас эмэ сыллаах-хонуктаах, бука бары өрөспүүбүлүкэнэн өрө туран, хампаанньа тэринэн кыайдахпытына кыаллыа, төннөрдөхпүтүнэ төннүө. Ити хаһыаты ааҕыы үгэс сүтүүтүгэр, саатар буоста үлэтэ кэдэйэн биэрэн эбиискэлэстэ. Хас эмэ ый буолан баран тиэрдэр, сырыы суох, айан суох, сыаната үрдүүр. Онон ити элбэх кыһалҕа кыттыһан, хаарыан үгэһи эстилэр.
Электроннай, социальнай ситимнэр, саайт сонуннара үчүгэй буолуохтара, ону сатаан хасыһар, булан көрөр киһиэхэ. Интэриниэт быстах сонунун, ыстатыйаны ааҕан баран аһаран кэбиһэҕин. Оттон кумааҕы хаһыаттан наадалаах ыстатыйаҕын, эйиэхэ сыһыаннаах матырыйаалы кырыйан ылан уурунаҕын, төһө эмэ уонунан, сүүрбэнэн да сыллар усталарыгар туһана сылдьаҕын. Хаһыат диэн олорон кэлбит олохпут кэрэһитэ, летопиһа буолар. Оттон ол саайт, интэриниэт суруйуута бүгүн баар, сарсын суох. Кыайан кырыйан ууруммаккын, хаартысканы да булбаккын. Утарынан эрэ, кэтэҕэ суох»
Виктор Эверстов . Фото автора
ПОДЕЛИТЬСЯ: