Билигин, республикатааҕы бэчээккэ чэпчэтиилээх сурутуу буола турар. Сурутуу араастаах. Эһиилги, 2025 сыл аҥаарыгар, эбэтэр, сыллааҕыга буолуон сөп. Кумааҕы бэчээти – хаһыаты, сурунаалы ааҕааччылар урукку курдук элбэҕэ суохтар гынан баран, син бааллар.
Биһиги, айар үлэһиттэр, бэйэбит хаһыаппыт ааҕааччыта элбииригэр дьулуһан, тоҕоостоох кэмҥэ суруттарыыга үлэлэһэбит. Ылан көрдөххө, сүрүннээн орто уонна аҕам саастаахтар урукку үгэстэригэр олоҕуран, бэчээккэ суруттаран ааҕаллар.
Холобура, биһиги, «Забота-Арчы» хаһыаппытыгар суруттарыы икки көрүҥнээх. Бастакыта, бэйэ аадырыһыгар суруттаран ылыы, иккиһэ – дьоҥҥо бэлэх быһыытынан суруттарыы.
Спорт бэтэрээнэ, хапсаҕайга Саха Республикатын спордун маастара, көҥүл тустууга ССРС спордун маастарыгар кандидат Петр Семенович Табунанов быйыл күһүн 60 сааһын туолбута. Соторутааҕыта кини төрөөбүт дойдутугар Тааттаҕа тиийэн, биллиилээх бөҕөс Владимир Андросов аатынан хапсаҕайга республикатааҕы турнир ыытыллыытыгар көмөлөстө. Биир дойдулаахтара, Петр Семеновиһы үбүлүөйдээх сааһынан, «Таатта улууһун сайдыытыгар кылаатын иһин» түөскэ анньыллар анал бэлиэнэн наҕараадалаатылар.
Петр Семенович, спорка таптала билигин даҕаны уҕарыйбат. Бэйэтин саастыылаахтарыгар биллиардка кэккэ ситиһиилэрдээх. Аны элбэҕи ааҕа, билэ-көрө сатыыр буолан, спорду барытын кыраҕытык кэтээн көрөр, ырытар, сыаналыыр. Кини футболга буоллун, боксаҕа, тустууга буоллун, ким кыайарын билгэлээһиннэрэ уот харахха сөп түбэһэллэринэн – киһини сөхтөрөөччү.
П.С. Табунанов биһиги, сурутууга көрдөһүүбүтүн ылынан, «Забота-Арчы» хаһыат 2025 сыллааҕы сурутуутун тыаҕа олорор кэргэнин дьонугар Саҥа дьыллааҕы бэлэх оҥордо. Ити курдук, Петр Семенович үтүө холобура киэҥ батыһааччылаах буоларыгар баҕарабыт. Чэпчэтиилээх сурутуу ахсынньы 13 күнүгэр диэри ыытыллар. Онон, тоҕоостоох түгэни мүччү туппаккытыгар, биһиги хаһыаппытын бэйэҕитигэр, эбэтэр билэр дьоҥҥутугар, аймахтаргытыгар бэлэх быһыытынан суруттараргытыгар, билиигэ-көрүүгэ тардыһаргытыгар, үтүө бачыымы батыһаргытыгар баҕарабыт!
Санатан эттэххэ, «Забота-Арчы» хаһыакка чэпчэтиилээх сурутуу сыаналара: сыл аҥаарыгар – 394,56 солк., толору сылга – 789,10 солк. Чэйиҥ, кытаатыҥ, биһиги хаһыаппытыгар суруттарарга тиэтэйиҥ!
Петр ПАВЛОВ.
ПОДЕЛИТЬСЯ: