Ахсынньы 7 күнүгэр кадеттар интэринээт-оскуолаларыгар “Ийэ дойду туохтан саҕаланар?” өрөспүүбүлүкэтээҕи патриотическай пуорум буолла.
Кадеттар оскуола-интэринээттэригэр бу тэрээһин 11-с төгүлүн ыыталлар. Пуоруму Арассыыйа гранын ылбыт өрөспүүбүлүкэтээҕи бэтэрээннэр сэбиэттэрэ, “Кыайыы социальнай көмөлтө ресурснай киинэ” ГБУ, кадеттар оскуола-интэринээттэрэ, “Авангард” оҕоҕо-ыччакка байыаннай-патриотическай иитиини ыытар үөрэтэр-методическай киин тэрийэн ыыттылар. Бу күн кинилэр үлэ дьоруойдарын, ССРС, РФ Дьоруойдарын, Албан Аат уордьаннар толору кавалердарын, байыаннай дьайыылар бэтэрээннэрин кытта көрсөллөр, чиэстииллэр. Бу тэрээһиҥҥэ үлэ, бойобуой дьайыылар бэтэрээннэрэ көхтөөх кыттыыны ылаллар. Быйыл Уус Алдан, Нам, Хаҥалас, Горнай, Мэҥэ Хаҥалас улуустарыттан уонна Дьокуускай к. дэлэгээссийэлэр кыттыыны ыла кэлбиттэр.
Пуорум үөрүүлээх аһыллыытыгар мустубут дьону, бэтэрээннэри Ил Дархан, бырабыыталыстыба дьаһалтатын салайааччыта Г.Н. Михайлов, Ил Түмэн Бэрэссэдээтэлин солбуйааччы А.С. Владимиров, СӨ Ыччат уонна дьиэ кэргэн дьыалалрыгар миниистир э.т., РФ Дьоруойа И.В. Юргин, Бэтэрээннэр өрөспүүбүлүкэтээҕи сэбиэттэрин бэрэссэдээтэлэ В.О. Иванов, о.д.а. эҕэрдэлээтилэр, кыайыыны уһансыбыт көлүөнэни салгыыр Ийэ дойдуларын иһин ытык иэстэрин төлүүр бойобуой көлүөнэҕэ махталларын биллэрдилэр.
Вильям Иванов, Бэтэрээннэр өрөспүүбүлүкэтээҕи сэбиэттэрин бэрэссэдээтэлэ:
-Биллибэт саллаат, Арассыыйа Дьоруойдарын күннэрин көрсө бу күннэргэ өрөспүүбүлүкэ, Арассыыйа үрдүнэн араас патриотическай пуорумнар, күрэхтэһиилэр бара тураллар. Улуу дьоруойдарбытын айхаллаан, аата-суола суох сүппүт саллааттарбытын кэриэстээн маннык тэрээһиннэри оҥоробут. Саамай сүрүнэ, мин санаабар, бу тэрээһиннэргэ көлүөнэлэр көрсөллөр. Бойобуой дьайыылар, анал байыаннай эпэрээссийэ кыттыылаахтарын кытта саҥа үүнэн эрэр эдэр көлүөнэ оҕолор бииргэ көрсөн, биир хамаанда буолан патриот диэн хайдах буолуохтааҕын билиэхтээхтэр. Байыаннай дьайыыга сылдьыбыт аҕа табаарыстар дьэ тугу сатыылларын көрдөрүөхтэрэ, быһааран биэриэхтэрэ буоллаҕа дии, биһиги онно анаан бу тэрээһини тэрийэбит.
Бу күн патриотическай иитиинэн дьарыктанар араас тэрилтэлэр исписэлиистэрэ төгүрүк остуол тула мустан, үөрэх кыһаларыгар, улуустарга туох үлэлэр бара туралларын кэпсэттилэр, туох тиийбэтин, өссө тугу оҥоруохха сөбүн, баар кыһалҕалары быһаарыстылар. “Биһиги уопсай кыайыыбыт-80” өрөспүүбүлүкэтээҕи аахсыйа ыытыллыытын дьүүллэстилэр.
Пуорум чэрчитинэн байыаннай-спортивнай многоборье ыытылынна. Бу күрэхтэһии уратыта диэн биир хамаандаҕа бойобуой дьайыылар бэтэрээннэрэ, 50+ саастаах көлүөнэ, орто уонна үрдүк үөрэх тэрилтэлэрин устудьуоннара, курсааннар, оскуола үөрэнээччилэрэ, үлэлиир ыччат киирэллэр. Быйыл ЫБММ “Огнеборец” хамаандата, Нам улууһуттан “Дьулуур”, ИДьМ “ Честь и доблесть” хамаандата, Мэҥэ Хаҥаластан “Мэҥэлэр”, Уус Алдантан “Мүрүлэр”, Хаҥаластан “Эргистэр”, Горнай улууһуттан “Чыпчаал”, ХИФУ хамаандата “Универ”, Дьокуускайдааҕы авиационнай тиэхиньиичэскэй училище, АГАТУ, Уу тырааныспарын институтун, юридическай полицейскай колледж, тыа хаһаайыстыбатын техникумун сүүмэрдэммит хамаандалара хас да көрүҥҥэ астына-дуоһуйа күрэхтэстилэр.