Ахсынньы 3 күнүгэр Анал байыаннай дьайыы кыттыылаахтарын, хорсун саллаат буойуннарын Лопатин Аркадий Петровиһы уонна Посельскай Иван Васильевич тиһэх суолларыгар атаарыы медицинскэй киин Некрополь саалатыгар буолла.
Биһиги хаһыаппыт дьоруойа, хорсун саллаат Аркадий Лопатин былырыын баччаҕа ахсынньы 21 күнүгэр 2023 сыллаахха «Эр киһи уйана-хатана биллэр кэмэ» диэн интервьюта тахсыбыта. Онно кини үһүс төгүлүн Анал байыаннай дьайыыга баран эрэрин, ыараханнык бааһыран дойдутугар эмтэнэ кэлбитин кэпсээбитэ. Аркадий Лопатин бэйэтэ Таатта Игидэйиттэн төрүттээх. Оскуола эрдэхтэн үөрэҕэр үчүгэй, элбэхтик кинигэни ааҕар, итэҕэһи кытары сөбүлэспэт кырдьыксыт майгылаах этэ. «Тоҕо тылланан Анал байыаннай дьайыыга бардыҥ?»,- диэн ыйытыыга, судургутук: «Дойдубутугар АБДь буола турар кэмигэр хайдах туора туруохпунуй», -диэн хоруйдаабыта. Ол курдук дьиҥ-чахчы патриот санаалаах этэ хорсун саллаат Аркадий Лопатин.
Аркадий Петрович Лопатин туһунан бииргэ сулууспалаабыт дьоно маннык эппиттэрэ баар. «Аркадийы дьон көрөн сэнээн бысталлар этэ. Олох киис курдук сылбырҕа этэ. Аны сэрииһитэ хара накаас. Ити киһиэхэ инстинкт самосохранения диэн суох курдук куруук инники ыта-ыта киирэ турар киһи этэ», «Однополчаниным «профессор» быраһаай», «Аркадий профессор уонна спец. 2022 с. балаҕан ыйыгар бастакы 4 хохол билиэннэйдэрин ылбыттара. 200 биригээдэҕэ хамандыыр сылдьан. Уол оҕото», «Морпех уолаттара саллыбыттар этэ. Саамай саастаах уолаттарбыт саамай боевиктар диэн».
Бастакы барыытыгар хорсун сэрииһит Аркадий Петрович Лопатин төгүгүктээһиҥҥэ түбэһэн 18 эрэ саллаат буоланнар 250 Украина уонна наймыламмыт омук сэрииһиттэрин утары 2 күнү быһа сэриилэспиттэр. Кэлин дьонноро быыһаабыттарыгар комбааттара Прибой диэн киһи ытыы- ытыы махтаммыт: «Якуты, молодцы! Я приеду и преклонюсь перед вашими матерями!» диэн. Ол эрэн нэдиэлэ буолаат, комбаат Прибой өлөн хаалан, хомойуох иһин, хорсун саллаат А. Лопатин наҕараадата суох хаалбыт. Иккис сырыытыгар сэрии толоонугар ыараханнык бааһыран баран бэйэтэ сыыллан тахсыбыта эмиэ кытаанах санаатын, толлубат тулуурун, чиҥ майгытын дакаастаабыта да кини хорсун сэрииһит буоларын көрдөрөр.
Дьэ ити курдук, биир да наҕараадата суох эрээри дьиҥ-чахчы патриот, Ийэ дойдутугар бэриниилээх буолан үс төгүл саадаҕын курданан төрөөбүт дойдутун тиһэх тыыныгар диэри көмүскэспит саллаат Аркадий Лопати аата кэлэр кэнчээри ыччаттарга куруук холобур буола туруо.
Н. Ильина
ПОДЕЛИТЬСЯ: