Кытай халандаарынан
Саҥа сылы хайдах көрсөбүт? Үгүс дьон кытай халандаарын кэтиир. Ол курдук 2025 сыл Моҕой сыла (Год Зеленой Деревянной Змеи).
Моҕой истиҥ сыһыаны, болҕомтону, ытыктабылы эрэйэр кыыл буолар. Онон бырааһынньык күнү саамай чугас, күндү дьоҥҥутун кытары дьиэҕитигэр олорон көрсөргүт ордук диэн сүбэлииллэр. Өскөтүн 00:00ч. дьиэҕэр көрсүөххүн баҕарбат, эбэтэр кыаллыбат буоллаҕына, илиҥҥи норуоттар кафеларыгар, рестораннарыгар көрсүөххүтүн сөп. Сүрүнэ – чуумпу соҕус сир буолуохтаах уонна илиҥҥи норуоттар дойдуларын курдук эйгэ баар буолуохтаах. Оттон таҥас-сап өттүгэр эмиэ кэккэ ирдэбиллэр бааллар: от күөх, дьэҥкир күөх, кыһыл эбэтэр саһархай өҥнөөх таҥастаах буолуохтаах. Ас өттүгэр элбэх салаат, оҕуруот аһа уонна курууппа аһа баар буолуохтаах. Көтөр эбэтэр сибиинньэ этин астыаххытын сөп.
Бу үөһэ ыйыллыбыт сүбэлэр туох да научнай бигэргэтиилэрэ суохтар, интернет аһаҕас ситимиттэн ылылынна.
Оттон сахаҕа?
Саха итэҕэлинэн билигин биһиги Айыыһыт сылыгар олоробут. Онтон кэлэр 2025 сыл Иэйэхсит сыла. Иэйэхсит хотун сылаас тыына буорга, ууга, салгыҥҥа иҥэр. Киһини амарах, эйэҕэс оҥорор, бары куһаҕантан арчылыыр. Иэйиэхсит кири-хоҕу сөбүлээбэт. Иэйиэхсит кэллэҕинэ, от – мас көҕөрөр, ас-үөл дэлэйэр. Иэйиэхсит киһини бары куһаҕантан сэрэтэр, араҥаччылыыр. Кини киһиэхэ сүөһү көрөөччү, булчут, үүннэрээччи, эмчит идэлэри биэрэр. Хас биирдии киһи Айыылыы санаата уһуктар кэмэ. Өркөн өй – муударай мутуга тобуллар кэмэ. Киһи айылҕаттан дьоҕурдара арылларыгар бэрт сыл буолар. Талба талааннаргытын арына сатаатаххытына – сатабыллаах дьон буолан – дьоҥҥо-сэргэҕэ кэрэхситэр кэмҥит кэлиэн сөп. Өйү тутуу, киэҥ көҕүстээх буолуу, дуоспуруннаах туттуулаах дьону быйыл – хаччы оҥоруу, байыы – тайыы күүтэр сыла.
ПОДЕЛИТЬСЯ: